Read Vute Jâk 2 Bible Online

Jâk 2 - Vute bible

Jâk 2

¹Mwin yàáb moò péín ə́mní, nyí nùb ə́mne Yésù Krístù nò du Kéké nɨ́mè, nò du ɓe mgbíhɨ́rí, nɨ ɗúwa nyí cà nùb nyí dɨɨmndé ca̧á̧.

²Nɨ́m tàpéyè ɨnè: Yɨ́ nyí nùb ə́mní tɨ ɓáaré, nɨ̀vɨ́tɨ̀b bɨrɨ́b a lə́so. Nɨ̀mwi̧ nò njɔdìì á, ɓe wòrɨ̀b kàtɨ́b mònéè mbə́reé, ɨ́ nyààŋ kàtɨ́b júú só. Nɨ̀mwi̧ kù cè tii kɨ̀ tii, jâblíì.

³Nyí a gàmɓà nò njɔdìì rè ɓe dɨmɨɨr cúk, nyí a tànà ŋgə́ ɨnè: «Tá, gom dùrénɨ hò̧, yɨ́ juu dɨmɨri rè!» Ɨ́dù nyí a tànà nɨ́ nò tiri rè: «Ɓwà ti rè, ə́ŋhɨm còóm ɓè», kɨ́ kù: «Durésom ɗàá sɨrí ɓè.»

⁴Nyí ɨ́ ndɨ̀ŋ u̧, nyí ma caha nɨ nɨ̀vɨ́tɨ̀b ca̧á̧ á ye! Mɨ̀lə́mkáín ɓáŋhɨ́b á nyí njóònɨ nyí pə́tə̀ə̀ŋkɨ́ nɨ̀vɨ́tè.

⁵Mwin yàáb ə́mní mo ɗûnɨ́mí, óknáye: Mèín cahaá nùb tiri ɗɔ̀ɔ́b lè noò àm ŋgáb a kwà njɔdì àmɨrìí ə́ə́m ŋgábè no, ɗà ŋgáb a lê haam ŋgə́ ya ɓwáína nùb ɗú níì no ye!

⁶Ɨ́dù kɨ́ nyínè, nyí á hà pə́wààmkɨ́nɨ nò tiri ye? U̧ kɨ́ nùb du nyí ɓánnɨ a gece nyí ŋgù̧ní rè nùb njɔdìì kɨ́ á.

⁷Nùb kɨ́ ɨ́ duce ɓáàŋkɨ́nɨ ɨ́r Yésùù kùb ya ɓésé nyí ya kwe ru.

⁸Á mè u̧, nyí ɨ́ jə̀ŋ ɓíì du káàtà Mèèín no, du tànɨ: «Ɗúum kùŋ ɓwà woò hȩ wu ɗú síí wu nɨ̀mɨ́rí» rè, nyí ndɨŋ mîn á.

⁹Ɨ́dù nyí ɨ́ cà nùb nyí dɨɨmndé ca̧á̧, ɗəəŋnáam nyí comtɨ́, ɓíì bɨceé nɨ́ nyí.

¹⁰Ɓetí nɨ̀vɨ́tè jəŋgɨ nɨ́ ɓíhɨ̀b ɨna, ŋgə́ ɨ́ ɓèìhô̧ mwi̧, ŋgə́ ɗə̀ə̀ŋtɨ kɨ́b meré lâs duɓwéecɨ bɨ ɓeín á.

¹¹Ɓetí Mèín mwi̧ yi na ɓíì ɨnayâna: «Wu wu mààŋ ndɨ̀ŋ» ndè ɨ́ naɓwée kɨ́ du tànɨ ɨnayâna «Wu wu nɨ̀vɨ́tè kwíhɨ̀r» lè ru. Àm kɨ́ á du, wu dùgɨ̀ wu mààŋ ndɨ̀ŋwá, wu ɨ́ kwíhè nɨ̀vɨ́tè, wu ɓəttɨ́ wú ɓíì.

¹²Àm kɨ́ á mɨ tana nyí, nɨ́ɨ́b nyí du nyìnniì ɓe kɨ́b nyí du ndɨ̀ŋniì lâs, ɗəəŋnáam Mèín kwá ŋgwin nyí ɗóhîn hȩ nyí ya jəŋ ɓíì ɗɨ́ɗɨ̧́ du nɨ́m nànɨ ju ɓe síhé.

¹³Ɓetí nò kwá du kùùŋ mwàm ókwaá, Mèín kwá ŋgwinɓwée ŋgə́ u̧ mwàm ɗàà. Ɨ́dù nò kwá ók kùùŋ mwàmí, ŋgwìn Mèèín kwá nɨ ŋgə́ bɨ̀r.

¹⁴Mwin yàáb moò péín ə́mní, ní ɨ́ du kpɔ́knɨ nɨ̀vɨ́tè ɓè nò kɨ́ ta: «Mɨ á ɓe ə́ə́m», ŋgə́ a dùcè nɨ́ nɨ́m du túùmnɨ ŋgə́ á ɓe ə́ə́m na kɨ́ ndɨ̀ŋ. Kúúŋ ə́ə́m kíì á sàmàìn ɓátɨ ŋgéé à?

