Read Vute 1 Jâŋ 1 Bible Online

1 Jâŋ 1 - Vute bible

1 Jâŋ 1

¹Kìn nò du nànɨ mèè á nɨ́m du nyí tànànɨ rè. Yànɨ ɓwâ Mèín ya nyaŋhȩ nɨ́ɨ́b lâs, ŋgə́ yaácɨ̀ nɨ ku. Nɨ́m yi óó ŋgə́ nyìnnɨ, nɨ́m yi pə́ɓatɨ́ ŋgə́ ɓe íí nɨ́mè, nɨ́m ɨ́ góòmnyààŋɓà ŋgə́, nɨ́m ɨ́ dì̧nɨ̀ɓàcéyè ŋgə́ ɓe ŋgáár nɨ́mè.

²Ɓwâ nò du nànɨ mèè kɨ́ yi túmne síhé, nɨ́m yi péé ŋgə́. Nɨ́m á ə́ə̀ŋnɨ mɨ̀námé, nɨ́m a ɓéece àm nò du nànɨ mè mɨ̀cɨ̧̀ɨ̧́ kɨ́. Ŋgə́ ya dukom gín Táà, ŋgə́ túumnaceé nɨ́m síí.

³Nɨ́m nɨ́m yi pə́ré ɓe kɨ́ nɨ́m yi óklé, nɨ́m á nyí átɨ̀nàɓwênɨ, àm nyí ɓáaróó nɨ́m no, ju ɓaín nɨ́m du ɓe Mèín, ɓe mwin nóò Yésù Krístùù, nyí a dùɓwê ju kɨ́.

⁴Nɨ́m tɨnna nyí nɨ́ɨ́b kɨ́ àm mɨ̀tù nɨ́mè sumíì a dùɓà yúklɨ́nne á.

⁵Kìn nɨ́m ókwo Yésù Krístù ɓɔ̧ne á nɨ́m du nyí tànànɨ rè. Kìn kɨ́ ta ɨnayâna Mèín du mwa á, sɨ́mnɨ̀r nɨ yɨ́ ŋgə́ duré ɗàà na á.

⁶Nò kù ɨ́ tà ní á ɓaín ɓe Mèín ŋgə́ a duce sɨ́mnɨ̀rí, ŋgə́ kaaŋ nɨ kààŋ á, ŋgə́ cè nɨ́ ndɨ̀ŋnɨ nɨ́m Mèín ɗúré ɗàà.

⁷Ɨ́dù, nò kù ɨ́ dù dùnɨ mwahín hȩ Mèín nɨ̀mɨr duce mwahɨ́nné, nò kɨ́ ɓe Mèín á ɓaín. Yésù nò du mwin Mèèín, cwá ŋgə́ ya kú hȩ satɨgàà ɓace ákɨ́nɨ cuum nò kíì lâs á.

⁸Nò kù ɨ́ tà ní nɨ cɨcóm sé, nò kɨ́ mbáaŋɓa nɨ síí á, ŋgə́ nɨ ɓe àmɨɨr Mèèín sumí ɗàà.

⁹Ɨ́dù, nò kù ɨ́ vììnà Mèín ní comtɨ́, hȩ Mèín dùnɨ nò ɗɨ́ɗɨ̧́ɨ̧́, nɨ́m ŋgə́ taré ŋgə́ a ndɨ̀ŋcèé, ŋgə́ ɓa nò kɨ́ tɨ́ínànɨ cuum nó kɨ́ á, ŋgə́ a ákɨ́nà nò kɨ́ mɨ̀lə́mkáín ɓáŋhɨ́b no njɔ̧̀ɔ̧ kɨ́.

¹⁰Nò kù ɨ́ tà ní nɨ còmwá, nò kɨ́ settɨ nɨ Mèín tɨ́kàŋkɨ̧́ á. Nò kɨ́ cè nɨ́ ɓe Kìn Mèèín sumí ɗàà.