Read Vute Gbàŋ Èbɨ̀rə́ə̀ 9 Bible Online

Gbàŋ Èbɨ̀rə́ə̀ 9 - Vute bible

Gbàŋ Èbɨ̀rə́ə̀ 9

¹Ɗɔ̀bín hò̧ jin nyàáŋ yi tíí yaá ɓe ɓíhɨ̀b ɓwâ ɗómè Mèèín. Njáŋnè, yɨ́ kùb na satɨgàà yaá cè ku.

²Kùb ya óŋtɨ́ njáŋnè kù. Njáŋnè kɨ́ yaá tə̧ə̧́ gɔɔrȩ́ȩ bɨrɨ́b. Péín tíí, kùb ya ɓékom «Yɨ́ sarîn» ndè, yɨ́ dɨhe lámbàà yaá no, ɓe tə́bə̀rè kù bɨ̀rê kùb mób Mèín ɓe kíí ya.

³Gɔ̀ bɨrɨ́bí njáŋnè kíì, ɓwâ wu aaŋndóŋ sànjà júú bɨrɨ́bí yi du súuŋ ndè, wu a féìn yɨ́ kùb yi ɓékom «Yɨ́ duɓa sarîn».

⁴Ɓè á tə́bə̀rè múbí yi du. Tə́bə̀rè kɨ́ yaá ma̧á̧ ɓe gôl, kùb ya yíikom nyuŋ yá. Bôk jin nyàáŋ yaá ɓwê ɓè, bôk kɨ́ yaá gôl ya sa̧á̧. Nɔk kù yaá bôk kɨ́ no Mân[3] no. Bôk kɨ́ no ɓwê, túb Àrɔ́ɔ̀ŋ yaá no, ɓe sɨklɨb. Nyindí du ɓe ɨ́r jin nyàáŋ yaá sɨklɨb kɨ́ ya tɨín, túb Àhàróòŋ ndè cè yaá ɓe fɨ̀tɨ̀b ya.

⁵Nɨ́ɨ́b kù ɓe gɨ̀gɔɔ̀[4] só yaá bôk kɨ́ ya ə́ŋhîn ə́ŋhîn, kí yi du túúm ɨnayâna Mèín á ɓè yáá na á. Gɨ̀gɔɔ̀ ŋgábè kɨ́ yaá fúùkɨ́nɨ yɨ́ kùb yi miikom tɨ́m ɓe ɨ́r tɨ́ɨ́r cumí rɨ. Nɨ́m mwi̧ ɓwâ nyin nɨ́ɨ́b lâs nɨ rè sé.

⁶Kí du njáŋnè kɨ́ á tə̧ə̧́ gɔɔrȩ́ȩ bɨrɨ́b yáá na á. Nùb na satɨgàà á cè ye lâs lénɨ péín tíí rè ə́nnɨ ə́r ŋgábè.

⁷Ɨ́dù jɔ̀sé nɨ̀gáŋ satɨgàà ŋgə́ mwi̧ ɨ́ du lénɨ gɔ̀ bɨrɨ́bí njáŋnè kíì no ru, dáín mwi̧í̧ no gwì mwi̧cáŋ. Ŋgə́ lénɨ ku, ŋgə́ a gè tɨ́m nyə̀mì ŋgáré gìnɨ nànɨ satɨgà ɓe ɨ́r tɨ́ɨ́r cum ŋgə́ nɨ̀mɨrí, dùgɨ̀ kɨ́ nùb gbàŋ Ísràyéèl ya ndɨŋ ŋgáb ɗə̀ə̀ŋwáá.

⁸Kí du Nyéhè Sarîn ɗúú túùmnɨ ɨnayâna jɨ̀r lə́ yá duɓa sarɨ́nne nɨ kumnîn ɗàháyèwá hȩ kùb du bɨ́ lə́háyènɨ yɨ́ sarîn ndè yáá na á.

⁹Du ɓwée nɨ́m mwi̧ ɓe jíìb mwánnè á. Kí ta nyər ɓe satɨgààb nyèèmí kùb du nànɨ Mèèín, sàmàìn ndɨŋ njɔ̧̀ nò du nɨ́ɨ́b kɨ́ ndɨ̀ŋniì a dùɓà ɗɨ́ɗɨ̧́ nɨ́m yɨ̀tíí no ɗàwá ɗàà yáá na á.

