Read Vute 1 Píyéèr 3 Bible Online

1 Píyéèr 3 - Vute bible

1 Píyéèr 3

¹Nɨ̀gub, jəŋnáɓwéhɨm ŋgwásɨ̀b nyínè, àm mvókín ŋgábè no, nùb du ə́ə̀mnɨ Kìn Nyɔ̧ɔ̧́ ɗàwáá a ə́mnè Kìn kɨ́. Tɨ̀ nɨ nyí ɗúnàɓàcéyèwá wòré ɓɔ̧ɔ̧, ɗɨ́m nyí du ɓe kíí ɨ́ ɓa nɨ́ ndɨ̀ŋnɨ ŋgáb ə́ə̀m Kìn kɨ́ ru,

²Ɓetí ŋgáb ɓa pénɨ jɨ̧ nyí du ɓe kí ɗɨ́m nyínè no, nɨ́m yɨ̀tíí só ɗàà rɨ á.

³Nyààŋ nyínè nɨ kɨ́ kùb pə́ laŋtɨ̧né dùr; hȩ bɨ́rèé ŋgwé nyàŋgáá, nɨ́ɨ́b lééb nyàŋgáá du ɓe gôl lɨ, dùgɨ̀ júúb kàtɨ́b nyàŋgáá.

⁴Ɗú nɨ́ nyààŋ nyínè dù kɨ́ fó̧ɓa sumíì á, nyààŋ du ɓáàŋnɨ ɓáŋhîn ɗàwáá, nyààŋ ɗɨ́m kerɨ́nne duɓa ɓe dɨmɨɨr Mèèín tíí.

⁵U̧ á nɨ̀gub jɨ̧ɨ̧́ ɓwâ yi tíí yi səŋkom gíí ɓe Mèín ndɨ́ yi túumkom bɨ́ nyààŋ ŋgábè ɓe jə̧̀ə̧́ ŋgáb ya jəŋkom bɨ́ ŋgwásɨ̀b ŋgábè.

⁶U̧ á Sárà yi jəŋkom Àbɨ̀ràhâm, ŋgə́ a ɓéce ŋgə́ «Kéké», ɗàrò nyí munɨ́b Sárà kíì á, ɓè nyí du ndɨ̀ŋnɨ mîn, nyí a dùcè óknɨ vùù ɗàà ɓwâ kùb mwa̧a̧na nyí íhé.

⁷Nyí ɓwêcé, ŋgwásɨ̀b, dunáam ɓe gub nyínè, ɨ́dù nyí a ɗə̀ŋhȩ̀ ɨnayâna nɨ̀gwi nɨ nò kùb ɗə̧ə̧́ ɗə̧né á. Jəŋnáam ŋgáb, ɓetí nyər mèè Mèín du nyí nànɨ rɨ, ɗú nyíne ŋgáb kwàɓáà nyər kɨ́ cúk á. Ndɨŋnáam u̧ àm nɨ́m kù tɨ̀ jábɨ nyí mɨ̀yú̧ nyínè noò.

⁸Nɨ́m mɨ taré á ɨnayâna kɨ̀cáàb nyínè ɓe mɨ̀lə́m nyínè lâs dù nɨ́m mwi̧; dunáam ɓe ɗûnɨ́m mvókín nyínè no hȩ mwin yàáb ɓe kùb, dunáam ɓe nyàŋ njɔ̧̀, nyí a dù ɓe jɨ̧ mvókín nyínè no.

⁹Nyí nɨ ɓáŋhîn kùb ndɨŋ nyínè ɓáábɨ̀r, dùgɨ̀ nyèìn, tànábɨ̂ŋ: «Mèín fàm wu.» Ɓetí faám á Mèín yi ɓwáí nyí nànɨ nyí nɨ̀miib, ɓwâ ŋgə́ yi ɓé nyínè.

¹⁰Hȩ du tɨin káàtà Mèèín no ɨnè rɨ: «Nò du ɗúnɨ dùnɨ ju nyɔ̧ɔ̧́ ŋgə́ a kwà mèè, á ɗúnɨ ŋgə́ mbɨ́k tàtùùb ɓe kààŋ.

¹¹Á ɗúnɨ ŋgə́ mbɨ́k ndɨ̧̀ɨ̧́ ɓáŋhɨ́nne, ŋgə́ a ndɨ̀ŋ nyɔ̧ɔ̧́, ŋgə́ a kɨ́klê mɨ̀súktéín ɓe mâ̧á̧ ju ɗóóŋ.

