Read Vute 2 Píyéèr 3 Bible Online

2 Píyéèr 3 - Vute bible

2 Píyéèr 3

¹Ɓwàjììb moò, káàtà bɨrɨ́bí mɨ du nyí tɨ̀ìnnàniì á rè. Tɔ̀ɔ́ bɨ mɨ tɨ du nyí vùùŋcùnànɨ káàtààb bɨrɨ́b kɨ́ nokwe, tɨm àm səəmcu kɨ̀cáàb nyínè, nyí a dù ɓe mɨ̀lə́m hàráá á.

²Mɨ á ɗúnɨ nyí lə́ə̀mcù nyindí tɨ́kɨ̀nɨ́b Mèèín yi nyinna nyí ɓwâ yi tíí rɨ, nyí a lə́ə̀mcùɓwê Kìn Kéké nò du tɨ́ɓə́r nɨ́mè, nùb tómé nyínè ya tana nyí rɨ.

³Ɗəəŋnáɓaye ɨnayâna jíìb cáŋhɨ̀rí no, nùb du ndɨ̀ŋtèènɨ nɨ́ɨ́b hȩ mɨ̀lə́m ŋgáb nɨ̀mibi ɗúré kwá féín, ŋgáb a kə́hè nyí,

⁴ŋgáb a tà: «Ŋgə́ yi ta ní ɓacuwo ru na, ŋgə́ maá nɨ́ ŋga? Tákɨ̀rɨ́b nɨ́mè ndukcií bɨ́, ɨ́dù nɨ́ɨ́b lâs á háyè bɨ dùnɨ hȩ ɓwâ ɗɔ̀ɔ́b ya yaréré!»

⁵Ŋgáb mvúɓatɨ́ ə́ə̀mnɨ ɨnayâna á ɓàcɨ̀ nȩ̀ȩ́ Mèín ya nyaŋhɨ ɓɨɨr ɓe ɗɔ̀ɔ́b ɓe nyindí nó ɓɔ̧ne á. Mèín ya áhó̧ nɨ́ ɗɔ̀ɔ́b mvúúm á, ŋgə́ ɨ́ njáíntèè yɨ́ɨ́ ɗɔ̀bí ɓe mvúm.

⁶Ɓe mvúm á ɓwêcé kùb ya nduukɨ́ nùb ya tíí ɓe mbɨ̀ɨ̀ŋ kàm jírí ru.

⁷Ɨ́dù, ɓɨɨr ɓe ɗɔ̀ɔ́b ɗàrò rè, Kìn Mèèín gə́tɨkɨ́ nɨ́ ŋgáb ndùùkɨ́nɨ ŋgáb ɓe wa á. Ŋgáb dukɨ́ bɨ́ gə́tîn móŋnɨ ye kùb ɓa ŋgùnnɨ nùb ɓɨ́b, kùb a ndùùkî ŋgábè á.

⁸Ɨ́dù ɓwàjììb moò, nɨ́m mwi̧ á du nɨ́ ɗúwa nyí cə̀mláŋtɨ: kí du, kɨ́ Kékéé, jíì mwi̧ á nɨ́ hȩ dáín tɔ́sìn mwi̧, dáín tɔ́sìn mwi̧ á cè nɨ́ hȩ jíì mwi̧.

⁹Yúhèé Mèín yúhɨ ɓwáár noò nɨ cóo ɗàà. Kɨ́ nùb kwè, ŋgáb á bɨ́ lə́ə̀mnɨ ŋgə́ ɗa̧nɨkɨ́ye nɨ ɗa̧nîn á na, ɗà àm ndè ŋgə́ túumna nɨ nyí jíhɨ́r no ŋgə́ du nɨ́ ɗúwa nò kù lɔ̧́tɨ, ɨ́dù nùb lâs ɓàndɨ̀ sum ndè á.