¹⁰Nɨ́ɨ́b kɨ́ duhó̧ɗóo bɨ ɓíì nɨ̀vɨ́tɨ̀bì ɓe ɨ́r cɔɔ̀ŋ, súm ɓe ə́rɨ́b sàtèé síhé nyiín nyin á. Ɓíhɨ̀b yaá ɓàhá hàrák há̧á̧ hȩ Mèín yi ɓa nɨ́ɨ́b cə́ndɨ̀niì.

¹¹Ɨ́dù Krístù yi goó hȩ nɨ̀gáŋ satɨgàà, gònɨ nɨ́m nànɨ nyɔ̧ɔ̧́ ducɨ nɨ́ kɨ́kkí̧i̧ rè. Njáŋnè ŋgə́ du ə́r satɨgàà noò no ə́nnɨ kɨ́ á ɓà jíri, á ɓà nɨ nyɔ̧ɔ̧́. Nɨ nɨ̀vɨ́tɨ̀b sé yi óŋ njáŋnè kɨ́, kí du ŋgə́ nɨ ókwa ɓe ɗɔ̀ɔ́b du nɨ́ nɨ́m Mèín nyaaŋndé rè yáá na á.

¹²Yésù ya lə́há nɨ́ njáŋnè kɨ́ no gwì mwi̧ ɗóò. Ɓwâ ŋgə́ ya lə́ kɨ́, ŋgə́ ya nɨ́ ɓe tɨ́m jíri kɨ́ kù ɓe kɨ́ mwin ndèèìn lə́wa, yɨɨ́m tɨ́m ŋgə́ nɨ̀mɨrí á ŋgə́ ya geré nɨ́ ru. Ŋgə́ ɨ́ gècùhó̧nàcê nɨ́m ɓə́r mɨ̀cɨ̧̀.

¹³Tɨ́m jírɨ́bí ɓe kɨ́ ndèèìn kùb du mììnànɨ nùb jɨ́nɨ̀m sóò ma sàtɨ̀gɨ̀ ŋgáb,

¹⁴ɗóògɨ̀ kɨ́ Krístùù à? Ŋgə́ nò ɓe nyòm Nyéhè Sarɨ́nne ya kaikɨ́na Mèín síí ŋgə́ nɨ̀mɨrí hȩ satɨgàà. Tɨ́m no kɨ́ ɓa nɨ́m sàtɨ̀kɨ́nànɨ njɔ̧̀ ndɨ̧̀ɨ̧́ nɨ́ɨ́b du kpɔ́knɨ ɗàwáá nɨ́m du ɓe kí rè, àm nɨ́m a ə́nnà Mèín nò du nànɨ mèè à.

¹⁵Àm kɨ́ á Krístù du nò gewona nɨ̀vɨ́tɨ̀b jin nyàŋ hehí ru, àm nùb Mèín ya ɓéré a kwà nyɔ̧ɔ̧́ mɨ̀cɨ̧̀ ŋgə́ ya ɓwáína nùb ók ɓe níì. Á sàmàìn ŋgáb kwa nyɔ̧ɔ̧́ kíì, ɓetí nɨ̀vɨ́tè ya kúú, cwá kɨ́ á cè céínhó̧nɨ nɨ̀vɨ́tɨ̀b kum ŋgáb ya ndɨŋ ɓwâ ŋgáb ya jəŋkomye jin nyàŋ fɨ̀nní no.

¹⁶Ɓwâ kùb tɨin káàtà nɨ́ɨ́b kwíhɨ̀bì rɨ, ɗú nɨ̀mɨr nɨ́m kíì kúyèe á.

¹⁷Ɓetí káàtà nɨ́ɨ́b kwíhɨ̀bì á kùb nànɨ nyòm á nɨ́ɨ́b kwíhɨ̀bì, nɨ́m mwi̧ sé ɓè nɨ̀mɨr nɨ́m kíì kúré. Ŋgə́ ɨ́ dùyè nɨ́ jáŋ, sàmàìn kùb átam nɨ́ɨ́b kwíhɨ̀bì ɗàà.

¹⁸Àm kɨ́ á, dugɨ jin nyàáŋ yàyɨ̀rí, kùb ya kwéíɓwéehá ŋgə́ ɓe tɨ́m á.

