Read Vute Gbàŋ Èbɨ̀rə́ə̀ 5 Bible Online

Gbàŋ Èbɨ̀rə́ə̀ 5 - Vute bible

Gbàŋ Èbɨ̀rə́ə̀ 5

¹Nɨ̀gáŋ satɨgàà lâs, Mèín cahó̧ ŋgə́ mvókín nɨ̀vɨ́tɨ̀bì á, ŋgə́ gò ní ə́nnànɨ, àm nùb meré a dù nyɔ̧né. Ŋgə́ á nànɨ múúb ɓe satɨgà, àm cum nɨ̀vɨ́tɨ̀bì a dù tɨ́nne.

²Hȩ nɨ̀gáŋ satɨgàà kɨ́ nɨ̀mɨr duɓwée njɔ̧̀ gó̧ne, ŋgə́ á bìnɨ sum ɓe nò ndɨŋ kumí, dùgɨ̀ nò du nɨ́m kù ɗə̀ə̀ŋwáá.

³Hȩ ŋgə́ nɨ̀mɨr dùnɨ nò njɔ̧̀ gó̧ne, á ɗúnɨ ŋgə́ nà satɨgà ɓe ɨ́r cum ŋgə́ nɨ̀mɨ́rí ɓwê, nɨ tàhó̧ɗóòwá ɓe ɨ́r cum nɨ̀vɨ́tɨ̀bì.

⁴Sàmàìn nò kù seiɓa nɨ̀gáŋ satɨgàà ɓe síhé ɗàà. Mèín ɨ́ du nɨ́ cànɨ nò kɨ́ ru, hȩ ŋgə́ ya ca Àrɔ̂ŋ ndɨ u̧.

⁵Du hȩ Krístù u̧ á, nɨ ŋgə́ nɨ̀mɨr sé yi seiɓa nɨ̀gáŋ satɨgàà ɓe síí. Mèín nɨ̀mɨ́r ya wáanaɓa nɨ́ ŋgə́ ɨnè ru: «Wu mwin moò á, yànɨ mwáín, mɨ Tá woò á.»

⁶Mèín takwatɨ́ yɨ́ kù ɨnè: «Kɨ́ gwìí mwi̧í̧, wu kwá du nɨ̀gáŋ satɨgàà hȩ Mèlkìsèdêk ya duré.»

⁷Ɓwâ Yésù ya duye ɗɔ̀bɨ́nné, ŋgə́ ya yóŋɓatɨ́ Mèín nò yi fɨ́tɨ ŋgə́ ɓátɨ̀niì, ŋgə́ a kɨ́íce. Mèín ɨ́ gàm mɨ̀yú̧ nó kɨ́ àm ŋgə́ ya du ɓe jɨ̧ɨ̧́.

⁸Dugɨ hȩ ŋgə́ ya du Mwin Mèèín, jábɨ́r yi du ŋgə́ kwàtèèniì lâs yi ndɨŋtɨ́ ŋgə́ dù ɓe jɨ̧.

⁹Ɓwâ ŋgə́ yi ducɨ ɗóhîn ɓe yɨ́ juu Tá noò yi nyaaŋkɨ́na ŋgéé á ŋgə́ sei nò ɓáte nùb du ŋgə́ jə̀ŋniì, àm ŋgáb a kwà mè mɨ̀cɨ̧̀ɨ̧́.

¹⁰Á Mèín ta ŋgə́ nɨ̀gáŋ satɨgàà á, hȩ Mèlkìsèdêk ya duré.

¹¹Mɨ á ɓe nɨ́m mɨ nyinndé ví̧i̧, ɨ́dù á ɓí mɨ tànànyààŋ nyí, ɓetí nyí nɨ ókkɔ́ɔ̀nɨ ɗàà.

¹²Tɨ ɗú nyí dùɓàcɨ̀ tá tɔ̀hí bɨ á, ɨ́dù há̧á̧ ɗàrò nyí á ɗúháyènɨ kùb tɔ̀ɔ̀nà nyí nɨ́ɨ́b yàyɨ̀rí du ɓe ɨ́r kìn Mèèín. Tɨ ɗú nyí tàŋcɨ̀ cɔŋ tamnì á, ɨ́dù há̧á̧ ɗàrò nyí á háyè nɨ ɗúnɨ ma̧à̧.

¹³Nò du nɨ́ mà̧à̧nɨ mahɨ̀rì duye nɨ mutí á, ŋgə́ nɨ́ ɗə̀ə̀ŋwá nɨ́m du nyɔ̧ɔ̧́ ɓe kɨ́ du ɓáŋhɨ́nne.

¹⁴U̧ kɨ́ cɔŋ tamnì duna nɨ nùb ducɨ bɨ́ gbɔ̧́ne á, ŋgáb ya marɨkíí bɨ́ njɔ̧̀ ɓoò ɓe càá nɨ́m du nyɔ̧ɔ̧́ ɓe kɨ́ du ɓáŋhɨ́nne.