Read Vute 2 Píyéèr 2 Bible Online

2 Píyéèr 2 - Vute bible

2 Píyéèr 2

¹Tɨ́kɨ̀nɨ́b kàŋnì yi goó ɓwâ kù Jwîf ɓo ti̧í̧. U̧ á ɓwê tá tɔ̀hí bɨ kàŋnì ɓa féínnɨ mvókín nyínè. Ŋgáb ɓa yòòtèènɨ yohîn á, tɔ̀ɔ̀nànɨ nyí nɨ́ɨ́b kàŋnì ɓa ndɨ̀ŋnɨ ə́ə́m nyínè gùte, ŋgáb a mvû ə́ə̀mnɨ Tá tɔ̀hí ya céín ŋgábè. Ɓe ndɨ̧̀ɨ̧́ u̧ kɨ́ á jábɨ́r nduukɨ́ ŋgábè ɓa ŋgáb bìnɨ kə́sə́k lu.

²Nɨ̀vɨ́tɨ̀b ví̧i̧ ɓa lénɨ àám ŋguŋnì ŋgábè kɨ́ no á, ɗɨ́m ŋgábè kɨ́ ɨ́ ɓa ndɨ̀ŋnɨ nɨ́m kùb ɓa yòmnɨ jɨ̀r àmɨrìí ru.

³Kɨ̀cáb ŋgáb ɗú nyí tàŋhó̧nɨ mòné ŋgáréè, tá tɔ̀hí bɨ kàŋnì kɨ́ ɓa gònɨ nyí átɨ̀nànɨ àám kàŋnì á. Ɨ́dù Mèín á cɨ̀ nɨ kə́sə́k ŋgáb ŋgùnnɨ, lɔ̧̂ ŋgábè tɨ̀ nɨ mbáàcée!

⁴Ɓetí dùgallɨb yi comndé, Mèín ya nɨ́ ŋgáb sam mbɨ́kwa, ŋgə́ yi kɨ́kléé ŋgáb nàmȩ́ȩ́, yɨ́ sɨ́mnɨ̀rí, móŋnɨ ŋgwìn jíri.

⁵Mèín ya nɨ́ nùb ya tíí sam mbɨ́kwa, ŋgə́ yi ndɨŋtɨ́ mbɨ̀ŋ kàm jíri gò ndùùkɨ́nɨ nùb ɓɨ́b kɨ́; ŋgə́ ɨ́ ɓátɨ̀hô̧ Nòwê yi takom nɨ́ àm ɗɨ́ɗɨ̧́ɨ̧́, ɨ́ nùb kù tɨ́ɓaám.

⁶Mèín ya téíntɨ́ Sòdôm ɓe Gòmóòr àm ŋgwéé, ŋgə́ ɨ́ ndùùkî kwɨ́ì bɨrɨ́b kɨ́ ɓe wa, nànɨ nùb ɓɨ́b túúm nɨ́m ɓa ŋgáb féínnàniì.

⁷Ŋgə́ ya céíntɨ́ Lôt nɨ̀ŋgwá ɗɨ́ɗɨ̧́ njɔ̧̀ ya ɓáaŋkom ɓe àám ŋguŋnì nùb ɓɨ́b ɓwâ ya kíì ya ndɨŋkomndé.

⁸Ɓetí nɨ̀ŋgwá ɗɨ́ɗɨ̧́ ya dukom mvókín nùb ɓɨ́bí kɨ́, ye lâs ŋgə́ yaá pénɨ ŋgə́ a ókce nɨ́ɨ́b ɓáŋhɨ́b nùb kɨ́ ya ndɨŋkom kɨ́, njɔ̧̀ a yà ŋgə́ ɓə́nnɨ.

⁹Kéké ɗəəŋceé i̧ á ŋgə́ fɨ́tɨ céínhó̧nɨ nùb ɗɨ́ɗɨ̧́ kɨhɨri, i̧ á ŋgə́ fɨ́tɨɓwée gə́tɨ̀nɨ nùb ndɨŋ ɓáŋhɨ́nne, àm túmnɨ ŋgáb jábɨ́r ye ŋgù̧ní.

¹⁰Nùb du ndɨ̀ŋnɨ nɨ́ɨ́b ɓe mɨ̀lə́mkáín ɓáŋhɨ́b ŋgáb nɨ̀mibi sumíì, ŋgáb a jààŋkɨ́kwà sɨr Mèèín ndɨ, nùb ŋgə́ ɓa túùmɓànɨ jábɨ́rí á kí. Tá tɔ̀hí bɨ kàŋnì mɨ tana nyí rè, ŋgáb á ɓe tamŋgwé, ɨ́ ɓɔ̧ ɓáŋhîn, ŋgáb jə̀ŋnɨ Nyéhɨ̀b ɓɨllɨnne du ɓe mgbíhɨ́rí ɗàà, ŋgáb á bɨ́ ŋgáb àndɨ̀nɨ.

¹¹Dùgɨ̀ dùgallɨb duɓacéye tamnì, ɓe nyòme ndóóŋ tá tɔ̀hí bɨ kàŋnì kɨ́ rɨ, ŋgáb bɨ nyìnɓáàŋnɨ ɓe ɨ́r nyéhɨ̀b du ɓe mgbíhɨ́rí kɨ́ Kékéé tíí ɗàà.

