Read Vute 1 Píyéèr 1 Bible Online

1 Píyéèr 1 - Vute bible

1 Píyéèr 1

¹Mɨ Piyéèr, nò tómé Yésù Krístùù, mɨ ɨ́ tɨin káàtà rè ru. Mɨ tɨinna nùb Mèín yi caré á. Nyí nùb kùb ya juhó̧kɨ́ ti̧í̧, nyí ɨ́ gì dùtèènɨ ɗɔ̀ɔ́b Póòŋ, ɗɔ̀ɔ́b Gàlàtíì, ɗɔ̀ɔ́b Kàpàdóòs, ɗɔ̀ɔ́b Àsíì ɓe ɗɔ̀ɔ́b Bìtìníì no rɨ.

²Càá kùb yi ca nyí kɨ́ á ɗóhîn ɓe ɓwáár Mèín nò du Táà yi ɓwáíkɨ́yaye tíí, nyí ókce nɨ́ ɓe ŋgə́ á, ɓe nyòm Nyéhè noò, àm nyí jə̀ŋ Yésù Krístù, nyí a kwà tɨ́ɨ́r ɓe cwá ŋgə́ ya kú hȩ satɨgà rè á. Mɨ yóóŋ Mèín ŋgə́ nàɓà nyí faám ɓe ju ɗóóŋ.

³Nɨ́m ŋgə̀mná Mèín, ŋgə́ nò du Tá Yésù Krístù nò du Kéké nɨ́mè! Ɓe nyàŋnjɔ̧̀ kàm ŋgéé, ŋgə́ naá nɨ́m mè heé ɓe sə̀mèé ŋgə́ səəmcuhó̧ Yésù Krístù mvókín nɨ̀kwíbí rè, kí á na nɨ́m gíí du yə̀ŋniì ru.

⁴Àm kɨ́ á nɨ́m du sàmàìn móŋ gàmnɨ nyɔ̧ɔ̧́ Mèín gə́tɨkɨ́na nùb ók ɓe ŋgéé ru. Nyɔ̧ɔ̧́ kɨ́ nɨ ɓáàŋnɨ ɓáŋhîn ɗàà, sàmàìn jɨ́nɨ̀m sa yáà ɗàà, nyààŋ noò cè nɨ́ cɔ̧́nɨ ɗàà. Nyí nùb nyòm Mèèín du gə́tɨ̀nɨ ɗòŋwòó ə́ə́m nyínè njɔ̧̀ne ya kwe, ŋgə́ á nyí gə́tɨ̀kɨ́nànɨ nyɔ̧ɔ̧́ kɨ́ ɓɨllin, há̧á̧ hȩ ŋgə́ ɓa nyí ɓátɨ̀niì. Ɓə́r kɨ́, kùb kwá pə́ jíìb cáŋhɨ̀rí no.

⁶Àm kɨ́ á nyí du ókɓànɨ mɨ̀tù, dùgɨ̀ hȩ kɨhɨr nyiín nyin ɓa nyí kwàtèèhóyènɨ mvókín ti ŋgóbí.

⁷Kɨhɨr kɨ́ du àm pə́ ɓè nyí du ɓe ə́ə́m àmɨrìí á. Gôl du nɨ́m sam á, ɨ́dù kùb á ŋgə́ kɨ́klénɨ wa̧á̧, pénɨ ɓè ŋgə́ du nyɔ̧né, ɗóògɨ̀ ə́ə́m nyínè nɨ́m du nɨ́m jíri à? Kùb á ŋgə́ kə̀hɨ̀nɨ, pénɨ ɓè ŋgə́ du tamnìí. U̧ á kùb ɓa nyí ŋgə̀mnɨ, kùb a mgbíhè nyí, kùb a dɨ̀mè nyí ɓwâ Yésù Krístù ɓa cùwòniì.

⁸Nyí á ŋgə́ ɗúnɨ, dùgɨ̀ hȩ nyí du ŋgə́ pə́kɨ́yèwáá, nyí á ŋgə́ ə́ə̀mnɨ, dùgɨ̀ hȩ nyí du ŋgə́ pénɨ ɗàrò ɗàwáá. Àm kɨ́ á nyí duɓa ɓe mɨ̀tɔ̀k kàm jíri sumí, mɨ̀tɔ̀k kɨ́ á ɓà jíri sàmàìn kùb nyinndé ɗàà.

⁹Ɓetí, ŋgwé ə́mní nyínè kɨ́kgií, nyí ɓáttɨ́.

¹⁰Tɨ́kɨ̀nɨ́b Mèèín yi máɓatɨ́ ɗə̀ə̀ŋnɨ nɨ́ɨ́b ví̧i̧ ɓe ɨ́r ɓə́r kíì, ŋgáb yi takɨ́yayeé àm nyər Mèín ɓa nyí nànɨ kɨ́.

¹¹Ŋgáb yaá máhánɨ ɗə̀ə̀ŋnɨ ɓwâ ŋge á nɨ́m Nyéhè Krístùù ta kɨ́ ɓa ndɨ̀ŋnɨ, ɨna á cè nɨ́m kɨ́ ɓa ndɨ̀ŋnɨ. Nyéhè kɨ́ ya takɨ́yayeé àm jábɨ́r Krístù ɓa péniì, ɓe mgbíí ŋgə́ ɓa kwàniì.

¹²Mèín ya viinaá tɨ́kɨ̀nɨ́b noò ɨnayâna Kìn ŋgáb du gènɨ kɨ́ nɨ kɨ́ ŋgáb nɨ̀mibi sé, du nɨ kɨ́ nyínè á. Ɗàrò nùb ta Kìn Nyɔ̧né tanaceé nyí Kìn kɨ́, ŋgáb nyin ɓe nyòm Nyéhè Sarîn Mèín tómsóworé á. Dùgallɨb Mèèín nɨ̀miib á cè ɗúnɨ ɗə̀ə̀ŋnɨ Kìn kɨ́.

¹³Àm kɨ́ á du ɗúnɨ kɨ̀cáàb nyínè dukɨ́ jáŋ, nyí nɨ́m kù lə́ə̀mndôŋ. Səŋnáam gíí ɓe nyər Mèín ɓa nyí nànɨ ye Yésù Krístù ɓa cùwòniì.

¹⁴Jəŋnáam Mèín, mɨ̀lə́mkáín ɓáŋhɨ́b nyí ya dukom ɓe kí tíí ɓwâ nyí yi duye nɨ́m kù ɗə̀ə̀ŋwá rɨ, nyí nɨ ɓe kí dùcɨ̀r.

¹⁵Dùnábɨ̂ŋ cum só ɗàà. Mèín nò ya ɓé nyínè á nɨ́ u̧ cum só ɗàà.

¹⁶Ɓetí á tɨín káàtà Mèèín no ɨnè: «Mɨ mɨ cum só ɗàà, dunáɓwéecéem u̧ cum só ɗàà.»

¹⁷Mèín nò du ŋgùnnɨ nùb lâs hàrák, ɗóhîn ɓe nɨ́m nɨ̀mwi̧ ya ndɨŋndé, ɓwâ nyí du ŋgə́ yóŋniì nyí á ŋgə́ ɓénɨ Tá, àm kɨ́ a du ɗúnɨ jíìb menaye nyí ɗɔ̀bín ndè, nyí túmnɨ̀ jɨ̧ nyí du ŋgə́ jə̀ŋniì ɗɨ́m nyínè no.

¹⁸Ɗɨ́m juu mí nó ɗàà tákɨ̀rɨ́b nyínè ya tɔɔkɨ́sona nyí rɨ, nyí ɗəəŋtɨ́ ɓe ní á kùb yi céínhó̧ nyí ju kɨ́ no. Yi nɨ́ ɓe nɨ́ɨ́b nyààŋ ɓoò du cɔ̧́nɨ cɔ̧́ɔ̧, hȩ gôl sé.

¹⁹Kùb yi céín bɨ́ nyí ɓe tɨ́m Krístùù nò ya kú hȩ mwin ndèɗúú,[1] ɗíím só ɗàà rɨ á.

²⁰Mèín ma nɨ́ɨ́b lâs nyààŋɓàyèwá, ŋgə́ yi cakɨ́cií nɨ́ Krístù. Ŋgə́ túumnaceé nyí ŋgə́ ɗàrò, jíìb cáŋhɨ̀rí rè no, àm nyí a ô mɨ́nne.

²¹Ɓe ɨ́r Krístùù á nyí du ə́ə̀mnɨ Mèín nò ya səəmcuhó̧ ŋgə́ mvókín nɨ̀kwíbí, ɨ́ nà ŋgə́ mgbíhɨ́rí ru. Àm kɨ́ á ə́ə́m nyínè ɓe gíí nyínè lâs du Mèèín ya ru.

²²Jə̧̀ə̧́ nyí jəŋ Kìn àmɨɨr Mèèín á nyí yi kwa tɨ́ɨ́r, àm nyí a dù ɓe ɗûnɨ́m mɨr mvókín mwin yàá ɓe kùbè. Dunáam ɓe ɗûnɨ́m mvókín nyínè no sum mwi̧.

²³Kìn Mèèín ndɨŋtɨ́ nyí kwàcù mè heé. Kìn kɨ́ nɨ hȩ sɨ̀ɨ̀ŋ nɨ́m ɗo̧né du kúnɨ kú̧u̧ rɨ ɗàà; ŋgə́ á nɨ ɓwâ lâs jáŋ.

²⁴Hȩ káàtà Mèèín du wáànɨ ɨnè rɨ: «Nɨ̀vɨ́tɨ̀b lâs á bɨ́ hȩ ɓwìn, mgbíí ŋgábè á cè hȩ fɨ́láwààb. Ɓwìn cə́ŋtɨ́, fɨ́láwà a ɗì,

²⁵ɨ́dù Kìn Kékéé á nɨ́ dùnɨ tɨ́k kɨ̀ tɨ́k.» Kìn kɨ́ du Kìn Nyɔ̧ɔ̧́ kùb ɓéena nyí rè á.