Read Vute Jâk 1 Bible Online

Jâk 1 - Vute bible

Jâk 1

¹Mɨ Jâk, nɨ̀kɨ̧́ɨ̧ Mèín ɓe Yésù Krístù nò du Kékéé. Mɨ nyindií gbàŋ Mèèín lâs dutee ɗɔ̀ɔ́b lè bɨ̂ŋ.

²Mwin yàáb moò péín ə́mní, ɓwâ jábɨ́r nyiín nyin kwa nyínè, óknáam mɨ̀tù;

³ɓetí ə́ə́m nyínè ɨ́ dù nɨ́ ɓwâ kɨ́ gùwá, ɗəəŋnáam ə́ə́m nyínè kɨ́ ɓa dùnɨ ɓe jíhɨ́r á.

⁴Ɨ́dù gə́tɨnáam, ə́əŋnáɓam kpéín ə́ə́m nyínè kɨ́ no, àm nyí a dù ɗɨ́ɗɨ̧́, nɨ́m yɨ̀tíí só ɗàà, njɔ̧̀ nyínè cè nɨ́ ɓe mɨ̀lə́m ɓáŋhîn dùr.

⁵Nɨ́m mwi̧, nɨ̀mwi̧ mvókín nyínè noò ɨ́ tùŋ kɨ̀cáàb, nò kɨ́ ɓwèì ɓe Mèín, Mèín ɓa ŋgə́ nànɨ á; ɓetí Mèín á nànɨ nò lâs ɓe sum mwi̧, ŋgə́ nò kù cànɨ ɗàà.

⁶Ɨ́dù á ɗúnɨ nò kɨ́ ɓwèì ɓe gíí ɨnayâna Mèín ɓa ní nàmènɨ á, nò du nɨ́ ɓe gíí kɨ́ u̧ ɗàwáá á fɨ́tîn ɓe úndi kəŋmbə́r du njóktèèniì.

⁷Nò du u̧ kɨ́ tɨ̀ lə́əmɓa nɨ́ Mèín ɓa ní nànɨ nɨ́m kù á na,

⁸ɗàɓàwá, ɓetí njɔ̧̀ nò kíì á nɨ bɨrɨ́b bɨrɨ́b, ŋgə́ nɨ tùɓànɨ nɨ́m mwi̧ jɨ́k ɗàà.

⁹Nò ə́mní du nò tiri ók mɨ̀tù, ɓetí Mèín ɓa ŋgə́ gèwúnɨ còóm á.

¹⁰Nò ə́mní du nò njɔdìì ókɓwê mɨ̀tù àm Mèín ɓa ŋgə́ gèsénɨ ɗàá rè, ɓetí ŋgə́ tɨ ɓa nɨ kúnɨ hȩ fɨ́láwà u̧ á.

¹¹Mvii fó̧tɨ́, ŋgə́ a wû. Ɓwâ ŋgə́ gbáklé, ŋgə́ a cə́ə̀ŋkî cin fɨ́láwàà. Fɨ́láwà kɨ́ a ɗì, nyààŋ ŋgéé a cɔ̧̂. U̧ á nò njɔdìì ɓa kútéínndénɨ mâá njɔdìì no.

¹²Mɨ̀tù á ɓe nò ə́əŋɓa kpéín ɓe jíhèé jábɨ́r du ŋgə́ kwàniì. Ɓwâ ŋgə́ túmne jíhɨ́r u̧ kɨ́, lɔ̀ɔ́ du mè Mèín ya ɓwáína nùb du ŋgə́ ɗúniì rɨ á nò kɨ́ ɓa kwànɨ ru.

¹³Ɓwâ kɨhɨr kwa nò kù rɨ, ŋgə́ nɨ ɨnayâna Mèín kəhií ní na tà. Ɓetí Mèín nɨ ɓe mɨ̀lə́m ndɨ̧̀ɨ̧́ ɓáŋhɨ́nne ɗàà, nò kù cè nɨ́ sàmàìn njóhɨ Mèín ndɨ̀ŋ ɓáŋhɨ́nne ɗàà.

¹⁴Ɨ́dù kɨhɨr bɨ nɨ nɨ̀vɨ́tè ɓe mɨ̀lə́m ɓáŋhîn no njɔ̧̀ɔ̧ du ŋgə́ njóòrénɨ ndɨ̧̀ɨ̧́ ɓáŋhɨ́nne noò á.

¹⁵Cùr kɨ́ no mɨ̀lə́m ɓáŋhîn kɨ́ a ndɨ̀ŋ nò kɨ́ còmtɨ. Ɓwâ cum ndóoŋndé, a gèrê nò kɨ́ jɨ̀r cwéé.