¹²Nùb kɨ́ bɨ kɨ̀cáàb ŋgwȩ́ȩ́ ɗàà hȩ nyèém Mèín yi nyaŋhȩ, kùb a bì kwíìniì rɨ u̧; ŋgáb á bɨ́ àndɨ̀nɨ nɨ́m ŋgáb du bɨ́ ɗə̀ə̀ŋwáá. Kùb kwá nduuɓwée ŋgáb hȩ kùb nduuce nyèém ndɨ u̧.

¹³Ɓe ɨ́r nɨ́ɨ́b ɓáŋhɨ́b ŋgáb ndɨŋndé, kùb kwá gom ŋgáb ɓe jábɨ́r. Ŋgáb á ɓe mɨ̀tù túùmhó̧nɨ àám ŋguŋnì ɓe tɔ̧̀ ŋgábè kɨ́ laŋtɨ̧ɨ̧́. Ɓwâ nyíne ŋgáb du yɨ́ cɔɔ̀ŋ ndɨ, ŋgáb á óknɨ mɨ̀tù tȩ́ȩ̀nànɨ nyí kààŋ, ju ŋgáb duce mvókín nyínè noò á nàɓànɨ sə̀ré cei.

¹⁴Íí ɓoò á há nɨ̀gubì ya, ŋgáb cè bɨ́ yènɨ ɓe cum ɗàà. Nùb ə́ə́m ɓóò du tamnì ɗàwáá á gùrénɨ ndɔ̀k ɓoò no. Mɨ̀lə́m ŋgábè á há mɨ̀lə́m taŋ kùb mònéè, káá Mèèín á ŋgábè só.

¹⁵Ŋgáb fobtɨ́ jɨ̀r ɗɨ́ɗɨ̧́ ɗà ŋgáb ɨ́ lɔ̧̂ ɓe tùú ŋgáb yi tu bɨ́ jɨ̀r Bàlâm, mwin Bòsóòr yi turé rè; kí du ŋgə́ ya ə́əmtɨ́ ndɨ̀ŋnɨ ɓáŋhîn àm ŋgə́ ɗú mònéè.

¹⁶Ɨ́dù kùb ɨ́ yètè ŋgə́ ɓe ɨ́r jàŋhɨ́r ŋgéé kíì. Kí du tɨ́ha̧á̧ gwi̧í̧ kù yi wennaá tɨ́kìn Mèèín kɨ́ ɓɔ̧, tànànɨ tɨ́kìn kɨ́ ŋgə́ mbɨ́k ndɨ̧̀ɨ̧́ nɨ́ɨ́b yɨŋmɨri.

¹⁷Tá tɔ̀hí bɨ kàŋnì kɨ́ á hȩ ŋgóndúm mvúmí mvúm cə́ŋhɨ nóò, ŋgáb á hȩ nàá du sɨ́ínɨ a dù nɨ́ nàre. Mèín nyaaŋkɨ́cií nɨ́ yɨ́ juu ŋgábè yɨ́ sɨ́mnɨ̀r lúklúú.

¹⁸Ŋgáb á nyìntèènɨ nyindí wútèé síhé du hàrák ɗàwáá. Ɓe mɨ̀lə́m ŋguùŋ du nànɨ sə̀réé ŋgáb nɨ̀miib du ɓe kíí, nùb éíhó̧kɨ́ ju kumí heé heé rɨ́, ŋgáb a ndɨ̀ŋ nùb kɨ́ gùré ndɔ̀k ɓoò no.

¹⁹Ŋgáb á ɓwáínànɨ nɨ̀vɨ́tɨ̀b ju mvòŋsòòŋ, u̧ kɨ́ ŋgáb nɨ̀miib ŋgáb mbɔ́klɨ́b ɗɨ́m du ŋgáb gèrénɨ cwéé á, (ɓetí nɨ̀mwi̧ du nɨ mbɔ́ɔ́ nɨ́m du ŋgə́ kɨ́ɨ́niì á).

²⁰Nùb kù á ku, ŋgáb ya mbɨ́ɨ́ bɨ́ mɨ̀lə́mkáín ɓáŋhɨ́b ɗɔ̀bɨ́nné àm ŋgáb ya ɗəŋhȩ bɨ́ Yésù Krístù nò du Kéké nɨ́mè ɓe tɨ́ɓə́r nɨ́mè. Nɨ́m mwi̧ ŋgáb ɨ́ gùcùrê mɨ̀lə́mkáín ɓáŋhɨ́b du ŋgáb gə́tɨ̀nɨ nìrì kɨ́ no, jábɨ́r ŋgáb kwá kwaré ɓa ndóŋnɨ kɨ́ tɨ tíí á.

²¹Àm kíí, ŋgáb yè ya bɨ́ jɨ̀r ɗɨ́ɗɨ̧́ kɨ́ ɗə̀ŋhɨ̀r, ɨ́ ndôŋ kɨ́ ŋgáb mvúcu Kìn Mèèín kùb ya tana ŋgábè.

²²Nɨ́m féínna ŋgáb kɨ́ túumɓa ɨnayâna gɨ̀gàìn du wáànɨ ɨnè: «Lì taŋcuú nɨ́m ŋgə́ tɨ túŋndé», «ŋgwèé kùb kɔɔkɨ́ ɗàròò gií gwíncùrénɨ njobȩ́ȩ́» na rè àmɨɨr á na á.