¹⁰Nɨ́m mwi̧ ye Kéké kwá cuworé, ŋgə́ kwá go hȩ ŋgàyɨ́r. Ye kɨ́, ɓɨɨr ɓa lɔ̧́kɨ́nɨ ɓe wùúm na kùb vùklì á. Mvii, njumi ɓe káŋyerɨ̀b ɓa yɨ́kɨ́nɨ wa̧á̧ á. Ɗɔ̀ɔ́b ɓe nɨ́ɨ́b du yá kwe lâs tɨ̀ bɨ dùcɨ̀r.

¹¹Hȩ nɨ́ɨ́b lâs ɓa ndùknɨ hȩ nyí ókkɨ́ kɨ́, nyí ɗəəŋcií i̧ á du ɗúnɨ ɗɨ́m nyínè dùu. Á ɗúnɨ nyí jə̀ŋ Mèín, nyí a dù ɓaín ɓe ŋgə́.

¹²Ɓwâ nyí du móŋkɨ́nɨ ye Mèín kwá ŋgwin nɨ̀vɨ́tɨ̀bì rè, ye ɓɨɨr ɓa yínɨ wa̧á̧, ye mvii ɓe njumi ɓe káŋyerɨ̀b ɓa nyȩ̀ȩ̀nɨ ɓe mɨ́màáŋ waá rɨ, lɨɨŋnáam àm ŋgə́ a cùwòkɔ́klèé.

¹³Ɨ́dù Mèín ɓwáínaá nɨ́m ɓɨɨr heé ɓe ɗɔ̀ɔ́b heé, yɨ́ kùb du dùnɨ ju hȩ ŋgə́ ɗúré. Nɨ́m nɨ́m duce móŋkɨ́niì á kí.

¹⁴Àm kɨ́ á, ɓwàjììb moò, ɓwâ nyí duye móŋkɨ́nɨ ye kɨ́ rè, lɨɨŋnáam dùnɨ ju ɗóóŋ, kum só ɗàà, járkɨ́ták cè.

¹⁵Ɗəəŋnáam ɨnayâna jíhɨ́r Kéké nɨ́mè du ɓe kí rè, du àm nyí a kwà mvókín nyí ɓandɨ sum nyí a kwà ɓə́rì á, nɨ́m mwin yàá nɨ́mè Pôl ɗú nɨ́m nyìnnànɨ káàtà no rè noò á kí, ŋgə́ nyince ɓe kɨ̀cáàb Mèín yi na ŋgéé á.

¹⁶Káàtààb ŋgə́ du tɨ̀nniì lâs, ŋgə́ nyinndélɨ́ŋháce àm kɨ́ no. Káàtààb ŋgéé kɨ́ no, sɨ̀ɨ̀ŋ nyindíí bɨ kù á lɨ́ŋ bɨ ɓí óknɨ njàb kɨ́, á nùb du bɨ́ nɨ́m kù ɗə̀ə̀ŋwá ɓe nùb ə́ə́m gó̧ne ŋgəəmkɨ́lɨ́ŋ bɨ́ njàb kɨ́ ru, hȩ ŋgáb ndɨŋlɨ́ŋɓacéye ɓe káàtà Mèèín ndɨ u̧. Ɓe ndɨ̧̀ɨ̧́ u̧nè kɨ́, ŋgáb mácuɓa ndundu ŋgáb nɨ̀mibi á.

¹⁷Kɨ́ nyínè, ɓwàjììb moò, kùb takɨ́nacií nyí. Gə́tɨnáam, nùb ɓɨ́b tɨ̀ ndɨŋ nyí fòb jɨ̀r, gíí tamnì nyí du ɓe kíí tɨ̀ gu.

¹⁸Ɨ́dù, gɨnáam tíí ɓe ndɨ̀ŋnyàáŋ ɓe ɗɨɨ́ŋ Yésù Krístù nò du Kéké nɨ́mè ɓe tɨ́ɓə́r nɨ́mè. Mgbíí dù ɓe ŋgə́ ɗàrò ɓe ɓwâ lâs! Àmèn.