¹⁹Ɓetí tíí yàyè, Mòyîs yi fainséé ɓíhɨ̀b lâs mɨ̀kùnín hȩ yi duháce tɨín káàtà ɓíhɨ̀bì noò. Cùr kɨ́ no, ŋgə́ ɨ́ â tɨ́m munɨ́b ndèèìn ɓe kɨ́ mbə̀rèè ŋgə́ ya ténndé, ɓe mvúm. Ŋgə́ ɨ́ â Ìsôb ɓe pɨ́cî júk jandɨ́nne, ŋgə́ ɨ́ sɨ́ndê tɨ́m ndè ɓe mvúm ndè no, ɗà ŋgə́ ɨ́ yà mììwúnɨ káàtà ɓíhɨ̀bì ɓe nùb yi du ɓèé ya.

²⁰Ŋgə́ ɨ́ tà: «Tɨ́m jin nyàáŋ Mèèín ŋgə́ ta nyí jə̀ŋte á kí.»

²¹Mòyîs ɨ́ mììwúɓwéhè tɨ́m ndè njáŋnè ɓe nɨ́ɨ́b satɨgàà ya.

²²Péín ɓíhì, kùb satɨ bɨ nɨ́ɨ́b lâs ɓe tɨ́m á. Kùb ɨ́ dùcè bɨ́ nɨ̀vɨ́tè tɨ́m só mììwúnàwá, sàmàìn cum du tɨ́nne ɗàà.

²³U̧ á yi du ɗúnɨ kùb sàtɨ̀kɨ́ ə́r nàá satɨgàà duɓa nɨ́m fɨ́tîn ɓe kɨ́ ɓɨllɨnne kɨ́. Nɨ́m mwi̧ ə́r nàá satɨgàà kɨ́ nɨ̀mɨr ɓɨllin ku, á ŋgə́ ɗúnànɨ satɨgà duɓa nyɔ̧né.

²⁴Ɓetí Krístù ya nɨ́ lə́wa yɨ́ sarîn nɨ̀vɨ́tɨ̀b ya óŋndé no, kí fɨ́tɨ nɨ yɨ́ sarîn àmɨɨr fɨ́tîn á. Ŋgə́ yi lə́ nɨ́ ɓɨllin á, ŋgə́ á cè nɨ́ Mèèín tíí àm nɨ́m a dù nyɔ̧né.

²⁵Dáín lâs nɨ̀gáŋ satɨgàà á lénɨ yɨ́ sarîn, ɓe tɨ́m nyə̀mì ŋgáré. Ɨ́dù lê Krístù ya lə́ rè, yi nɨ́ ɓe ɨ́r ŋgə́ kaikɨ́ síí ŋgə́ nɨ̀mɨrí gwì ví̧i̧ nɨ sé.

²⁶Ya dùyè u̧, ŋgə́ ma yè yi péé jábɨ́r gwì ví̧i̧ yàá ɓwâ Mèín ya nyaŋhȩ ɗɔ̀bí á. Ɓe tàá àmɨrìí, ŋgə́ túumɗóohá nɨ́ síí gwìí mwi̧, u̧ kɨ́ jíì á cè nɨ́ ŋgóblîn ɓe cáŋhȩ̀ ɗɔ̀bí. Jíìb kɨ́ no á du ɗúnɨ ŋgə́ ákɨ́ cum ɗɔ̀bín ɓe kàré ŋgə́ ɓa kàìkɨ́nɨ síí ŋgə́ nɨ̀mɨrí hȩ satɨgà rè.

²⁷Nɨ̀vɨ́tè du nɨ nò ɓa kúnɨ gwìí mwi̧ ɗóò, cùr kɨ́ no Mèín a ŋgùnné á.

²⁸Nɨ́m mwi̧ ɓwê ɓe Krístù. Gwì mwi̧ ɗóò á Mèín yi nakɨ́ ŋgə́ hȩ satɨgà, àm ákɨ́ cum nɨ̀vɨ́tɨ̀b ví̧ne. Ŋgə́ á túùmcùkwànɨ síí kɨ́ gwì bɨrɨ́bí. Ɨ́dù kí nɨ kɨ́ ákî cumí sé cɨ̀, ducɨ nɨ kɨ́ ɓáte nùb du ŋgə́ móŋkɨ́niì á.