Read Vute 1 Píyéèr 4 Bible Online

1 Píyéèr 4 - Vute bible

1 Píyéèr 4

¹Hȩ Krístù ya jíhe jábɨ́r ɗɔ̀bɨ́nné, dùnáɓwê ɓe mɨ̀lə́m jíhèé jábɨ́rí kɨ́ u̧, ɓetí nò jíhe jábɨ́rí nɨ mbɔ́ɔ́ cumí sé cɨ̀. Mɨ̀lə́m jíhèé jábɨ́rí kɨ́ dùnà nyí hȩ páín suu.

²Yàrénɨ ɗàrò, jíìb menaye nyí ɗɔ̀bín ndè, dunáam ju hȩ Mèín ɗúré, nyí nɨ hȩ nyí nɨ̀miib ɗúré dùr.

³Nyí duɓacií ju hȩ nùb Mèín mɨr ɗə̀ə̀ŋwáá cei, kí ta: ndɨ̀ŋsòó nɨ́ɨ́b ɗàá ku u̧nèé, ju ɓi̧ní, mɨɨr, sunɨ̀b, tɔ̧̀ ɓe jə̧̀ə̧́ mèín nyaŋhɨ́bí duɓa nɨ́ nɨ́m ɓáŋhɨ́nne.

⁴Ɗàrò, nùb Mèín mɨr ɗə̀ə̀ŋwáá á bɨ́ gbɨ̀ɨ̀ŋnɨ àm nyíne ŋgáb ducɨ bɨ́ kpáné ju ɓáŋhîn kɨ́ no cúk ɗàcɨ̀wáá, ŋgáb a yà nyí àndɨ̀nɨ.

⁵Ɨ́dù ŋgáb kwá tana Mèín nò dukɨ́cɨ nɨ́ kə́sə́k ŋgùnnɨ nùb jáŋ ɓe nɨ̀kwíbí àm níì á ŋgáb ya ndɨŋ u̧.

⁶Àm kɨ́ á kùb yi tanaɓwée nɨ̀kwííb Kìn Nyɔ̧ɔ̧́ ru, àm ŋgwìn Mèín yi ŋgwin ŋgáb, ŋgáb acè jáŋ hȩ nùb lâs, a ndɨ̀ŋ ɗàrò ŋgáb dù ju hȩ Mèín ɗúré, ɓe nyòm Nyéhè Sarɨ́nne.

⁷Ɗɔ̀ɔ́b ŋgóobtɨ́ cɔ̧́nɨ. Dunáam ɓe kɨ̀cáàb, kɨ̀cáàb nyínè dùkɨ́ jáŋ àm nyí a yôŋ Mèèín.

⁸Tíí yàɓàyè, dunáɓam ɓe ɗûnɨ́m mvókín nyínè no, ɓetí ɗûnɨ́m á ndɨ̀ŋnɨ nɨ̀vɨ́tè tɨ́í kùŋ mwin yàá.

⁹Nyí nɨ kùŋ mwin yàá yó ɓe njù̧ gàmndə̂r.

¹⁰Nɨ̀mwi̧ kpɔ́k kùŋ mwin yàá, ɗóhîn ɓe ɗɨɨ́ŋ Mèín yi na ŋgéé. Dunáam hȩ nùb ə́ré du gə́tɨ̀nyààŋɓànɨ ɗɨɨ́ŋ nyiín nyin Mèín yi naré ŋgáb ŋgáréè.

¹¹Nò du ɓe ɗɨɨ́ŋ nyin àm Mèèín, gèndóŋnà nɨ̀vɨ́tɨ̀b àm kɨ́, nò du ɓe ɗɨɨ́ŋ kpɔ́k kùùŋ, ndɨ̀ŋ nɨ́m kɨ́ ɓe nyòm Mèín na ŋgéé. Àm nɨ̀vɨ́tɨ̀b a mgbíhè Mèín nɨ́ɨ́b lâs no, àm ŋgáb du nùb ók ɓe Yésù Krístù nò du ɓe mgbíí ɓe nyòme ɓwâ lâs. Àmèn!

¹²Ɓwàjììb moò, nyí nɨ gbɨ̀ŋhɨ̀r àm jábɨ́r nyí ɓa pénɨ hȩ nɨ́m du hàrák ɗàwáá rè. Jábɨ́r kɨ́ du àm kùb a pê hȩ ə́ə́m nyínè duré á.

¹³Óknábɨ̂ŋ mɨ̀tù ɓwâ nyí du pénɨ jábɨ́r hȩ Krístù ya pə́ré, àm nyí a dùɓà ɓe mɨ̀tù ɓwâ ŋgə́ ɓa cùwònɨ ɓe mgbíí noò.

¹⁴Nyí á ɓe mɨ̀tù ɓè kùb andɨ nyí àm nyí du nɨ̀fuùb Krístùù; ɓetí Nyéhè mgbíhɨ́rí du Nyéhè Mèèín ndɨ á nɨ́ nyínè só ɓwâ lâs.

¹⁵Nɨ ɗúwa nɨ̀mwi̧ mvókín nyínè noò pə́ jábɨ́r hȩ nò kwíhe ŋgwéé, hȩ ŋgàyɨ́r, hȩ nò tɨ ndɨŋ ɓáŋhîn kàm kwè, kɨ́ kù hȩ nò tɨ lə́ nɨ́ àm nɨ́ kùbè noò.

¹⁶Ɨ́dù nò kù ɨ́ pê jábɨ́r àm ŋgə́ du nò Krístùù, ŋgə́ nɨ́ sə̀ré ɓe kí óo, ŋgə́ sáktɨ̀bɨ̂ŋ Mèín àm ŋgə́ du nò Krístùù.

¹⁷Ɓwâ ŋgù̧ú̧ yaréré ɗóotɨ́, gbàŋ Mèèín ɨ́ duce fó̧yàyènɨ ŋgù̧ní ru. Ŋgù̧ú̧ ɨ́ yàréyàyè nɨ́ nɨ́m ya, kɨ́ nùb ya mvú ə́ə̀mnɨ Kìn Nyɔ̧ɔ̧́ Mèèín ndè tɨ̀ dundóŋce ɨna!

¹⁸Ɓetí káàtà Mèèín á tànɨ ɨnè: «Ɓwâ nùb nyɔ̧ɔ̧́ ɓáíkɨ́yaye ŋgát ŋgát ɨnè rè, nùb ɓɨ́b ɓe cɨcóòm tɨ̀ ndɨŋ ɨna?»

¹⁹Hȩ dùnɨ u̧nèé, nùb du pénɨ jábɨ́r ɗóhîn hȩ Mèín ɗúré, gɨ̀ tíí ɓe ndɨ̧̀ɨ̧́ nyɔ̧né, ŋgáb a lèèrê síí Nɨ̀nyàŋhȩ̀ ŋgáré, ŋgə́ nò du jə̀ŋnɨ ɓwáár ŋgéé.