Read Vute 1 Jâŋ 2 Bible Online

1 Jâŋ 2 - Vute bible

1 Jâŋ 2

¹Munɨ́b moò, mɨ tɨnna nyí nɨ́ɨ́b kɨ́ àm nyí tɨ̀ comndé á. Nò kù ɨ́ còm, nɨ́m á ɓe nò kaŋhɨ nɨ́mè gín Táà, nò kɨ́ Yésù Krístù nò ɗɨ́ɗɨ̧́ á.

²Yésù Krístù kɨ́ yi kaikíí síí nóò ɓe ɨ́r tɨ́rèé cuum nɨ́mè ɓe kɨ́ nùb ɗɔ̀bɨ́nné lâs ɓwê, nɨ tàhó̧ɗóòwá kɨ́ nɨ́mè.

³Nɨ́m ɨ́ dù jə̀ŋnɨ ɓíhɨ̀b Mèèín, nɨ́m ɗə̀ə̀ŋtɨ nɨ́m ɗəəŋɓatɨ́ Mèín.

⁴Nò kù ɨ́ tà: «Mɨ ɗəəŋɓatɨ́ Mèín», ɨ́dù nò kɨ́ ɨ́ dù nɨ́ jə̀ŋnɨ ɓíhɨ̀b Mèèín ɗàà, nò kɨ́ du nɨ tɨ́kàŋkɨ̧́ á, àmɨɨr Mèèín cè nɨ́ nò kíì sumí ɗàà.

⁵Nɨ́m mwi̧, nò du jə̀ŋnɨ kìn Mèèín ndɨ, kùb á pénɨ ɨnayâna ɗûnɨ́m Mèèín nò kíì sumíì á ɓà yúklîn. Nò taɓa wááŋ ní á ɓaín ɓe Mèèín, nò kɨ́ dù hȩ Yésù ya duré. U̧nè á kùb fɨ́tɨ ɗə̀ə̀ŋnɨ ɓè ŋgə́ dumeɓa ɓaín ɓe Mèèín.

⁷Ɓwàjììb moò, nɨ ɓíì heé sé mɨ du nyí tɨ̀nnànɨ. Du nɨ ɓíì fìn nyí ya ókcɨ nɨ́ yànɨ ɓwâ nyí ya sei nùb ə́mní á. Ɓíì fìn kɨ́ du nɨ kìn nyí ókcɨré á.

⁸U̧ rɨ ɓíì heé á mɨ du nyí tɨ̀nnànɨ ru, àmɨɨr ɓíì kíì, nyí á pénɨ Krístù ya, dùgɨ̀ nyí nɨ̀miib ya. Ɓetí, sɨ́mnɨ̀r á cɔ̧́nɨ, mwa àmɨrì á cè nɨ́ ɓə̀ə̀cɨ̀nɨ.

⁹Nò ta ní á dùnɨ mwahín, ŋgə́ ɨ́ dù nɨ́ ɓə̀ndɨ̀nɨ mwin yàá no ə́mní, nò kɨ́ duháye nɨ sɨ́mnɨ̀rí á.

¹⁰Nò ɗú kùŋ mwin yàá ə́mní, á nɨ dùnɨ mwahín, u̧ á cè nɨ́m fɨ́tɨ ndɨ̀ŋnɨ ŋgə́ gùré cumí du nɨ́ no njɔ̧̀ɔ̧ ɗàà.

¹¹Ɨ́dù nò du nɨ́ ɓə̀ndɨ̀nɨ kùŋ mwin yàá ə́mní á nɨ sɨ́mnɨ̀rí, ŋgə́ nɨ ɗə̀ə̀ŋwá yɨ́ ŋgə́ du gìniì ɓetí sɨ́mnɨ̀r ɓoŋkíí nɨ́ ŋgə́ íí.

¹²Munɨ́b moò, mɨ tɨnna nyí àm cuum nyínè du tɨ́in ɓe nɨ́m Yésù ndɨŋ ndè á.

¹³Tá bɨ, mɨ tɨnna nyí àm nyí ɗəŋhȩ nɨ́ nò ya ducɨ nɨ́ du̧ú̧, nɨ́ɨ́b lâs ma nyààŋyèwáá á. Wàánjííb, mɨ tɨnna nyí àm nyí ɓei Sátàìn su rè á.

¹⁴Munɨ́b moò, mɨ tɨnna nyí àm nyí ɗəŋhȩ nɨ́ Táà á. Tá bɨ, mɨ tɨnna nyí àm nyí ɗəŋhȩ nɨ́ nò ya ducɨ nɨ́ du̧ú̧, nɨ́ɨ́b lâs ma nyààŋyèwáá á. Mɨ tɨnna nyí á, wàánjííb, ɓetí nyí á ɓe kɨ̀ɓá̧á̧. Nyí gə́tɨréé Kìn Mèèín nyínè sumí, nyí ɓeiceé Sátàìn su.

¹⁵Nyí nɨ nɨ́ɨ́b ɓáŋhɨ́b ɗɔ̀bɨ́nné ɗúu, dùgɨ̀ nɨ́ɨ́b ók ɓe nɨ́ɨ́b ɓáŋhɨ́b kíì. Nò kù ɨ́ ɗû nɨ́ɨ́b ɓáŋhɨ́b ɗɔ̀bɨ́nné, ɗûnɨ́m Táà nɨ nò kíì sumí ɗàà.

