Read Vute Jâk 3 Bible Online

Jâk 3 - Vute bible

Jâk 3

¹Mwin yàáb moò péín ə́mní, ví̧i̧ bɨ vúm dùyè tá tɔ̀hí na mâ, ɓetí nyí ɗəəŋtɨ́ nɨ́m nùb du tá tɔ̀hí rè, ŋgwìn nɨ́mè ŋgwéné kwá duɓa tamnì a ndôŋ kɨ́ nùb lâs.

²Nɨ́m á ndɨ̀ŋɓànɨ kum ví̧i̧, nyiín nyin cè. Nɨ̀vɨ́tè ɨ́ dù nɨ́ ndɨ̀ŋnɨ kum nyindí ŋgéé ɓɔ̧ne ya ɗàà, nò kɨ́ duɓa nò ɗɨ́ɗɨ̧́ fɨ́tɨ bìnɨ múb síhé á.

³Nɨ́m á kɨ́klénànɨ ɗə̧́nɨ́b kpááŋ ɓɔ̧ɔ̧ àm ŋgáb a jə̀ŋ nɨ́mè, kí ɨ́ du ndɨ̀ŋnɨ nɨ́m a ɗə́ŋhȩ̀ ŋgáb péín lâs lu.

⁴Pə́náɓwéeye kwááì kàtɨ́b jííb, ɓe haám kàtɨ́b ŋgábè, ɓe ŋgɨ́r kàtɨ́b du ŋgáb njókniì, kòr ɗə́ŋhɨ ŋgábè á nɨ mɨ̀ténè, tɨ́kór á cè ŋgáb gènɨ péín lâs ŋgə́ ɗúré.

⁵Nɨ́m mwi̧ á ɓwê ɓe yúum nɨ̀vɨ́tèé ɓɔ̧ne. Ŋgə́ á ŋgóbti, ɨ́dù ŋgə́ á ndɨ̀ŋnɨ mɨ̀tù ɓe nɨ́ɨ́b kàtɨ́b ŋgə́ du ndɨ̀ŋnɨ fó̧ nɨ̀vɨ́tèé ɓɔ̧ne. Páín ti mácíì mwi̧ á hà tòŋkɨ́nɨ ŋgwàr bɨ̂ŋ ye!

⁶Àà, yúum du hȩ wa á, ŋgə́ du hȩ ti nɨ́ɨ́b ɓɨ́bí á. Ŋgə́ duɓwéeɓa síí nɨ̀vɨ́tèé á, ɨ́dù ŋgə́ á nɨ ɓáàŋkɨ́nɨ nɨ̀vɨ́tè. Ju mèè nɨ́mè no, ŋgə́ á nɨ́m tòŋkɨ́nɨ ɓe wa Sátààìn.

⁷Nyèém káhȩ̀né lâs, gààì, nyó̧nɨ́b ɓe hərɨ́b sàmàìn yɔ́k nɨ̀vɨ́tè kɨ́ɨ́niì ɗàà.

⁸Ɨ́dù yúum nɨ dùkɨ́ɓànɨ nyɔ̧́ɔ̧̀ ɗàà ɓe ndɨ̧̀ɨ̧́ ɓáŋhɨ́nne, ŋgə́ du nɨ nɨ́m yɔ́k nɨ́ nɨ̀vɨ́tè kɨ́ɨ́niì á. Ŋgə́ á kwíìnɨ kùb hȩ mvùtù.

⁹Ɓe yúum á nɨ́m du sáktɨ̀nɨ Kéké nò du Tá nɨ́mè ru, ɓe yúum mwi̧ kɨ́ á nɨ́m duɓwée kánnɨ nɨ̀vɨ́tɨ̀b Mèín ya nyaŋhȩ fɨ́tɨ̀ɓà ní nɨ̀mɨrí ru.

¹⁰Ɓɔ̧ famí nɨ ɓɔ̧ káárí dùr. Mwin yàáb moò péín ə́mní, nɨ ɗúwa nyí dù ɓe ɗɨ́m kɨ́.

¹¹Lááŋ mvúmí mwi̧, sàmàìn mvúm nyɔ̧ɔ̧́ ɓe kɨ́ ɓáŋhîn dɨɨɓáhe nóò ɗàà.

¹²Mwin yàáb moò péín ə́mní, sàmàìn yɔ̀ sáá gom píyàà ɗàà, sàmàìn yɔ̀ ndóò gomce nɨ́ sáá ɗàà. Nɨ́m mwi̧ ɓwê ɓe mvúm, sàmàìn kùb túhó̧ mvúm nyɔ̧ɔ̧́ lááŋ mvúm ɓáŋhɨ́nne noò ɗàà.

¹³Ína yáà, nò kù á hò̧ duɓa ɓe kɨ̀cáàb ceí à? Nò kɨ́ ma dù ju ɗɨ́ɗɨ̧́, ŋgə́ a ndɨ̀ŋ nɨ́ɨ́b ɓe jɨ̧ cúk túùmnɨ kɨ̀cáàb no kɨ́ kà.

¹⁴Ɨ́dù, nyí ɨ́ dùɓà ɓe ɓi̧í̧, ɓe mɨ̀lə́m mɨ̀ɓə́hɨ̀rí nyínè njɔ̧̀ɔ̧, nyí nɨ mɨ̀tù ndɨ̀ŋ, nyí cè nɨ́ àm àmɨɨr ɓáàŋkɨ̂r ɓe nyindí nyínè ɓɔ̧ne.

¹⁵Kɨ̀cáàb u̧ kɨ́ nɨ Mèín sé ɨ́ du nànɨ, du nɨ kɨ̀cáàb ɗɔ̀bɨ́nné á, nɨ̀vɨ́tɨ̀b ɨ́ du bɨ́ ɓe kí ru, Sátàìn ɨ́ duce nɨ́ nànɨ ru.

¹⁶Ɓetí yɨ́ ɓi̧í̧ ɓe mɨ̀ɓə́hɨ̀r duré, yɨ́ kɨ́ á ɓwê mɨ̀tehìn ɓe ɓáŋhɨ́b lâs du ru.

¹⁷Ɨ́dù kɨ̀cáàb Mèín naré á nɨ nyin. Nò Mèín na kɨ̀cáàb kíì: tíí yàyè nò kɨ́ nɨ ɓe nɨ́m yɨ̀tíí só ɗàà, ŋgə́ á nànɨ ju ɗóóŋ. Ŋgə́ á kerîn, ŋgə́ nɨ mɨ̀tehìn mvó, ŋgə́ á kwà ɓe nyàŋnjɔ̧̀. Mèín ɓe nyàŋnjɔ̧̀ noò, ŋgə́ á ndɨ̀ŋnɨ nɨ́ɨ́b nyɔ̧ɔ̧́ ŋgə́ cànɨ nɨ̀vɨ́tè ɗàà, ŋgə́ cè yòònɨ ɗɨ́m kù ɗàà.

¹⁸Nùb du dùnɨ ju ɗóóŋ ndɨ, ŋgáb ɨ́ gèréndóŋɓwê ju kɨ́ mvókín nɨ̀vɨ́tɨ̀bì, nɨ́m ŋgáb ndɨŋ kɨ́ ɓa nànɨ gum nyɔ̧ɔ̧́ á.