Read Vute Jâk 5 Bible Online

Jâk 5 - Vute bible

Jâk 5

¹Nyí nùb njɔdìì ɗàrɨ́, óknáye! Ɓe ɨ́r jábɨ́r ɓa nyí féínnànɨ rè, gbəknáam kɨ́ɨ́ŋ ɓe bɨ̀ìmèrè cúk.

²Njɔdɨ̀b nyínè kwá du nɨ́m sam, su kwá taŋkɨ́ júúb nyínè ɗàrɨ́.

³Gôl nyínè ɓe mwèìn nyínè kwá du jɔ̧ kɨ̀ jɔ̧; jɔ̧ kɨ́ ɨ́ ɓa túùmnɨ ɨnayâna nɨ́ɨ́b nyínè kɨ́ lâs nɨ́ɨ́b saai á ru, ŋgə́ ɓa ɓáàŋkɨ́nɨ síí nyínè á, a dù hȩ tɨ yɨ́ wa̧á̧ rɨ u̧. Ɓetí nyí tɨ ɓáacɨ nɨ njɔdɨ̀b kɨ́ jíìb cáŋhɨ̀rí no á.

⁴Nùb nyí tɨ áré nyínè mwaibɨnne, nyí mbáaŋtɨ́ ŋgáb, nyí ŋgáb mwèìn kɨ́ nàwá. Óknáye nyì̧í̧ ŋgábè! Vùùm nùb tɨ éí ə́r nyínè mwaibin kɨ́ lâs, Mèín nò du ɓe nyòme lâs óktɨ́ kɨ́ɨ́ŋ ŋgábè kɨ́.

⁵Ɗɔ̀bín, nyí yaá dùnɨ ju jíri, nyí a taŋce ti. Nyí yaá tàŋnɨ nyí a mwiice haám hȩ ndèìn kùb ɓa ténniì.

⁶Nùb ɓáŋhîn ndɨ̀ŋwáá, nyí yi téíntɨ́ ŋgáb àm ŋgwéé, nyí ɨ́ tà kwíì ŋgáb. Ŋgáb cè bɨ́ nyí ŋgáár pààwá.

⁷Mwin yàáb moò péín ə́mní, dunáam ɓe jíhɨ́r há̧á̧ hȩ Kéké nɨ́mè ɓa gòniì. Pə́náye hȩ tɨ́ɗèìn du ɓe jíhɨ́r ɓwâ ŋgə́ du móŋnɨ nàám ɓa fó̧nɨ no mwa̧né rɨ: ɓwâ nà̧á̧ gusóré, ŋgə́ á ɗòŋnɨ nɨ́m, ŋgə́ a jíhè há̧á̧ hȩ ŋgə́ ɓa gùmniì.

⁸Nyí ɓwê, dunáam ɓe jíhɨ́r, tamnáam njɔ̧̀, ɓetí cùwòó Kéké nɨ́mè ŋgóobtɨ́.

⁹Mwin yàáb moò péín ə́mní, mvókín nyínè no, nò kù nɨ kùùŋ nyindí só nyìn, àm Mèín tɨ̀ ŋgwin nyínè. Ŋgwìn Mèèín á cɨ̀ nɨ kə́sə́k.

¹⁰Mwin yàáb moò péín ə́mní, lə́əmcunáam nɨ́m tɨ́kɨ̀nɨ́b Mèèín yi nyinndé! Á ɗúnɨ jíhɨ́r ŋgáb ya du ɓe kí jábɨ́rí tə̧né dùnà nyí túúm.

¹¹Nɨ́m ta ŋgáb á ɓe mɨ̀tù àm ŋgáb ya ə́əŋɓa bɨ́ kpéín ndè á. Nyí yi óktɨ́ sà̧à̧ jíhɨ́r Jôb yi du ɓe kíí, nyí ɗəəŋceé ní á Mèín yi ndɨŋna ŋgə́ cáŋhɨ̀rí; ɓetí Mèín á ɓà ɓe mwàm, ɓe nyàŋnjɔ̧̀ cei.

¹²Mwin yàáb moò péín ə́mní, nyí nɨ sàáb sàbkɨ́ɓàr: dùgɨ̀ ɓe ɨ́r Mèèín, dùgɨ̀ ɓe ɨ́r ɗɔ̀bí, dùgɨ̀ ɨna yoo. Tàɗóònáhá nɨ «i̧i̧» ɓè duce i̧i̧, kɨ́ kù «éìye» ɓè duce éìye. Ŋgwìn Mèèín tɨ̀ bɨ nɨ́ nyí.

¹³Mvókín nyínè no, nò kù ɨ́ dù jábɨ́rí, ŋgə́ yóŋ Mèín. Nò kù duú mɨ̀tùú, nò kɨ́ ŋgə̀m Mèín.

¹⁴Mvókín nyínè no, nò kù duú yábnɨ, nò kɨ́ ɓé kɨ̀jííb kpáín nùb ə́mní. Nùb kɨ́ ɓa ŋgə́ yóŋnànɨ Mèín á, ŋgáb a tɨ̀nnà ŋgə́ kúrúm ɓe ɨ́r Kékéé.

¹⁵Nùb kɨ́ ɨ́ yôŋ ɓe gíí Mèín ɓa ə́ə̀mnɨ mɨ̀yú̧ vúmè kíì, nɨ̀yə́b ɓa wáàŋnɨ á. Duú ɓè ŋgə́ ya comndé, Mèín a tɨ́ínà ŋgə́ cum kɨ́.

¹⁶Mvókín nyínè no, viinanáam kùb cum nyínè. Dunáam ju, nò rè yóŋnaá kùùŋ Mèín, nò rè a yóŋnàcè kùùŋ, àm yáb nyínè a wáŋnèé. Nò du ɗɨ́ɗɨ̧́ɨ̧́, mɨ̀yú̧ ŋgə́ yóŋndé á ɓe nyòme cei.

¹⁷Èlî yɨɨ́mɓwê nɨ̀vɨ́tè hȩ nɨ́m á, ŋgə́ yi yóŋtɨ́ Mèín ɓe mɨ̀súktéín àm nà̧á̧ tɨ̀ naré, nà̧á̧ ɨ́ dùmècè nàwá há̧á̧ dáín taarɨ́b ɨ́ gbɨ́ktèìn,

¹⁸cùr kɨ́ no, ŋgə́ ɨ́ yóŋcù Mèín ɗà nà̧á̧ ɨ́ gùcùsówò. Nɨ́ɨ́b ɗo̧ó̧ ɨ́ òndɨ̀tèècù.

¹⁹Mwin yàáb moò péín ə́mní, nɨ̀mwi̧ mvókín nyínè no ɨ́ mbɨ̂ jɨ̀r àmɨrìí, ɗà nò kù ɨ́ gècùrówò ŋgə́,

²⁰ɗəəŋnáɓam, cɨcóm tɨ du gìnɨ jɨ̀r ɓáŋhɨ́nne noò, nò gecuró ŋgə́ jɨ̀r àmɨrìí ɓa ɓátɨ̀nɨ mè cɨcóm kíì á, ŋgə́ a ndɨ̀ŋkwà cum nò kíì ví̧i̧ Mèín tɨ́íkíi.