¹⁵Nɨ́m tàpéyè ɨnè: Mwin yàá ə́mní kù goó yɨ́ nyínè, ŋgə́ a tà tùŋ júú á ní ndɨ̀ŋnɨ, ní ɓwê ɓe cɔŋ ye lâs ɗàà.

¹⁶Ní ɨ́ duce nyí kpɔ́knɨ ɓè nyí tana nò kɨ́ ɨnè: «Sé yȩȩ́, gɨ̀ mîn, ndoŋnɨr nɨ wu kàmȩ́ȩ́ lə́ər, Mèín nà wu cɔŋ», u̧ kɨ́ nyí nɨ ŋgə́ nàwá nɨ́ɨ́b du ŋgə́ ɗúnàniì?

¹⁷U̧ á duɓwée ɓe ə́ə́m: Nɨ́ɨ́b ndɨ̧ɨ̧́ du túùmnɨ ə́mní ɨ́ dù nɨ́ ɗàà, sé ə́ə́m kɨ̀ ə́ə́m sam, ə́ə́m kɨ́ du nɨ kúri á.

¹⁸Nò kù ɨ́ tànà kùùŋ ɨnè: «Wu á ɓe ə́ə́m, mɨ á cè mɨ́ ndɨ̀ŋnɨ nɨ́m ə́ə́m ɗúré», mɨ ɓa pììnànɨ nò kɨ́ á, mɨ a tà: «Túùmnà mɨ hȩ ə́ə́m wóò fɨ́tɨ dùnɨ ɓè wu du wú ndɨ̀ŋnɨ nɨ́m ə́ə́m kɨ́ ɗúré ɗàwáá, mɨ a túùmnàcè wu ə́ə́m móò nɨ́m ndɨ̧ɨ̧́ moò ya.»

¹⁹Wu ə́əmhaá Mèín á mwi̧ ndúk ye? Àà! Nɨ̀wàtɨ̀b á ə́ə̀mɓwênɨ u̧, ŋgáb a bɨ́ndɨ̀ɓàcéyè ɓe vùù.

²⁰Na ɨ́ duye nɨ́ ɓe sàkɨ̂ɨ́ rè! Wu ɗúú kùb túùmnà wu ɨnayâna nɨ́ɨ́b du túùmnɨ ə́mní ɨ́ dù bɨ́ ɗàà, ə́ə́m kɨ́ du nɨ kúri á na à?

²¹Lə́əmcum tákɨ̀r nɨ́mè Àbɨ̀ràhâm, ní á yi ndɨŋ Mèín áré ŋgə́ kpáín nùb ɗɨ́ɗɨ̧́ɨ̧́ no? Yi du ɓe nɨ́m ŋgə́ yi ndɨŋndé á, ɓwâ ŋgə́ ya á mwin nóò Ìsâk nàkɨ́nɨ Mèín satɨgà noò.

²²Wu péé à: ə́ə́m ŋgéé ɓe nɨ́m ndɨ̧ɨ̧́ ŋgéé yaá bɨ ɗóògènɨ. Nɨ́m ŋgə́ yi ndɨŋ kɨ́ ɨ́ du túùmnɨ ɨnayâna ŋgə́ ə́əmtɨ́ Mèín sum mwi̧ ru.

²³Kí túmnɨ ɨnayâna nɨ́m yi du tɨín káàtà Mèèín no rè fó̧tɨ́ hàrák yáá na á, ɓetí yaá tɨín ɨnè: «Àbɨ̀ràhâm yi səŋtɨ́ gíí ɓe Mèín, ɓe ə́ə́m ŋgə́ ya du ɓe kíí, Mèín ɨ́ â ŋgə́ nò ɗɨ́ɗɨ̧́.» Ŋgə́ ɨ́ sèì ɓwàjìrí Mèèín.

²⁴Nyí pə́haá ye, ɓe nɨ́m nɨ̀vɨ́tè du ndɨ̀ŋniì á Mèín du ŋgə́ ánɨ nò ɗɨ́ɗɨ̧́ ru, nɨ ɓe ə́ə́m ŋgéé sumíì sé ɗóò.

²⁵U̧ á yi ndɨŋɓwée ɓe Ràhâb, nɨ̀gwi sàkèè; ɓe nɨ́m ŋgə́ ya ndɨŋndé á Mèín ya á ŋgə́ nò ɗɨ́ɗɨ̧́ ru, ɓetí ŋgə́ yi gamndéé tɨ́pénɨ̀b Jwîf ɓoò no yó, ŋgə́ ɨ́ yòhè ŋgáb, ɗà ŋgə́ ɨ́ túùmndóŋnà ŋgáb jɨ̀r ji ɓátɨ̀nɨ ŋgáb.

²⁶Nyí péé nò du fìnɨ fìí ɗàwáá du nɨ kúri á. Nɨ́ɨ́b ndɨ̧ɨ̧́ du túùmnɨ ə́mní ɨ́ dù bɨ́ ɗàà, ə́ə́m kɨ́ duɓwée nɨ kúri á.