¹⁶Nɨ́ɨ́b ɓáŋhɨ́b ɗɔ̀bɨ́nné hȩ mɨ̀lə́mkáín ɓáŋhɨ́b nɨ̀vɨ́tèé sumíì, sunɨ̀b, ɓe wútèé síhé ɗoŋwo njɔdɨ̀b ɗɔ̀bɨ́nné ya kwe; nɨ́ɨ́b kɨ́ lâs, nɨ Tá sé ɨ́ du nànɨ, du nɨ nɨ́ɨ́b ɗɔ̀bɨ́nné á.

¹⁷Nɨ́ɨ́b ɓáŋhɨ́b ɗɔ̀bɨ́nné á bɨ cɔ̧́nɨ, dùgɨ̀ kɨ́b nɨ̀vɨ́tè du súnɨ̀niì. Ɨ́dù nò ndɨŋ nɨ́m Mèín ɗúré kwá dulɨ́ŋ tɨ́k kɨ̀ tɨ́k.

¹⁸Munɨ́b moò, ye cáŋhɨ̀rí ŋgóobtɨ́! Nyí yi óó kùb tànɨ àm nò ɓəndɨ Krístùù du gòniì, nɨ́m ɗəəŋmeɓatɨ́, ɗàrò, nùb ɓəndɨ Krístùù á cɨ̀ bɨ ví̧i̧. Kí ɨ́ du túùmnɨ ɨnayâna ye cáŋhɨ̀rí ŋgóobcií nɨ́ ru.

¹⁹Nùb kɨ́ yɨɨ́m mèɓà bɨ nùb nɨ́mè kpánéné sé, àm kɨ́ á ŋgáb yi éíkɨ́ bɨ́ nɨ́m no ru. Ɓetí ŋgáb yi dùyè nùb nɨ́mè kpánéné, ŋgáb yè yi duháceé ɓe nɨ́m á. Ɨ́dù ə́rè ŋgáb yi éíkɨ́ bɨ́ nɨ́m no rè á du túùmɓànɨ laŋtɨ̧ɨ̧́ ɨnayâna ŋgáb yɨɨ́m mèɓà bɨ nùb nɨ́mè kpánéné sé ru, dugɨ nɨ̀vɨ́tè mwi̧ ɓà.

²⁰Kɨ́ nyínè, nyí yi gamtɨ́ Nyéhè Sarîn Krístù ya na nyínè, àm kɨ́ á nyí ɗəŋhȩ nɨ́ àmɨɨr lu.

²¹Hȩ mɨ tɨ̀nnànɨ nyí u̧nèé, nɨ àm nyí vúbe àmɨɨr nɨ sé, du nɨ àm nyí ɗəəŋndé á; nyí ɗəəŋɓwéetɨ́ nɨ́m du kàŋnì sàmàìn duɓwée àmɨrìí ɗàà.

²²Na ɨ́ du tɨ́kàŋkɨ̧́? Du nò taɓa wááŋ ɨnayâna Yésù nɨ Krístù sé rɨ á. Nò kɨ́ nò ɓəndɨ Krístùù á: ŋgə́ mvúɓa Tá ɓe Mwin cúk á.

²³Ɓetí nò cam Mwin Mèèín nɨ ɓe Mèín nɨ̀mɨr ɓaín ɗàcéwa. Nò taɓa wááŋ Yésù Mwin Mèèín á na rɨ, nò kɨ́ á ɓwê ɓaín ɓe Mèín nɨ̀mɨr.

²⁴Àm kɨ́ á mɨ ta, kɨ́ nyínè, nyí gə́tɨ̀ré kìn nyí ya ók yànɨ ɓwâ nyí ya sei nùb ə́mní rɨ sumí. Nɨ́m nyí yi ók ɓwâ kíì ɨ́ dù dùkɨ́lɨ́ŋnɨ nyínè sumí, nyí ma ɓa dùɓwênɨ ɓaín ɓe Mwin ɓe Tá á.

²⁵Àà! Ɗəəŋnáam ɨnayâna nɨ́m Krístù ya ɓwáí nɨ́m nàniì du mè mɨ̀cɨ̧̀ á yáà.

²⁶Nɨ́ɨ́b mɨ tɨnna nyí rè, mɨ tɨin ɓe ɨ́r nùb du mánɨ nyí mbáàŋniì á.

²⁷Kɨ́ nyínè, Krístù naá nɨ́ nyí Nyéhè noò. Hȩ Nyéhè noò dùnɨ nyínè sóò, nyí nɨ mácɨ̀nɨ nò kù tɔ̀hɨ̀ nyí na ɗàà. Ɓetí Nyéhè á nɨ nyí tɔ̀ɔ̀nànɨ nɨ́ɨ́b lâs, nɨ́m ŋgə́ duce tɔ̀ɔ̀niì àmɨɨr á, nɨ kààŋ sé. Àm kɨ́ á du ɗúnɨ nyí dù ɓaín ɓe Krístù, hȩ Nyéhè tɔɔna nyínè ru.

²⁸I̧i̧, munɨ́b moò, dunáam ɓaín ɓe Krístù, àm nɨ́m a dùnâ ŋgwé wááŋ ɓwâ ŋgə́ kwá cuworé, sə̀ré tɨ̀ bɨɓwée nɨ́ nɨ́m no tíí ye ŋgə́ kwá féínndé.

²⁹Nyí ɗəəŋtɨ́, Krístù á ɗɨ́ɗɨ̧́, ɗəəŋnáɓwéem ɨnayâna nò ndɨŋ nɨ́m du ɗɨ́ɗɨ̧́ɨ̧́ du nɨ mwin Mèèín á.