¹²Ɓetí Kéké á góòmnɨ íí nùb du ŋgə́ jə̀ŋniì ya, ŋgə́ á kə́sə́k gàmnɨ mɨ̀yú̧ ŋgábè. Ɨ́dù ŋgə́ á jìnɨ nùb du ndɨ̀ŋnɨ ɓáŋhɨ́nne.»

¹³Nyí ɨ́ dùɓàhâ ɓe ɗɨ́m ndɨ̧̀ɨ̧́ nyɔ̧né, nò ɓa nyí ndɨ̀ŋnɨ ɓáŋhɨ́nne nɨ ɗàà.

¹⁴Tàgɨ̀ nyí pə́ jábɨ́r àm nyí du ndɨ̀ŋnɨ nyɔ̧né yoo, nyí á ɓe mɨ̀tù. Nyí nɨ vùù nɨ̀vɨ́tɨ̀bì lùr, nyí cè nɨ́ njɔ̧̀ lòm.

¹⁵Ɨ́dù nyínè njɔ̧̀ɔ̧, ɗəəŋnáam ɨnayâna Krístù á járkɨ́ták, ŋgə́ ɨ́ du Kéké ru. Dunáam kə́sə́k pììnànɨ nùb lâs ɓa nyí fɔ́nɨ àm gíí du nyínè njɔ̧̀ne.

¹⁶Ɨ́dù nyí a nyìn còò ɓe jɨ̧ cúk. Dunáam njɔ̧̀ ɗàá fàb, àm ɓwâ kùb du nyìnɓáàŋnɨ ɓe ɨ́r ɗɨ́m juu nyɔ̧ɔ̧́ nyínè, àm nyí du nɨ̀fuùb Krístùù rɨ, sə̀ré a bɨ̀cù nùb kɨ́ ɓe nyindí ŋgábè ɓɔ̧ne.

¹⁷Ɓetí á mîn nɨ̀vɨ́tè pə́bɨ̂ŋ jábɨ́r àm wu tɨ ndɨŋ mɨ́nne, ɓè Mèín ɗú u̧nèé, ɨ́ ndôŋ kɨ́ wu pə́ jábɨ́r àm wu tɨ ndɨŋ ɓáŋhɨ́nne.

¹⁸Ɓetí Krístù ŋgə́ nɨ̀mɨ́r yi kúú gwìí mwi̧ ɓe ɨ́r cum nɨ̀vɨ́tɨ̀bì, ŋgə́ nò yi du nyɔ̧né, ŋgə́ kúú ɓe ɨ́r nùb ɓáŋhɨ́bí, àm nyí a nyàŋcù ɓe Mèèín. Kùb ya kwíhií ŋgə́ kɨ́ ŋgə́ yi du nɨ̀vɨ́tèé, ɨ́dù péín Nyéhè Sarɨ́nne, ŋgə́ ɨ́ kwàcù mè.

¹⁹Ɓe nyòm Nyéhè Sarîn kíì, ŋgə́ yi gɨɓacéyeé tànànɨ nyéhɨ̀b Kìn Mèèín.

²⁰Kí ta nyéhɨ̀b nùb yi jaaŋkɨ́ Mèín ɓwâ kù, ŋgə́ a móŋkɨ́ce ɓe jíhɨ́r jíìb Nòwê yi du Árɨ̀cə̀ noò sènniì á. Nɨ̀vɨ́tɨ̀b ŋgób yi léé Árɨ̀cə̀ kɨ́ no, ɗà mvúm ɨ́ ɓátè ŋgáb. Ŋgáb yaá lâs sə́r.

²¹Mvúm kɨ́ du hȩ mvúm kɔ ə́mní á, ɓe mvúm kɨ́ á cè Mèín du nyí ɓátɨ̀nɨ ru. Kɔ ə́mní kɨ́ nɨ tàwá sena nyí jɨ́nɨ̀m nyínè sóò á, ɨ́dù du nɨ ɓwáínàá Mèín ɓwáár ɓe njɔ̧̀ ɗàá fàb á. Mèín á nyí ɓátɨ̀nɨ ɓe sə̀ə̀mcùhô̧ sèrɨ̀nnè Yésù Krístùù,

²²ŋgə́ nò yi wɨ́í ɓɨllin, duce du̧ú̧ Mèèín ŋgáár lame, yɨ́ ŋgə́ du ŋgáŋnɨ dùgallɨb Mèèín ɓe nyòom ɓɨllɨnne lâs ya kwe.