Read Vute Gbàŋ Èbɨ̀rə́ə̀ 7 Bible Online

Gbàŋ Èbɨ̀rə́ə̀ 7 - Vute bible

Gbàŋ Èbɨ̀rə́ə̀ 7

¹Mèlkìsèdêk yɨɨ́m mvèìn jíri Sàléèm á, ŋgə́ yɨɨ́m ɓwê nò na satɨgàà Mèín nò du còóm cóo á. Ɓwâ Àbɨ̀ràhâm ya du cùwònɨ gwɨ̀ì sɔk ŋgə́ ya ɓei mvènnɨ́b jííb lè, Mèlkìsèdêk ɨ́ gì ŋgə́ gàmnɨ jȩ̀ȩ̀, fàmnɨ ŋgə́.

²Nɨ́ɨ́b Àbɨ̀ràhâm yi gecuwo yɨ́ ŋgə́ ya ɓeiwo suu, ŋgə́ ɨ́ nà Mèlkìsèdêk. Tíí yàyè, ɨ́r Mèlkìsèdêk lè ta: «Mvèìn jíri du ndɨ̀ŋnɨ nɨ́m du ɗɨ́ɗɨ̧́ɨ̧́» yáá na á. Tùrê bɨrɨ́bí, ŋgə́ yɨɨ́m mvèìn Sàléèm á, kí ta: «Mvèìn jíri du gèwònɨ ju ɗóóŋ» yáá na á.

³Tá Mèlkìsèdéèk ɓe yà nóò, ɓe tákɨ̀rɨ́b noò yè mɨ na bɨ kè, kùb yè yi fein ŋgə́ ɓwâ ŋge, ŋgə́ ɨ́ kúcè ɓwâ ŋge kè, káàtà Mèèín nɨ nyìnnɨ àm kɨ́ ɗàà. Ŋgə́ á nɨ́m mwi̧ ɓe Mwin Mèèín, kí du ŋgə́ nò na satɨgàà kɨ́ gwìí mwi̧í̧ á.

⁴Pə́náye hȩ ŋgə́ du jírií! Dugɨ tákɨ̀r nɨ́mè Àbɨ̀ràhâm, nɨ́ɨ́b ŋgə́ ya gecuwo yɨ́ ŋgə́ ya ɓeiwo suu, ŋgə́ ya naá Mèlkìsèdêk kɨ́ gɔ̀ mwi̧.

⁵Ɓíì Mòyíìs á nànɨ Lèvît bɨ nùb du nùb na satɨgàà nyòm ŋgáb fɔ́ gbàŋ Ísràyéèl gɔ̀ mwi̧ nɨ́ɨ́b lâs ŋgáb du ɓe kíí. U̧ kɨ́ ŋgáb nɨ̀miib ŋgáb nyȩrɨ́b Àbɨ̀ràháàm á.

⁶Mèlkìsèdêk ya nɨ́ nyȩ Lèvíì sé, ɨ́dù nɨ́ɨ́b Àbɨ̀ràhâm ya du ɓe kíí, Àbɨ̀ràhâm ɨ́ nàhô̧ ŋgə́ gɔ̀ mwi̧. Ŋgə́ ɨ́ fàm Àbɨ̀ràhâm nò ya kwa ɓwáár Mèèín.

⁷Nɨ́m ɗəəŋɓatɨ́ mîn ɨnayâna kɨ̀jíri ɨ́ du nɨ́ fàmnɨ mutí ru.

⁸Nùb na satɨgàà du bɨ́ ánɨ gɔ̀ mwi̧ nɨ̀vɨ́tɨ̀bì ŋgáréè du nùb ɓa bɨ́ kúnɨ kú̧ne á. Kɨ́ Mèlkìsèdêk ŋgə́ á nɨ́ ɓwâ lâs jáŋ hȩ du tɨín káàtààb Mèèín noò.

⁹Àbɨ̀ràhâm yi naá ŋgə́ gɔ̀ mwi̧ nɨ́ɨ́b ŋgə́ ya du ɓe kíí. Lèvî, (ŋgə́ nò nyȩrɨ́b du nùb á gɔ̀ mwi̧ nɨ̀vɨ́tɨ̀bì ŋgáréè) yi naɓwéetɨ́.

¹⁰Àbɨ̀ràhâm tákɨ̀r Lèvíì á. Ɓwâ Àbɨ̀ràhâm ɓe Mèlkìsèdêk yi ɓain kɨ́, kùb ya bɨ́ Lèvî fèìnɓàyèwá.

¹¹Ɓíì gbàŋ Ísràyéèl no, nyȩrɨ́b Lèvíì no á kùb du càhó̧nɨ nùb na satɨgàà. Ŋgáb yɨɨ́m nùb na satɨgàà hȩ Àrɔ̂ŋ ya duré á. Ɗɨ́m juu ŋgábè yi dùmèɓàháyè hȩ kɨ́ nùb na satɨgàà, kùb yè bɨ́ mákwàcɨ̀wá nò na satɨgàà fɨ́tɨ dùnɨ hȩ Mèlkìsèdêk ya duré.

¹²Ɓetí ɓwâ nò na satɨgàà cə́ndɨré, á ɗúnɨ ɓíì cə́ndɨ̀ɓwêtɨ.

¹³Nyindí rè lâs du ɓe ɨ́r Kéké nɨ́mè á. Ŋgə́ nɨ́ nò gbàŋ kù noò ndóŋ á. Nò no gbàŋné cè nɨ́ ə́r nàá satɨgàà éíkɨ́yèwá tə́bə̀rè múbí ya.

