Read Vute Gbàŋ Èbɨ̀rə́ə̀ 2 Bible Online

Gbàŋ Èbɨ̀rə́ə̀ 2 - Vute bible

Gbàŋ Èbɨ̀rə́ə̀ 2

¹Hȩ dùnɨ u̧nèé, nɨ́m gə́tɨ̀náɓà kìn nɨ́m óklé mîn, duú u̧ ɗàà nɨ́m ɓa ná nɨ́ lɔ̧́nɨ á.

²Mèín ya tómwonaá nɨ̀vɨ́tɨ̀b kìn[1] dùgallɨbi ɓɔ̧ɔ̧, kìn kɨ́ ɨ́ túmnè ní kìn àmɨɨr á. Nò ya ákɨ́ tó kìn kɨ́ ya, ŋgə́ ɨ́ dù ndɨ̀ŋwá nɨ́m kìn kɨ́ ta ndɨ̀ŋte ya ɓábtɨ́ ɓe jábɨ́r ɗóhe ɓe nò kíì.

³Hȩ dùnɨ u̧nèé, nɨ́m tɨ̀ ɓáíhó̧ce nɨ́ jábɨ́rí i̧, ɓè nɨ́m pə́waamkɨ́ nɨ́ kúúŋ ɓə́r kàm kíì. Kéké nɨ̀mɨ́r ya ɓéenaá nɨ́m àm ɓə́r kíì, nùb ya ókce ŋgə́ nyìnniì ɨ́ tànà nɨ́m àm kɨ́ àmɨɨr á.

⁴Mèín nɨ̀mɨ́r ya túumtɨ́ ɨnayâna nɨ́ɨ́b ŋgáb du nyìnnɨ kɨ́ àmɨɨr á, ɓe nɨ́ɨ́b kàtɨ́b sɨ̀sɨ̀rí ɓe lìím ŋgáb ya ndɨŋkomndé. Ŋgə́ ya gɔkteeɓwéetɨ́ nyər Nyéhè Sarɨ́nne hȩ ŋgə́ ɗúré.

⁵Ɗɔ̀ɔ́b cɨ́m yȩné mɨ du tànɨ rè, Mèín yi nɨ́ ɗúwa dùgallɨb ŋgáŋ ya.

⁶Ɨ́dù káàtà Mèèín no, nò kù wáatɨ́ ɨnè: «Yée Mèín! Nɨ̀vɨ́tè ma cè na, ɨ́ tà wu lə́mnɨ̀ ŋgə́? Ŋgə́ ma cè na, ɨ́ tà wu gómɨ̀ ŋgə́ íí ya?

⁷Mvókín kù no, wu ya ndɨŋtɨ́ nyòm dùgallɨbi ndóŋ kɨ́ noò, wu ya naá ŋgə́ mgbíí ɓe dɨmɨɨr.

⁸Wu ya naá ŋgə́ nyòm kɨ́k nɨ́ɨ́b lâs.» Ɓwâ du ta̧á̧ ɨnayâna «Mèín yi naá nɨ̀vɨ́tè nyòm kɨ́k nɨ́ɨ́b lâs» rɨ, kí ta ɨnayâna ɗú nɨ́ɨ́b lâs, dùgɨ̀ ní, jə̀ŋ ŋgə́ yáá na á. Ɨ́dù há̧á̧ ɗàrò, nɨ̀vɨ́tɨ̀b bɨ pə́háyèwá ɨnayâna ɗú nɨ́ɨ́b lâs jə̀ŋ ŋgə́ á.

⁹Ɨ́dù Yésù, nò Mèín ya ndɨŋ mvókín kù no nyòm dùgallɨbi ndóŋ kɨ́ noò rɨ, nɨ́m á pénɨ hȩ Mèín yi na ŋgə́ mgbíí ɓe dɨmɨɨr ɓe ɨ́r jábɨ́r ŋgə́ ya pə́, há̧á̧ ŋgə́ ɨ́ kûú. Nyàŋnjɔ̧̀ Mèèín ndɨŋtɨ́ Yésù kú ɓe ɨ́r nɨ̀vɨ́tɨ̀b lâs.

¹⁰Mèín ɨ́ nyaŋhȩ nɨ́ɨ́b lâs lu, nɨ́ɨ́b kɨ́ ókce ɓe ŋgə́ á. Ŋgə́ á cè ɗúnɨ munɨ́b níì ví̧i̧ kwàɓwê mgbíí níì. Hȩ Yésù dùnɨ nò ɓáte munɨ́b kíì, yaá ɗúnɨ Mèín ndɨ̀ŋ ŋgə́ péyè jábɨ́r ɗà ŋgə́ a dùɓàgɨ̀ ɗóhîn ɓe yɨ́ juu ŋgə́ ya nyaaŋkɨ́na ŋgéé.

¹¹Yésù ɨ́ du ákɨ́nànɨ nɨ̀vɨ́tɨ̀b cum só ru. Ŋgə́ ɓe nùb du cɨ bɨ́ cum só ɗàà kɨ́ lâs á tá mwi̧. Àm kɨ́ á ŋgə́ du nɨ́ óknɨ sə̀ré ɓénɨ ŋgáb mwin yàáb níì ɗàà ru.

¹²Ŋgə́ wáaɓacéyetɨ́ ɨnè: «Yée Mèín, mɨ kwá nyi̧i̧na mwin yàá bɨ moò àm woò. Yɨ́ nɨ̀vɨ́tɨ̀b du ɓáhîn wu ŋgə̀mnɨ rɨ, mɨ kwá ə́ŋhɨ ŋgábè tíí wu mgbíìnɨ.»

¹³Ŋgə́ takwatɨ́ ɨnè: «Mɨ kwá səŋ gíí moò ɓe Mèín». Ŋgə́ ɨ́ tàkwà ɨnè: «Mɨ á ɓaín ɓe nùb Mèín na mɨ du hȩ munɨ́b moò rè».

¹⁴Munɨ́b kɨ́ nɨ̀vɨ́tɨ̀b á, ŋgáb á sɨ́r ɓe tɨ́m só. Sátàìn yaá ɓe nyòm cwéé, àm kɨ́ á Yésù nɨ̀mɨ́r, ɓe cwá ŋgə́ ya kúré, ya settɨkɨ́ síí nóò nɨ̀vɨ́tè àm góokɨ́na Sátàìn nyòm no kɨ́,

¹⁵ɗà ŋgə́ a céínhó̧ɓwéhè nùb yi du mè ŋgábè no hȩ mbɔ́klɨ́b àm ŋgáb ya du lùnɨ cwéé.

¹⁶Ɓetí ŋgə́ nɨ́ gòwá kpɔ́knɨ dùgallɨb, ŋgə́ go nɨ kpɔ́knɨ nyȩrɨ́b Àbɨ̀ràháàm á.

¹⁷Àm kɨ́ á yi du ɗúnɨ ŋgə́ dùɓà nɨ́m mwi̧ ɓe mwin yàáb noò ru. Ɗà ŋgə́ a dùnà ŋgáb nɨ̀gáŋ satɨgàà duɓa ɓe jɨ̧, ɨ́ dùkwà ɓe nyàŋnjɔ̧̀ ə́r ŋgə́ du ə́nnànɨ Mèèín no, àm Mèín a tɨ́ínà mwin yàáb noò cuum ŋgábè.

¹⁸Ɗàrò cè, á sàmàìn ŋgə́ kpɔ́k nùb kɨhɨr kwaré, ɓetí ŋgə́ nɨ̀mɨ́r kùb ya kəhií ŋgə́, ŋgə́ ɨ́ pê jábɨ́r.