Read Vute 1 Jâŋ 4 Bible Online

1 Jâŋ 4 - Vute bible

1 Jâŋ 4

¹Ɓwàjììb moò, nùb du tànɨ vúm á ɓe Nyéhè Mèèín só rɨ, nyí nɨ ŋgáb ə́ə̀mtàm. Kə̀hɨ̀náyènɨ ŋgáb kəhîn, pénɨ ɓè nyéhè ŋgáb du ɓe kí kɨ́ dumeɓa kɨ́ Mèèín, ɓetí tɨ́kɨ̀nɨ́b kàŋnì á cɨ̀ bɨ ɗɔ̀ɔ́b lè bɨ̂ŋ.

²Nò taɓa wááŋ ɨnayâna Yésù Krístù yi ámeɓatɨ́ síí nɨ̀vɨ́tèé rɨ, nò kɨ́ du nò Mèèín á. U̧ á nyí fɨ́tɨ ɗə̀ə̀ŋnɨ nò du ɓe Nyéhè Mèèín sóò.

³Ɨ́dù, nò mvú ə́ə̀mnɨ àm Yésù yi á síí nɨ̀vɨ́tèé kɨ́, nò kɨ́ nɨ ɓe Nyéhè Mèèín só ɗàà. Nyéhè ŋgə́ du ɓe kíí du nɨ kɨ́ nò ɓəndɨ Krístùù á. Nyí ya óó nò kɨ́ á gònɨ ɗɔ̀bín na, ŋgə́ féínɓacéecií nɨ́.

⁴Ɨ́dù nyí, munɨ́b moò, nyí ók nɨ́ ɓe Mèín á, nyí ndóŋceé nɨ́ tɨ́kɨ̀nɨ́b kàŋnì nyòme; ɓetí nyéhè nyí du ɓe kí sóò á nɨ tamnì ndóóŋ nɨ́ kɨ́ nùb ɗɔ̀bɨ́nné du ɓe kíí.

⁵Kúu nyindíí ŋgábè á hȩ kɨ́ nùb ɗɔ̀bɨ́nné, ɓetí ŋgáb ók bɨ́ ɓe nùb ɗɔ̀bɨ́nné á. Nùb ɗɔ̀bɨ́nné á cè ŋgáb óknànɨ ɓwâ ŋgáb du nyìnniì.

⁶Ɨ́dù kɨ́ nɨ́mè, nɨ́m ók nɨ́ ɓe Mèín á. Nò ɗəŋhȩ Mèèín, á óknɨ àm nɨ́mè ɓɔ̧ne; nò du nɨ́ óknɨ ɓe Mèín ɗàwáá, nɨ óknɨ àm nɨ́mè ɓɔ̧ne ɗàà. U̧ á nɨ́m fɨ́tɨ ɗə̀ə̀ŋnɨ Nyéhè àmɨrì á nyin, kɨ́ kàŋnì á cè nyin ndu.

⁷Ɓwàjììb moò, nɨ́m dùná ɓe ɗûnɨ́m mvókín nɨ́mè no, ɓetí Mèín ɨ́ du nànɨ ɗûnɨ́m ndu. Nò ɗú kùŋ mwin yàá rɨ, nò kɨ́ du nɨ mwin Mèèín á, ŋgə́ ɗəəŋɓwéeceé Mèín.

⁸Hȩ Mèín dùnɨ ɓe ɗûnɨ́mí, nò du nɨ́ ɗúwa kùŋ mwin yàá, nò kɨ́ du nɨ Mèín ɗə̀ə̀ŋwá á.

⁹Mèín ya tómwoó kpòk muní noò ɗɔ̀bín gèwònànɨ nɨ́m mè. Ɓe ndɨ̧̀ɨ̧́ u̧nè kɨ́ á Mèín túmnɨ ɗûnɨ́m ŋgə́ ɗú nɨ́mè ru.

¹⁰Ɗûnɨ́m kɨ́ nɨ tàwá àm nɨ́m ɗú ŋgéé, ŋgə́ ɨ́ ɗú nɨ́ nɨ́m ndu, ŋgə́ ɨ́ tómwò Mwin nóò gò kàìkɨ́nɨ síí ɓe ɨ́r tɨ́rèé cuum nɨ́mè.

¹¹Ɓwàjììb moò, hȩ Mèín ɗúnɨ nɨ́m u̧nèé, á ɗúnɨ nɨ́m dùnáɓwê ɓe ɗûnɨ́m mvókín nɨ́mè no.

¹²Nò kù nɨ Mèín pə́kɨ́yèwá. Nɨ́m ɨ́ dù ɓe ɗûnɨ́m mvókín nɨ́mè no, Mèín maá ɓaín ɓe nɨ́m, nɨ́m á cè yúklîn ɓe ɗûnɨ́m nóò á.

¹³Ɓe nyər Mèín yi na nɨ́m Nyéhè noò rè á nɨ́m ɗəŋhȩ ɨnayâna nɨ́m á ɓaín ɓe ŋgə́, ŋgə́ á cè ɓaín ɓe nɨ́m ndu.

¹⁴Tá ya tómwoó Mwin nóò gò cénnɨ nùb ɗɔ̀bɨ́nné. Nɨ́m yi péé, kí á nɨ́m duce ɓéènɨ ru.

¹⁵Nò kù ɨ́ tàɓà wááŋ ɨnayâna Yésù Mwin Mèèín á na, Mèín á dùnɨ ɓaín ɓe nò kɨ́, nò kɨ́ a dùɓwê ɓaín ɓe Mèín.

¹⁶Kɨ́ nɨ́mè, nɨ́m ɗəəŋtɨ́ ɗûnɨ́m Mèín du nɨ́m ɗúniì, nɨ́m á cè ə́ə̀mnɨ ɗûnɨ́m kɨ́. Mèín á ɓe ɗûnɨ́m. Nò du ɓe ɗûnɨ́mí, á ɓaín ɓe Mèín, Mèín á cè ɓaín ɓe nò kɨ́.

¹⁷Nɨ́m ɨ́ dùɓà yúklîn ɓe ɗûnɨ́m, ye ŋgù̧ní nɨ́m ɓa ə́ə̀ŋɓànɨ Mèèín tíí ŋgwé wááŋ á. Ɓetí mè nɨ́mè ɗɔ̀bín hò̧ á hȩ kɨ́ Yésù Krístùù.

¹⁸Nò du ɓe ɗûnɨ́mí nɨ óknɨ vùù ɗàà, ɗûnɨ́m duɓa yúklɨ́nne á nɨ ŋgɨ́íkɨ́nɨ vùù. Nò du ɓe vùù sumíì nɨ ɓe ɗûnɨ́m yúklîn ɗàà, ɓetí vùù á ndɨ̀ŋnɨ nɨ̀vɨ́tè dù hȩ ŋgə́ á nɨ jábɨ́rí tə̧ə̧́ rɨ u̧.

¹⁹Kɨ́ nɨ́mè, nɨ́m du nɨ ɓe ɗûnɨ́m àm Mèín ɗúyaye nɨ́ nɨ́mè á.

²⁰Nò kù ɨ́ tà: «Mɨ á ɗúnɨ Mèín», u̧ kɨ́ ŋgə́ a jɨce nