Read Vute 1 Píyéèr 2 Bible Online

1 Píyéèr 2 - Vute bible

1 Píyéèr 2

¹Hȩ dùnɨ u̧nèé, mbɨ́knáam ɓáŋnjɔ̧̀, kààŋ, yòhèé ɗíímí, dùgɨ̀ sunɨ̀b ɓe tàtùùb.

²Dunáam hȩ mucutɨ́b nánááb: ɗúnáɓam ma̧à̧ jɨ́nɨ̀m no ɗàwáá Kìn Nyɔ̧ɔ̧́ du nàniì, àm ɓwâ nyí ɓa mà̧à̧niì, nyí a hàm, nyí a kwàɓwéhè ɓə́r.

³Káàtà Mèèín á tànɨ ɨnè: «Nyí péé hȩ Kéké du nyɔ̧né.»

⁴Ŋgɨɨrénáam Kéké nó, ŋgə́ nò du hȩ sìn dúhéé du nànɨ mèè nɨ̀vɨ́tɨ̀b ya leehó̧kɨ́ gə́nȩ̀ȩ́, ɨ́dù Mèín ɨ́ cà àm ŋgə́ yi pə́ nyɔ̧né.

⁵Ŋgɨɨrénáam, àm kùb a áɓwéhè nyí hȩ sìn dúhéé du ɓe mèè, óŋnɨ Dúú Mèèín ɓe kí. Yó ku, nyí ɓa dùnɨ kúùŋ nùb sarɨ́b du nànɨ satɨgà Nyéhè Mèèín ɗúré, satɨgà nyaŋ Mèín sumí ɓe ɨ́r Yésù Krístùù á.

⁶Ɓetí káàtà Mèèín wáatɨ́ ɨnè: «Mɨ caá sìn dúhéé nyɔ̧ɔ̧́ mɨ ɓa lóŋnɨ sìn kɨ́ hȩ jù̧ú̧ Sìyôŋ á; nò əhɨ sìn kɨ́ yaà nɨ njɔ̧̀ lòm.»

⁷Kɨ́ nyí nùb du ə́ə̀mniì, sìn kɨ́ duna nyí nɨ́m nyɔ̧ɔ̧́ á, ɨ́dù kɨ́ nùb du ə́ə̀mnɨ ɗàwáá, «Sɨ̀ne nùb óŋ dúhéé ya leehó̧kɨ́ gə́nȩ̀né á yi sei jù̧ú̧ dúhéé ru».

⁸Á kwà yɨ́ kù tɨín ɨnè: «Sɨ̀ìn kɨ́ ɨ́ du ndɨ̀ŋnɨ nɨ̀vɨ́tɨ̀b mátɨ̀ gusɨ̀r lu, ŋgə́ a ndɨ̀ŋɓwéhè ŋgáb gùu.» Ŋgáb mátɨ gusɨ̀r àm ŋgáb yi mvú ə́ə̀mnɨ Kìn Mèèín á, jɨ̀ ya duce nɨ́ ta̧á̧ ɓe ɨ́r ŋgábè á.

⁹Ɨ́dù kɨ́ nyínè, nyí du nɨ gbàŋ Mèín yi ca nɨ́ ca̧né á, nyí duna nɨ mvèìn jíri nùb na satɨgàà á, ti sarîn, gbàŋ du nɨ́ óknɨ ɓe Mèèín. Kùb yi ca nyí àm nyí a ɓéhè nɨ́ɨ́b nyɔ̧ɔ̧́ Mèín nò ya ɓéhó̧kɨ́ nyí sɨ́mnɨ̀rí gèhó̧nɨ mwa kàm noò no yi ndɨŋndé á.

¹⁰Ɓwâ yi tíí, nyí yi nɨ́ gbàŋ Mèèín sé, ɨ́dù ɗàrò, nyí gbàŋ Mèèín á. Ɓwâ yi tíí, yi nɨ́ sàmàìn Mèín ók nyí mwàmí ɗàà, ɨ́dù ɗàrò, ŋgə́ ə́əmnatɨ́ nyí mwàm noò.

¹¹Ɓwàjììb moò, nyí nɨ nɨ̀gwííb á, nyí ndóŋce nɨ́ ndó̧o̧ á, mɨ tànà nyí: Gə́tɨnáam ɓe mɨ̀lə́mkáín nɨ̀vɨ́tɨ̀bì du lèènɨ su ɓe nyéhè nɨ̀vɨ́tèé.

¹²Dunáam ɓe ɗɨ́m nyɔ̧ɔ̧́ mvókín nùb Mèín mɨr ɗə̀ə̀ŋwáá, u̧ á ɓa ndɨ̀ŋnɨ, ŋgáb tàgɨ̀ nyí nùb ɓáŋhɨ́b á yoo, ə́rɨ́b nyɔ̧ɔ̧́ nyí yi ə́llé a njóhè ŋgáb, ŋgáb mgbíì Mèín ye ŋgù̧ní.

¹³Ɓe ɨ́r Kékéé, jəŋnáam nùb du nyí kɨ́ɨ́niì, jəŋnáam mvèìn kàm jíri nò du ɓe nyòme lâs,

¹⁴dùgɨ̀ gómnààb ŋgə́ tómwo gò jóktɨ̀nɨ nùb ndɨŋ ɓáŋhɨ́nne, a mgbíìcè nùb ndɨŋ nyɔ̧né.

¹⁵Nɨ́m Mèín ɗúré á rè: nùb kɨ̀cáàb ɗàwá du bɨ́ nɨ́m kù ɗə̀ə̀ŋwá rɨ, nyí ɗèìn ŋgáb ɓɔ̧ ɓe nɨ́ɨ́b nyɔ̧ɔ̧́ nyí du ndɨ̀ŋniì.

¹⁶Dunáam mvòŋsòòŋ, ɨ́dù nɨ ɗúwa ju mvòŋsòòŋ kɨ́ dù kɨ́ yohɨ ɗɨ́m ɓáŋhɨ́nne. Dunáam ɓe ɗɨ́m nùb éína Mèèín.

¹⁷Jəŋnáam nùb lâs, ɗúnáam mwin yàá bɨ ə́mní, dɨɨmnáam Mèín, jəŋnáam mvèìn kàm jíri.

¹⁸Mbɔ́klɨ́b, jəŋnáɓam táàb nyínè mbɔ́klí. Nyí nɨ nùb njɔ̧̀ nyɔ̧ɔ̧́, duce kə́sə́k nyí kpɔ́knɨ rɨ jə̀ŋhó̧ɗóhɨ̀r, jəŋnáɓwéhɨm nùb duɓa ɓí rɨ́.

¹⁹Ɓetí jábɨ́r nyí jíhɨ ŋgwé yá ɗàà àm nyí jəŋ Mèèín ndɨ duna nyí faám á.

²⁰Ɓwâ kùb túmnɨ nyí jábɨ́r àm nyí tɨ ndɨŋ kumí rɨ, jábɨ́r nyí ɓa dùnɨ ɓe kíí du nɨ sam á. Ɨ́dù kùb ɨ́ túmnè nyí jábɨ́r àm nyí tɨ ndɨŋ mɨ́nne, mɨ̀súktéín nyí du ɓe kí jábɨ́r kɨ́ no kɨ́ á Mèèín sumí nyɔ̧ɔ̧́.

²¹Nɨ́m Mèín yi ɓéna nyínè á kí, ɓetí Krístù nɨ̀mɨ́r ya péé jábɨ́r ɓe ɨ́r nyínè, ŋgə́ ɨ́ mbɨ́kkɨ́sònà nyí túúm, àm nyí a tù guur gùrí noò.

²²Ŋgə́ ya nɨ́ cum kù ndɨ̀ŋwá, kùb cè bɨ́ ókkɨ́yèwá kààŋ kù no ɓɔ̧ɔ̧ fó̧nɨ.

²³Ɓwâ kùb ya andɨ ŋgéé, ŋgə́ ya nɨ́ nyèìn kɨ́ ɓáàbwá, ɓwâ kùb yi du ŋgə́ jábɨ́r túùmniì, ŋgə́ ya nɨ́ pààŋwá. Ɨ́dù ŋgə́ yi mbɨ́knaá nɨ́ɨ́b lâs Mèín nò du ŋgùnnɨ ŋgwìn ɗɨ́ɗɨ̧́ɨ̧́.

²⁴Krístù nɨ̀mɨ́r, ŋgə́ wúínɨ bɨ̧̀ɨ̧́, ŋgə́ yi hainwútɨ́ cum nɨ́mè lâs só, àm nɨ́m mbɨ́k ju cumí, nɨ́m a dù hȩ Mèín ɗúré. Ɓe jábɨ́r ŋgə́ yi pə́ré á nyí kwa ɓə́r lu.

²⁵Ɓetí nyí yaá hȩ ndèɗúúb nja̧á̧, ɨ́dù ɗàrò, kùb gecuwotɨ́ nyí yɨ́ nò du nyí gə́tɨ̀niì.