¹⁶Mwin yàáb moò péín ə́mní, nò kù nɨ nyí mbáŋhɨ̀r.

¹⁷Nɨ́m du nyɔ̧ɔ̧́ duce ɓe kum ɗàà rɨ go nɨ ɓɨllin á, Mèín ɨ́ du nɨ́ nànɨ ru, ŋgə́ nò ya nyaŋhȩ mvii, káŋyerɨ̀b ɓe njumií. Ŋgə́ á há nɨ tɨ́k Mèín mwi̧ kɨ́, ŋgə́ cè nɨ́ hȩ mvii du nɨ́ dùkɨ́nɨ nyɔ̧́ɔ̧̀ ɗàà, ŋgə́ a yà ŋgɨ̀ɨ̀tèènɨ cò̧ rɨ sé.

¹⁸Ɓe ɗûnɨ́m ŋgə́ nɨ̀mɨrí, ŋgə́ naá nɨ́m kìn àmɨrìí du nànɨ mèè, àm nɨ́m a dù tíí kpáín nɨ́ɨ́b lâs ŋgə́ ya nyaaŋndé no.

¹⁹Mwin yàáb ə́mní mo ɗûnɨ́mí, mɨ tànà nyí: gə́əŋnáam tó óknyààŋnɨ nyindí, nyí nɨ àm kə́sə́k gàm, nyí nɨ njù̧ kə́sə́k ô.

²⁰Ɓetí nò du njù̧ú̧ sàmàìn ndɨŋ nɨ́m Mèín ɗúré ɗàà.

²¹Àm kɨ́ á du ɗúnɨ nyí mbɨ́k mɨ̀lə́m ɓáŋhɨ́b nyínè njɔ̧̀ne lâs, nyí a mbɨ̂ cum. Ə́əmnáam ɓe jɨ̧ cúk kìn Mèín kɨ́klé nyínè njɔ̧̀ɔ̧ kɨ́. Kìn kɨ́ á ɓe nyòm ɓátɨ nyínè.

²²Nò kù nɨ lə́mnɨ̀r ŋgə́ a tà kìn Mèèín du nɨ kɨ́ ókhó̧ɗóo ó̧ne á na, nò kɨ́ mbáaŋɓa nɨ síí á. Ndɨŋnáam nɨ́m kìn kɨ́ ta nyí ndɨ̀ŋte, nyí nɨ ó̧o̧ ókhó̧ɗóò.

²³Ɓetí nò ók kìn Mèèín ɨ́ dù ndɨ̀ŋwá nɨ́m kìn kɨ́ ta ndɨ̀ŋte á fɨ́tîn ɓe nò góomndé pə́ə́m pə́cùnɨ ɓɨ̀m noò.

²⁴Ŋgə́ góomcáaŋtɨ́, ŋgə́ a gì. Ɓè mu̧u̧ ŋgə́ a cə̀mlâŋ hȩ ɓɨ̀m noò tɨ duré rɨ.

²⁵Ɨ́dù nò góomnyaaŋɓa ɓíì ɗɨ́ɗɨ̧́ du nɨ́m nànɨ ju ɓe síhé, nò kɨ́ ɨ́ tùjə̀ŋɓà, ŋgə́ ɨ́ dù nɨ́ ó̧o̧ ókhó̧ɗóòwá ŋgə́ a cə̀mláŋcù, ŋgə́ ɨ́ ndɨ̀ŋmèɓà nɨ́m ɓíì kɨ́ taré, Mèín á fàmnɨ nò kɨ́ nɨ́ɨ́b lâs ŋgə́ du ndɨ̀ŋniì no.

²⁶Nò du lə́ə̀mnɨ ní á tùɓànɨ jɨ̀r Mèèín ndɨ, ŋgə́ ɨ́ dù nɨ́ ɓɔ̧ bɨ̀wá, ŋgə́ mbáaŋɓa nɨ síí á, tùú jɨ̀r Mèèín ŋgéé kɨ́ du nɨ sam á.

²⁷Nɨ́m Mèín nò du Táà du pénɨ hȩ tùú jɨ̀r duɓa àmɨrìí á rè: Munɨ́b kwíhɨ̀b ɓe mámkwííb du pénɨ jábɨ́rí, wu a kpɔ̂ ŋgáb. Wu a gə́tè ɓe mɨ̀lə́m ɓáŋhɨ́b ɗɔ̀bɨ́nné fɨ́tɨ wu gèrénɨ cumíì.