¹⁴Kùb ɗəəŋɓatɨ́ mîn ɨnayâna ŋgə́ nò gbàŋ Jùdâ noò á. Ɓwâ Mòyîs ya nyince nyindí ɓe ɨ́r nùb na satɨgàà, ŋgə́ ya nɨ́ nɨ́m kù nyìncéwa ɓe ɨ́r gbàŋ kíì.

¹⁵Nò na satɨgàà kù féínntɨ́, ŋgə́ á ɓwê hȩ Mèlkìsèdêk. Nɨ́m duɓagɨ túùmnɨ nɨ́ɨ́b lâs laŋtɨ̧ɨ̧́ fèín á kí.

¹⁶Ju nò na satɨgàà kɨ́, ya nɨ́ kɨ́ tá noò sé ŋgə́ ya ácu, nyòm mè du nɨ́ cɔ̧́ɔ̧ cɔ̧́re yi ɨ́ bɨ nɨ́ ŋgə́ nò na satɨgàà ru.

¹⁷Káàtà Mèèín á wáàɓàcéyènɨ ɨnè: «Kɨ́ gwìí mwi̧í̧, wu kwá du nò na satɨgàà, hȩ Mèlkìsèdêk ya duré.»

¹⁸Ɗɨ́m nàá satɨgà hȩ nɨ̀vɨ́tɨ̀b ndɨŋlɨ́ŋndé ya nɨ́ nɨ́m kù kpɔ́knɨ ɗàà, á kùb ya mbɨ́kci bɨ́ kí ru.

¹⁹Ɓíì Mòyíìs ya nɨ́ nɨ́m hàráá kù ndɨ̀ŋɓàcéyèwá. Ɨ́dù Mèín naréé nɨ́m gíí nyɔ̧ɔ̧́ sumí, kí ɨ́ du ndɨ̀ŋnɨ nɨ́m ŋgóòbsò ɓe ŋgə́ ru.

²⁰Féínkwàcée, ɓwâ Mèín ya bɨ Yésù nò na satɨgàà, ŋgə́ yi sabtɨ́ sàáb, u̧ kɨ́ nùb kù sei bɨ nò na satɨgàà u̧ á, sàáb ɗàà.

²¹Ɨ́dù kɨ́ Yésùù, ŋgə́ yi sei nɨ nò na satɨgàà ɓwâ Mèín yi sab, ŋgə́ ɨ́ tà: «Kéké sabtɨ́, ŋgə́ tɨ̀ nɨ ɓɔ̧ noò cə́ndɨ̀cée, ‹kɨ́ gwìí mwi̧í̧, wu nò na satɨgàà á› rɨ á.»

²²Àm kɨ́ á nɨ́m du nɨ́ gíí ɓe Yésù, ɨnayâna nɨ́m ɓa kwànɨ jin nyàáŋ duɓa nyɔ̧ɔ̧́ ndóŋ kɨ́ kù mwi̧í̧ á ru.

²³Nɨ́m kù á kwà ku: kɨ́ nùb na satɨgàà kù, ŋgáb yaá bɨ́, nò wúílé kúú, kùb a bɨ̀cùwû nò ji, àm kɨ́ á ŋgáb ya ví bɨ́ ru.

²⁴Ɨ́dù kɨ́ Yésùù, ŋgə́ nɨ́ kúnɨ kú̧u̧ ɗàà, nò kù kwá nɨ́ ŋgə́ cə́ndɨ̀cée, ŋgə́ á hácè nɨ́ ŋgə́ mwi̧cáŋ.

²⁵Àm kɨ́ á ŋgə́ du ɓe nyòm ŋgə́ ɓátɨ kɨ́ gwìí mwi̧í̧ nùb du ŋgɨ̀ɨ̀rénɨ Mèín nó ɓe ə́ə́m ŋgáb ə́mnɨ ŋgéé ru, ɓetí ŋgə́ á ɓwâ lâs jáŋ yóŋnɨ Mèín ɓe ɨ́r ŋgábè.

²⁶Yésù duɓagɨ nɨ̀gáŋ satɨgàà tɨ du nɨ́m ɗúnàniì á. Ŋgə́ á Mèèín sumí nyɔ̧ɔ̧́. Ŋgə́ ɓáŋhîn kù ndɨ̀ŋwá, dùgɨ̀ cum. Mèín ya gɔɔkíí ŋgə́ ɓe cɨcóòm, ŋgə́ gèwû ŋgə́ ɓɨllin.

²⁷Ŋgə́ nɨ́ hȩ nɨ̀gáŋ satɨgàà bɨ kù du: ye lâs, á ɗúnɨ ŋgáb nàyàyè satɨgà ɓe ɨ́r ŋgáb nɨ̀mibi, ŋgáb a nàgì kɨ́ ɓe ɨ́r nɨ̀vɨ́tɨ̀bì rɨ ɗàà. Ŋgə́ naháá nɨ́ satɨgà mwi̧, kɨ́ gwìí mwi̧í̧ cè, ɓwâ ŋgə́ ya kaikɨ́ síí ŋgə́ nɨ̀mɨ́rí rɨ.

²⁸Ɓíì Mòyíìs á nànɨ nùb du bɨ́ hàrák ɗàwáá nyòm ŋgáb sei nɨ̀gááŋ satɨgàà. Ɓwâ Mèín ya sab sàáb nóò, ɓíì Mòyíìs yaácɨ̀ nɨ ku. Sàáb nó kɨ́ á nànɨ Mwin nó ŋgə́ ndɨŋ dù járkɨ́ták kɨ́ gwìí mwi̧í̧ ndè nyòm sei nɨ̀gáŋ satɨgàà.