Read Vute Gbàŋ Èbɨ̀rə́ə̀ 3 Bible Online

Gbàŋ Èbɨ̀rə́ə̀ 3 - Vute bible

Gbàŋ Èbɨ̀rə́ə̀ 3

¹Mwin yàá bɨ ə́mní, nyí nùb Mèín ya ɓéré, pə́náam íí ɓe Yésù. Ŋgə́ nò tómé Mèèín á. Ŋgə́ ɨ́ du nɨ̀gáŋ satɨgàà ru. Ə́ə́m nɨ́m ə́mne Mèèín lâs ɗoŋwo ŋgə́ yá á.

²Mèín ya caá ŋgə́, ŋgə́ éí ə́r kɨ́, ŋgə́ ɨ́ jə̀ŋcê hȩ Mòyîs ya jəŋɓwéeré, ɓetí á tɨín káàtà Mèèín no ɓe ɨ́r Mòyîs kíì ɨnè: «Mèèín yó, ŋgə́ yaá ɓe jɨ̧.»

³Mgbíí Yésù kwa kɨ́ á nɨ́ jíri ndóóŋ kɨ́ ya Mòyíìs, ɓetí nò ma dúhé ma̧né á nɨ́ dɨɨ́m ndóóŋ dúhé nɨ̀mɨ́r.

⁴Dúhé lâs á ɓe nò ma ŋgéé, ɨ́dù Mèín ɨ́ du nɨ́ mànɨ nɨ́ɨ́b lâs lu.

⁵Kɨ́ Mòyíìs, Mèèín yó, ŋgə́ yaá ɓe jɨ̧ hȩ nò ə́ré, àm ní a dù mɨ̀námé kìn kùb ɓa tàniì.

⁶Ɨ́dù Krístù á ɓe jɨ̧, ŋgə́ nò du muní. Mèèín yó, ŋgə́ ɨ́ du tíí ru. Nɨ́m du dúú Mèèín á, ɓè nɨ́m tamɓa njɔ̧̀, nɨ́m ɨ́ ô mɨ̀tù ɓe ɨ́r gíí nɨ́m du ɓe kíí.

⁷Àm kɨ́ á Nyéhè Sarîn wáhe ɨnè ru: «Mwáín, nyí ɨ́ ô kúu Mèèín,

⁸nyí nɨ tó ɗèìnkɨ̂r, hȩ nyí ya ndɨŋ ŋgwàì ndɨ̀ŋnì, ɓwâ nyí ya nomɨ ŋgə́ rɨ́.»

⁹Mèín taá, ŋgwàì ndɨ̀ŋnì ku, tákɨ̀rɨ́b nyínè ya jaaŋkíí ní, nòmɨ̀nɨ ní, pénɨ nɨ́m ní ɓa ndɨ̀ŋniì. U̧ kɨ́ há̧á̧ dáín vii bɨrɨ́b ŋgáb ya péé nɨ́m ní ya ndɨŋndé.

¹⁰Àm kɨ́ á ní ya ókna ŋgáb njù̧, ní ɨ́ tà ɨnayâna njɔ̧̀ ŋgábè á ɓwâ lâs ŋgáb mbáàŋnɨ, ŋgáb cè bɨ́ mánɨ ɗə̀ə̀ŋnɨ nɨ́m ní ɗú ŋgáb ndɨ̀ŋte ɗàà ru.

¹¹Hȩ ní ya ók njù̧ú̧ á ní yi sab, ní ɨ́ tà ɨnayâna ùwí ní ya nyaaŋkɨ́na gbàŋ níì rɨ, ŋgáb kwá bɨ ùwí kɨ́ kwàɓàr.

¹²Àm kɨ́ á, mwin yàá bɨ ə́mní, mɨ ta nyí gə́tìi. Mvókín nyínè no, nò kù nɨ ɓe njɔ̧̀ ɓáŋhîn ə́ə́m nó ɗàwáá dùr, ŋgə́ tɨ̀ mvúlehe nɨ́ Mèín nò du kùb nànɨ mèè.

¹³Há̧á̧ mwáín Mèín á nyí ɓéháyènɨ. Hȩ dùnɨ u̧nèé, ye lâs, ɓwâ nyí duye óknɨ ɓə́r kɨ́ rè, dunáam ju nò ə́ré taamna kùùŋ njɔ̧̀, nò rè a tààmnà kùùŋ njɔ̧̀. Ɓe ndɨ̧̀ɨ̧́ u̧nè kɨ́, cum tɨ̀ nɨ nyí mbáŋhɨ̀r, nyí tɨ̀ nɨ ɓe ɗèìntóo dùcée.

¹⁴Nɨ́me Krístù bɨ ɨ́ du éíɓáànɨ ru, ɓè nɨ́m gə́tɨ gíí nɨ́m yi du ɓe kí yàwòó yàllì.

¹⁵Káàtà Mèèín wáatɨ́ ɨnè: «Mwáín nyí ɨ́ ô kúu Mèèín, nyí nɨ tó ɗèìnkɨ̂r hȩ nyí ya ndɨŋye rɨ́ u̧.»

¹⁶Nùb ya ók kìn Mèèín, ŋgáb ɨ́ ɗèìnkî tó kɨ́ ma na bɨ? Nùb kɨ́ du vùùm nùb Mòyîs ya áhó̧kɨ́ Èjíìbtə̀ lâs lɨ á.

¹⁷Nùb Mèín ya ókna njù̧ há̧á̧ dáín vii bɨrɨ́b lè ma na bɨ? Ŋgə́ ya ókna nùb ya com ŋgwàì ndɨ̀ŋnì ɗà ŋgáb ɨ́ ndùk lɨ á.

¹⁸Ɓwâ Mèín ya sab ɨnayâna ùwí ní ya nyaaŋkɨ́na gbàŋ níì ŋgáb kwá bɨ́ ùwí kɨ́ kwàɓàr na rɨ, ŋgə́ ya sabna na bɨ á? Ŋgə́ ya sabna nùb ya nomɨ ŋgə́ rɨ́ á.

¹⁹Nɨ́m pə́metɨ́ ɨnayâna ŋgáb bɨ ùwí kɨ́ kwàmèɓàwá, àm ŋgáb ya du bɨ́ ə́ə̀mwáá.