Read Vute Gbàŋ Èbɨ̀rə́ə̀ 13 Bible Online

Gbàŋ Èbɨ̀rə́ə̀ 13 - Vute bible

Gbàŋ Èbɨ̀rə́ə̀ 13

¹Dunáam ɓwâ lâs ɓe ɗûnɨ́m mvókín nyínè no hȩ mwin yàá bɨ ə́mní.

²Ɗəəŋnáam ɨnayâna á ɗúnɨ nyí gàmɓà nùb go nyí lɨ́ŋniì mîn. Ɓetí, ɓe ndɨ̧̀ɨ̧́ u̧nè kɨ́, nùb kù ya gamtɨ́ dùgallɨb Mèèín ŋgáb ɗə̀ə̀ŋwá.

³Dunáam ɓe yíìnɨ́m sumí ɓe ɨ́r nùb du nìrì hȩ nyíne ŋgáb á cúk lɨ́ u̧. Dunáam ɓe yíìnɨ́m sumí ɓe ɨ́r nùb kùb du túùmnɨ jábɨ́rí, a dù hȩ nyí á kùb du jábɨ́r kɨ́ túùmnɨ rɨ u̧.

⁴Nò lâs jə̀ŋhá gùúm. Nɨ̀ŋgwá gùmní ɓe nɨ̀gwi gùmní dù ɓe jɨ̧ mvókín ŋgábè no. Nùb du ndɨ̀ŋnɨ ŋguùŋ du nànɨ sə̀réé ɓe nùb màŋnì lâs, ŋgwìn Mèèín kwá bɨ ŋgáb.

⁵Mè nyínè no, nɨ ɗúwa ɗûnɨ́m mònéè ndóòŋ nyí, kɨ́ du nyínè ŋgáréè, óknáam mɨ̀tù ɓe kí, ɓetí Mèín nɨ̀mɨ́r taá ɨnè: «Mɨ kwá mɨ wu mbɨ̂, mɨ kwá mɨ wu lèhɨ̀r.»

⁶Àm kɨ́ á nɨ́m fɨ́tɨ tànɨ ɓe gíí ɨnè ru: «Kéké ɨ́ du nò du mɨ kpɔ́kniì, mɨ tɨ̀ mɨ nɨ́m kù lùr. Nɨ́m nɨ̀vɨ́tè fɨ́tɨ mɨ ndɨ̀ŋniì nɨ ɗàà.»

⁷Lə́əmcunáye nùb ya geyaye mɨ̀kwìn nùb ə́mní nyínè, ŋgáb ya ɓéenaá nyí àm Mèèín. Pə́náye hȩ ŋgáb ya ge mè ŋgábè. Mánáam dùɓwênɨ ɓe ə́ə́m hȩ ŋgáb.

⁸Yésù Krístù nɨ cə́ndɨ̀nɨ ɗàà. Ŋgə́ mwi̧ kɨ́ tií du yáya ru, dùgɨ̀ mwáín, ŋgə́ kwá dulɨ́ŋ tɨ́k.

⁹Nɨ ɗúwa nyí mbɨ́k kùb mbáàŋ nyí ɓe tɔ̀ɔ́ bɨ kàŋnì. Á nyɔ̧ɔ̧́ ndɨ̀ŋnyàáŋ Mèèín tààmnà nɨ́m njɔ̧̀, ɨ́ ndôŋ ɓíhɨ̀b du ɓe ɨ́r cɔɔ̀ŋ, ɓetí nùb du jə̀ŋnɨ ɓíhɨ̀b kíì, ɓíhɨ̀b kɨ́ nɨ ŋgáb kpɔ́knɨ nɨ́m kù ɗàà.

¹⁰Nɨ́m á nɨ́ ɓe tə́bə̀rè múbí nɨ́mè. Nɨ ɗúwa nùb na satɨgà hȩ Jwîf bɨ nalɨ́ŋndé tàŋ nɨ́m tə́bə̀rè nɨ́mè kɨ́ ya kwe.

¹¹Nɨ̀gáŋ satɨgàà Jwîf ɓoò á gèrénɨ tɨ́m nyèèmí yɨ́ duɓa sarîn ndɨ, nànɨ satɨgà ɓe ɨ́r tɨ́ɨ́r cumbi ɓe kí, ɨ́dù fɨ́nɨ́b nyèém kíì kùb a gè tòŋkɨ́nɨ kúr gɨ́ní.

