Read Vute Jâk 4 Bible Online

Jâk 4 - Vute bible

Jâk 4

¹Àm níì á mvókín nyínè no, nyí du su kɨ̀ su, ɓi̧í̧ kɨ̀ ɓi̧í̧? Nɨ́ɨ́b kɨ́ lâs goha sunɨ̀b ɓáŋhɨ́b nyí du ɓe kí nyiín nyin nyínè njɔ̧̀ɔ̧ rè ya á ye!

²Nyí á súnɨ̀nɨ nɨ́m kùbè, ɨ́dù nyí ɓe nyòm kwa nɨ́m kíì ɗàà, ɓwâ kɨ́ ɓè nyí á kə́sə́k kwíìnɨ nɨ̀vɨ́tè. Nyí á kɨ́nɨ nɨ́m kùbè íí ya, ɨ́dù nyí ɓe nyòm kwa nɨ́m kíì ɗàà. Ɓwâ kɨ́ ɓè, mɨ̀ndárè ɓe lɨɨŋ a sə̀m mvókín nyínè no. Nɨ́m nyí ɗúré nyí du nɨ kwànɨ ɗàà àm nyí du nɨ́ ɓe Mèín ɓwèìwáá á.

³Nyí ɨ́ ɓwèì nɨ́m kù ɓe Mèín, sàmàìn ŋgə́ na nyínè ɗàà, ɓetí ɓoré nyínè kɨ́ á nɨ ɓáŋhîn, nyí ɓweiɗóo nɨ ɓe ɨ́r nyí nɨ̀mibi á.

⁴Nùb jɨ̧ só ɗàwá rè, nyí nɨ ɗə̀ə̀ŋwá ɨnayâna nò du nɨ́ ɓwàjìrí ɓe nùb Mèín jə̀ŋnde, ɓəndɨ nɨ Mèín ɓəndîn á na à? Wu ɨ́ dù wú ɓwàjìrí ɓe nùb Mèín jə̀ŋnde, ɗəŋhɨm ɨnayâna wu settɨ́ wú nò Mèèín ɓi̧ní.

⁵Nɨ sam sé káàtà Mèèín ta ɨnè: «Mèín á góòmɓànɨ íí mè ŋgə́ naré nɨ̀vɨ́tèé sóò ya cei.»

⁶Ŋgə́ á nɨ́m túùmnàɓàcéyènɨ nyàŋnjɔ̧̀ noò, ɓetí káàtà Mèèín taá ɨnè: «Mèín á jìnɨ nùb wúte síhé, ɨ́dù nùb gesé síí ɓóò ɗàá, ŋgə́ á ŋgáb túùmnànɨ nyàŋnjɔ̧̀ noò.»

⁷Jəŋnáam Mèín; ɓwâ Sátàìn kəhɨ nyínè, nyináɓam ŋgúúŋ, ŋgə́ ɓa nyí lùnɨ á.

⁸Ŋgɨɨrénáam Mèín no, ŋgə́ ɓa nyí no ŋgɨ̀ɨ̀réɓwênɨ á. Cɨcóòm ndè, mbɨ́knáam cum, nyí nùb mɨ̀lə́m njɔ̧̀ɔ̧ bɨrɨ́b bɨrɨ́b lè, mbɨ́knáam mɨ̀lə́m cumí nyínè kɨ́.

⁹Yínáam só, kɨ́ínáam, tunáam bɨ̀ìmèrè; nyí nɨ sɨ̀r sə̀rɨ̀cɨ̀r, kɨ́ínáam. Nyí cè nɨ́ mɨ̀tù ókcɨ̀r, yínáɓam só ɓe ɨ́r nyí nɨ̀mibi.

¹⁰Mèèín tíí, gesénáam síí ɗàá, ŋgə́ ɓa nyí còóm bɨ̀wúnɨ á.

¹¹Mwin yàáb moò péín ə́mní, mvókín nyínè no, nò kù nɨ ɓe ɨ́r kùùŋ nyìnɓáŋhɨ̀r. Nò nyinɓáŋhȩ ɓe ɨ́r kùùŋ, ŋgə́ yè yom nò kɨ́ kè, ŋgə́ nyinɓáaŋɓwée nɨ ɓe ɨ́r ɓíhì á, ŋgə́ yomɓwéce ɓíì kɨ́ á. Ɓetí wu ɨ́ yòm wú ɓíì, wu cɨ̀ wu nò jəŋ ŋgéé sé, wu ducɨ wu nò yom ŋgéé á.

¹²Jɔ̀ sé Mèín mwi̧ ɨ́ du nànɨ ɓíì, ŋgə́ ɨ́ duce tɨ́ŋgù̧ú̧; ŋgə́ mwi̧ ɨ́ du ɓe nyòm ɓátɨ nɨ̀vɨ́tɨ̀bì, kɨ́ kù ndùùkɨ́nɨ ŋgáb. Wu a cè na, wu nò du yòmnɨ kùŋ woò?

¹³Ɗàrò, óknáye mɨ, nyí nùb du tànɨ ɨnè: «Duú mwáín sé, a cè yȩȩ́, nɨ́m á gìnɨ kwɨ́í lɨ no, nɨ́m a jə̂b ku dáín mwi̧. Nɨ́m ɓa ndɨ̀ŋnɨ mákə́tì ku á, nɨ́m a kwà mòné.»

¹⁴Nyí nɨ ɗə̀ə̀ŋwá mè nyínè yè tɨ̀ du cɨ́m yȩné i̧ kè. Nyí á hȩ ɓɨ̀ ti du gùnɨ mvin ti ŋgób, cùr kɨ́ no a cɔ̧́cù rɨ u̧.

¹⁵Nɨ́m du ɗúnɨ nyí nyìnte á ɨnè: «Ɓè Mèín ə́əmndé, nɨ́m ɨ́ dù ɓe mè, nɨ́m a ndɨ̀ŋ kɨ́ rè, nɨ́m a ndɨ̀ŋ kɨ́ rè.»

¹⁶Ɨ́dù ɗàrò, nyí á ndɨ̀ŋnɨ mɨ̀tù, nyí á ánɨ síí. Kúúŋ mɨ̀tɔ̀k u̧ kíì nɨ mɨ̀tɔ̀k ɓáŋhîn á.

¹⁷Àm kɨ́ á du, nò ɗəəŋɓa nɨ́m nyɔ̧ɔ̧́ tɨ ɗú ŋgə́ ndɨ̀ŋte, ŋgə́ ɨ́ dù nɨ́ ndɨ̀ŋwáá, ŋgə́ comtɨ́ nɨ́.