Read Vute 1 Píyéèr 5 Bible Online

1 Píyéèr 5 - Vute bible

1 Píyéèr 5

¹Nùb mvókín nyínè no du kɨ̀jííb ə́mní, mɨ nyinna ŋgáb á. Mɨ duɓwée kɨ̀jíri ə́mní á. Mɨ du mɨ̀námé jábɨ́r Krístù ya pə́ré á, mɨ ɓace ŋgáŋnɨ ɓe ŋgə́ mgbíí noò Mèín ɓa túùmniì no á. Nɨ́m mɨ nyinna kɨ̀jííb kíì á rè:

²Kúùŋ Mèín naré nyí ŋgáré nyí gə́tɨ̀ hȩ nùb gə́tɨ nyèèmí gə́tɨlɨ́ŋndé rè, gə́tɨnáɓam kúùŋ kɨ́ hȩ Mèín ɗúré, nyí nɨ njɔ̧̀ bɨrɨ́b bɨrɨ́b gə́tɨ̀r. Éínáam ə́r kɨ́ ɓe ɗûnɨ́m, nyí nɨ àm kùb nà nyí mònéè lə́mnɨ̀r.

³Nùb kùb naré nyí ŋgáré nyí gə́tìi rɨ, nyí nɨ ŋgáb ɓáìn, dunanáam ŋgáb túúm guur gùrí nyɔ̧né.

⁴Ɓwâ Krístù nò ge nɨ́m lâs ɓace féínniì, ŋgə́ ɓa nyí nànɨ lɔ̀ɔ́ mgbíhɨ́rí du ɓáàŋnɨ ɓáŋhîn ɗàwáá á.

⁵Nyí ɓwê, wàánjííb, jəŋnáam kɨ̀jííb. Nyí lâs cè, gesénáam síí ɗàá, nyí a éínà kùb mwin yàáb, ɓetí káàtà Mèèín á wáànɨ ɨnè: «Mèín á jìnɨ nùb wútɨ síhé, ɨ́dù nùb gesé síí ɓóò ɗàá, ŋgə́ a ɗû ŋgáb.»

⁶Gesénáam síí ɗàá Mèín nò du ɓe nyòmeè tíí, àm ŋgə́ a dɨ̀mè nyí ɓwâ mvókín ŋgə́ ya ɓwállé ɓa ɗóòniì.

⁷Ciinanáam ŋgə́ mɨ̀lə́m nyínè lâs, ɓetí ŋgə́ á nyí íí ya.

⁸Dunáam kɨ̀cáàb jáŋ. Gə́tɨnáam, ɓetí Sátàìn nò ɓi̧ní nyínè á yə̀ŋtèènɨ gín nyínè hȩ kpə́b máce nyàm ŋgə́ bɨ tàŋniì.

⁹Ə́əŋnáam kpéín ə́ə́m nyínè no, nyɨrénáam ŋgə́ ŋgáré ɓetí nyí ɗəəŋtɨ́ mwin yàáb dutee ɗɔ̀ɔ́b lè bɨ̂ŋ ndè á pə́ɓwênɨ jábɨ́r mwi̧ kɨ́.

¹⁰Ɨ́dù cùr nyí ɓa pə́hó̧nɨ jábɨ́r ti ŋgóbí, Mèín nò du ndɨ̀ŋnɨ kùb nyɔ̧ɔ̧́ ɓwâ lâs, ŋgə́ nò ɓé nyí gò dùɓwênɨ mgbíí mɨ̀cɨ̧̀ noò ɓe ɨ́r Krístùù nokwe, ŋgə́ ɓa ndɨ̀ŋnɨ nyí dùɓà ɗɨ́ɗɨ̧́, tamnì, ə́ŋhîn kpéín cè á.

¹¹Nyòm mvènnì ók ɓe ŋgə́ ɓwâ lâs. Àmèn!

¹²Ɓe nyòm Sílàs, nò péín ə́mní mɨ du sə̀ŋnɨ gíí ɓe kíí á mɨ tɨinsona nyí káàtà ti ɗàrɨ́ ru. Mɨ á ɗúnɨ nyí tààmnɨ njɔ̧̀, tànànɨ nyí ɨnè: «Ndɨ̀ŋnyàáŋ àmɨrì Mèèín á ná ɗàrɨ́, dunáam ɓaín ɓe kí.»

¹³Mɨ̀kwìn nùb ə́mní Bàbìlóòn, Mèín yi caɓwéeré nyindɨsotɨ́ nyí, dùgɨ̀ Máàrk mwin móò.

¹⁴Kuunáam kùb mwin yàáb, mvókín nyínè no, nyìndɨ̀nɨ ŋgáb. Nyí lâs nùb ók ɓe Krístùù, ju ɗóóŋ dù ɓe nyí.