¹²Àm kɨ́ á Yésù yi kúɓwéhe kúr gɨ́ní ru, àm ŋgə́ a sàtɨ̀kî nɨ̀vɨ́tɨ̀b ɓe tɨ́m ŋgə́ nɨ̀mɨ́rí.

¹³Nɨ́m gàìnsònácɨ̀ ŋgə́ kúr gɨ́ní ku, nɨ́m a jíìɓwéhè nyèìn hȩ ŋgə́.

¹⁴Ɓetí ɗɔ̀bín hò̧, nɨ́m nɨ ɓe kúr du sàmàìn kùb ɓətɨkɨ́ré ɗàwáá ɗàà, nɨ́m má nɨ́ dùnɨ kúr Mèín kwá óŋna nɨ́mè no á.

¹⁵Ɓe ɨ́r Yésùù, nɨ́m ŋgə̀mná Mèín ɓwâ lâs hȩ satɨgà. Àm Mèín du Kéké nɨ́mè rè, nɨ́m sòŋkɨ́lɨ́ŋná kí ɓɔ̧ɔ̧.

¹⁶Nyí nɨ ndɨ̧̀ɨ̧́ nyɔ̧né mbɨ̂, dùgɨ̀ kpɔ̂ kùŋ mwin yàá, satɨgààb nyaŋ Mèín sumíì á kí.

¹⁷Jəŋnáam nùb du nyí gèniì, óknáam nɨ́m ŋgáb taré. Ŋgáb á nyí góòmnɨ íí ya, ɓetí ŋgáb kwá tana Mèín hȩ ŋgáb ya éí ə́r ɓóò. Nyí ɨ́ ndɨ̀ŋ u̧, ŋgáb ɓa éínɨ ə́r kɨ́ ɓe mɨ̀tù á. Ŋgáb ɨ́ éì bɨ́ ɓe yəré sumí, tɨ̀ nɨ nyí nɨ́m kù kpɔ̂.

¹⁸Gɨnáam tíí ɓe yóŋnàá nɨ́m Mèèín. Nɨ́m ɗəəŋtɨ́ nɨ́m kù nɨ́m ɓa síí nó yə̀tɨ̀cùniì nɨ ɗàà, ɓetí ɓwâ lâs nɨ́m á mánɨ ndɨ̧̀ɨ̧́ nyɔ̧né.

¹⁹Yée, yóŋnáam Mèín, ŋgə́ nà mɨ mvókín mɨ gɨcusokɔ́ɔ yɨ́ nyínè.

²⁰Mèín nò du nànɨ ju ɗóóŋ səəmcuhó̧tɨ́ Yésù nò du Kéké nɨ́mè mvókín nɨ̀kwíbí, ŋgə́ nò du hȩ nò jíri gə́tɨ ndèɗúúb ɓe nyòm tɨ́m satɨgàà noò, tɨ́m satɨgàà nyaaŋkɨ́nacɨ nɨ́m jin nyàáŋ du cɔ̧́nɨ cɔ̧́ɔ̧ ɗàwáá rɨ.

²¹Mèín nò du nànɨ ju ɗóóŋ nà nyí nyòm nyí ndɨŋ nɨ́ɨ́b nyɔ̧ɔ̧́ ɓwâ lâs, àm nyí a ndɨ̀ŋ nɨ́m ŋgə́ ɗúré. Ɓe ɨ́r Yésù Krístùù, ŋgə́ nà nyí nyòm ndɨŋ nɨ́m nyaŋ ŋgə́ sumíì. Mgbíí dù ɓe Yésù Krístù tɨ́k kɨ̀ tɨ́k. Àmèn!

²²Mwin yàá bɨ moò péín ə́mní, nɨ́m mɨ ta nyí ndɨ̀ŋte á nyí jíhɨ̀ nyindí mɨ nyinna nyí tààmnɨ nyí njɔ̧̀ no rè, ɓetí nɨ́m mɨ tɨinsona nyí ɗàrɨ́ nɨ ví̧i̧ ɗàà.

²³Kùb mbɨ́khó̧tɨ́ Tìmòtê nìrì. Ŋgə́ ɨ́ féínwò kə́sə́k, gùr mɨ ɓa gɨ̀sònɨ nyí pénɨ rè, nɨ́me ŋgə́ a gɨ̀sò cúk.

²⁴Nùb du gènɨ mɨ̀kwìn nùb ə́mní nyínè ɓe nùb gbàŋ Mèèín lâs, nyindɨnáam ŋgáb. Mwin yàá bɨ ə́mní du nùb Ìtàlíì rɨ nyindɨsoó nyí.

²⁵Faám Mèèín dù ɓe nyí lâs.