Read Vute Gbàŋ Èbɨ̀rə́ə̀ 6 Bible Online

Gbàŋ Èbɨ̀rə́ə̀ 6 - Vute bible

Gbàŋ Èbɨ̀rə́ə̀ 6

¹Àm kɨ́ á du ɗúnɨ nɨ́m mbɨ́ksò nɨ́ɨ́b nɨ́m ya fobɨyaye ɓe ɨ́r Krístùù cùrì, nɨ́m a fòbɨ̀cì nɨ́ nɨ́m du ɓe ɨ́r nùb gbɔ̧́ɔ̧ ɓe ɨ́r Krístù kíì. Yààr tɔ̀hí á tànɨ ɨnayâna nɨ́m mbɨ́k ndɨ̧̀ɨ̧́ nɨ́m du kùb gèrénɨ cwéé, nɨ́m a ə́mnè Mèín, nɨ́m mbɨ́k tɔ̀ɔ́ du ɓe ɨ́r kɔ nyiín nyin, ɓe hèìwû ŋgáár ŋgwéné. Nɨ́m mbɨ́k ɓéhèé sə̀ə̀mcùhô̧ nɨ̀kwíbí ɓe ŋgwìn cáŋhɨ̀rí. Nɨ ɗúwa nɨ́m cùwòkwàcɨ̀ yààr tɔ̀hí kɨ́ ya.

³Nɨ́m gɨ̀ná tíí ɓe fòbèé nɨ́m du ɓe ɨ́r nùb gbɔ̧́ne, ɓè Mèín ə́əmndé.

⁴Pə́náye nùb ya gucuré ju mè ɓáŋhɨ́nne noò. Mèín ya túumnaɓatɨ́ ŋgáb mwa nóò, ŋgáb ya ɗəəŋɓatɨ́ màmɨ́nɨ̀m nyər ɓɨllɨnne, ŋgáb ɨ́ kwàɓàhâ Nyéhè Sarîn.

⁵Ŋgáb yi ɗəəŋɓatɨ́ ɨnayâna nyindí fó̧ Mèèín ɓɔ̧ne á nyɔ̧ɔ̧́. Ŋgáb yi ɗəəŋɓacií hȩ nyòm mè hehí duré.

⁶Ɨ́dù ŋgáb ɨ́ lə́cùhâ bɨ́ ju mè ɓáŋhɨ́nne no. Kúúŋ nùb kíì, sàmàìn kùb ndɨŋ ŋgáb ɓàndɨ̀ sum kɨ́ gwì bɨrɨ́bí ɗàà, ɓetí ɓe ndɨ̧̀ɨ̧́ u̧nè kɨ́, ŋgáb kpáaŋwú bɨ́ Mwin Mèèín bɨ̧̀ɨ̧́ kɨ́ gwì bɨrɨ́bí á, ŋgáb ndɨŋɓwée bɨ nɨ́m kùb andɨ ŋgéé á.

⁷Ɓwâ nàá du nànɨ ɓwâ lâs lɨ, nɨ́ɨ́b ɗo̧ó̧ ɨ́ dù súnànɨ nùb du ɗȩ̀ȩ̀nɨ ɗɔ̀ɔ́b kíì, Mèín á fàmnɨ ɗɔ̀ɔ́b kɨ́.

⁸Ɨ́dù lúúŋ ɓe ɓwìn ɓáŋhɨ́b ɨ́ dù bɨ́ súnɨ ɗɔ̀ɔ́b kɨ́ ya, ŋgə́ du nɨ kúri á. Mèín ɓa ɗɔ̀ɔ́b kɨ́ káínɨ á, kùb a tòŋkî ŋgə́.

⁹Ɓwàjììb mo mɨ ɗúɓa ceí, dugɨ hȩ mɨ nyin u̧nèé, mɨ á ɓe gíí ɓe ɨ́r nyínè, ɓetí mɨ ɗəəŋtɨ́ nyí á tùɓànɨ jɨ̀r nyɔ̧ɔ̧́ du jɨ̀r ɓə́rì rè.

