Read Vute Gbàŋ Èbɨ̀rə́ə̀ 8 Bible Online

Gbàŋ Èbɨ̀rə́ə̀ 8 - Vute bible

Gbàŋ Èbɨ̀rə́ə̀ 8

¹Sɨ̀ɨ̀ŋ nyindí nɨ́m ɗú nyìnnɨ rè á ɨnayâna nɨ́m á mè ɓe nɨ̀gáŋ satɨgàà kɨ́, ŋgə́ á cè du̧ú̧ ɓɨllin ŋgáár lam Mèín nò du ɓe nyòme lâs no.

²Ŋgə́ á éínɨ ə́r no satɨgàà kɨ́ yɨ́ sarîn, kí ta njáŋnè àmɨɨr Mèín yi óŋndé no na á, nɨ kɨ́ nɨ̀vɨ́tɨ̀b ya óŋndé no sé.

³Kùb sei nɨ̀gáŋ satɨgàà àm na Mèín nyər ɓe satɨgàà á. Kí du ɗú nɨ̀gáŋ satɨgàà nɨ́mè dùɓwê ɓe nɨ́m ŋgə́ na Mèèín yáá na á.

⁴Ŋgə́ yi dùyè ɗɔ̀bín, ŋgə́ yè nɨ́ nò na satɨgàà sé ɓàcéyè, ɓetí nùb na satɨgàà hȩ ɓíì Mòyíìs du ɗúniì á cɨ̀ bɨ ku.

⁵Ə́r nàá satɨgàà nùb kɨ́ du ə́nnɨ kɨ́ á nɨ́m mwi̧, fɨ́tîn ɓe kɨ́ ɓɨllɨnne. Á fɨ́tîn ɓe kɨ́ Mèín ya sóŋhȩ Mòyîs ndɨ̀ŋtɨ rɨ. Mòyîs ɓànɨ yàrénɨ ə́r njáàŋ kíì, Mèín ɨ́ tànà ŋgə́ ɨnè: «Óŋhá wu njáàŋ kɨ́ hàrák ɓe kɨ́ mɨ tɨ túumna wu ɓeè còóm ndɨ.»

⁶Ɨ́dù ɗàrò, Mèín ɗobtɨ́ Yésù ə́r ndóŋ kɨ́ nùb kíì, ɓetí ŋgə́ ɨ́ du ndɨ̀ŋnɨ jin nyàáŋ nyɔ̧ɔ̧́ Mèín ya ɓwáínaɓa nɨ̀vɨ́tɨ̀b lè fó̧ hàrák lu.

⁷Jin nyàáŋ yàyɨ̀rí kɨ́ yi dùyè u̧ nɨ́m yɨ̀tíí no ɗàà, kùb yè bɨ́ mákwàcɨ̀wá jin kɨ́ cə́ndɨ̀kɨ́nɨ.

⁸Ɨ́dù Mèín á ɓe nɨ́m ŋgə́ yetɨ gbàŋ noò ɓe kíí, ɓetí ŋgə́ wáatɨ́ ɨnè: «Jíìb kù á gònɨ, mɨ ɓa jìnnɨ jin nyàáŋ heé ɓe gbàŋ Ísràyéèl á, dùgɨ̀ ɓe gbàŋ Jùdáà.»

⁹Kéké taá ɨnè: «Jin kɨ́ tɨ̀ nɨ dùcɨ̀wá hȩ kɨ́ mɨ ya jin ɓe tákɨ̀rɨ́b ŋgábè, ye mɨ ya ɗamcuhó̧kɨ́ ŋgáb ŋgáb a cè ti Èjíìbtə̀ no rɨ. Ŋgáb ya bɨ́ jin kɨ́ jə̀ŋwá, á mɨ yi ákɨ́ɓwéece mɨ́ ŋgáb íí ya.»

¹⁰Ɓetí Kéké taá ɨnè: «Cùr jíìb kíì, jin nyàáŋ mɨ ɓacɨ mɨ́ kwéínɨ ɓe gbàŋ Ísràyéèl lâs á ɨnè: Mɨ ɓa kɨ́klénɨ ɓíhɨ̀b moò kɨ̀cáàb ŋgábè no á, mɨ a tɨ̀nndê ɓíhɨ̀b mo kɨ́ ŋgábè njɔ̧̀ɔ̧. Mɨ ɓa dùnɨ Mèín ŋgábè á, ŋgáb a dùcê gbàŋ moò.

¹¹Mvókín ŋgábè no, nò kù tɨ̀ nɨ tànàkwàcɨ̀wá nò ɓe kùŋ ti mwi̧í̧, kɨ́ kù mwin yàá noò ɨnè: ‹Ɗəŋhɨm Kéké.› Ɓetí nùb lâs ɓacɨ bɨ mɨ ɗə̀ə̀ŋnɨ á, yànɨ nùb sai ya, há̧á̧ nùb ɨ́r sóò.

¹²Ɓetí mɨ ɓa tɨ́ínɨ kum ŋgábè á, mɨ a dù mɨ́ njɔ̧̀ cuum ŋgábè ya kɨ́kcɨ̀r.»

¹³Ɓwâ Mèín ta jin nyàáŋ heé na rè, kí du ŋgə́ ndɨŋtɨ́ kɨ́ yàyɨ̀rí dùcù fìn yáá na á. Nɨ́m fìn ducɨ kwéhîn ndɨ, du nɨ nɨ́m ɓa lɔ̧́nɨ lɔ̧́ne á.