¹⁰Mèín á nɨ ɗɨ́ɗɨ̧́. Nyí ya ə́nnaá kùb mwin yàá ə́mní, há̧á̧ mwáín nyí á háyè ŋgáb ə́nnànɨ, túùmnɨ ɗûnɨ́m nyí ɗú Mèèín. Ŋgə́ tɨ̀ nɨ nɨ́ɨ́b nyí ndɨŋ kɨ́ lâs cə̀mlâŋ.

¹¹Ɨ́dù mɨ á ɗúnɨ ɓè nò lâs tɨ túumɓaye ɗûnɨ́m kɨ́ há̧á̧ cáŋhɨ̀rí, àm nɨ́m nyí du sə̀ŋnɨ gíí ya kɨ́ a ndɨ̀ŋmèɓà.

¹²Mɨ mɨ tàwá nyí sèì nyɨnyáàb, mɨ ɗú nyí dù hȩ nùb du ɓe ə́ə́m, ɨ́ dùkwà ɓe jíhɨ́r lɨ á. Nùb kɨ́ á bɨ́ kwànɨ nyɔ̧ɔ̧́ Mèín ɓwállé.

¹³Ɓwâ Mèín ya ɓwáína Àbɨ̀ràhâm ɓwállí, ŋgə́ yi sabtɨ́ sàáb. Hȩ nò ndóŋ ŋgéé ya du ɗàwáá, á ŋgə́ ya sabcu ɓe ɨ́r ŋgə́ nɨ̀mɨ́rí.

¹⁴Ŋgə́ ya wáatɨ́ ɨnè: «Mɨ sabtɨ́ wu fàmnɨ, mɨ a nàkwà wu nyȩrɨ́b ví̧i̧.»

¹⁵Àbɨ̀ràhâm ɨ́ jíhè, há̧á̧ ŋgə́ ɨ́ kwàmè nɨ́m Mèín ya ɓwáína ŋgə́ kɨ́, hàrák cè.

¹⁶Ɓwâ nɨ̀vɨ́tɨ̀b du sàbnɨ sàbí, ŋgáb á sàbnɨ ɓe ɨ́r nò ndóŋ ŋgábè. Sàáb ɨ́ du nànɨ gíí ru, kùb a dùcè bɨ́ mɨ̀sə̧̀ə̧́ ndɨ̀ŋcɨ̀r.

¹⁷Nùb yi ɓa kwànɨ nyɔ̧ɔ̧́ Mèín yi ɓwállé, Mèín ya ɗú ŋgáb túùmnàɓànɨ laŋtɨ̧ɨ̧́ ɨnayâna ní tɨ̀ nɨ ɓwáár níì kɨ́ cə́ndɨ̀r, àm kɨ́ á ŋgə́ ya sablə́ sàáb yá ru.

¹⁸Ɓwáár ɓe sàáb, nɨ́ɨ́b bɨrɨ́b kɨ́ sàmàìn kùb cə́ndɨkɨ́ré ɗàà. Mèín sàmàìn kaŋ kààŋ ɓwáár ɓe sàáb nóò nokwe ɗàà, kí ɨ́ duɓa nɨ́m nànɨ gíí ru. Hȩ dùnɨ u̧nèé, gíí Mèín ta nɨ́m sə̀ŋnáa rè, nɨ́m á bɨ̀náɓànɨ gíí kɨ́ kpéín.

¹⁹Mè nɨ́mè no, gíí kɨ́ á nà nɨ́m hȩ tú̧ bɨ kórì[2] du ndɨ̀ŋnɨ kór tɨ̀ nȩ rɨ, gíí kɨ́ á ndɨ̀ŋɓwênɨ nɨ́m tɨ̀ məm ɓwáár Mèín ɓwáína nɨ́me, ŋgə́ ɨ́ du nɨ́m gə́tɨ̀nɨ ru. Ŋgə́ á gìnɨ há̧á̧ Dúú jíri Mèèín no, ŋgə́ a ààŋndôŋ sànjà júú du gɔ̀ɔ̀rénɨ Dúú kɨ́ tə̧ə̧́ bɨrɨ́b lɨ, lénɨ yɨ́ Sarîn.

²⁰Ku á Yésù lə́kɨ́yaye tíí gìnɨ nɨ́m nyààŋkɨ́nànɨ jɨ̀r. Ŋgə́ settɨ́ nɨ̀gáŋ satɨgàà kɨ́ gwìí mwi̧í̧ hȩ Mèlkìsèdêk ya duré.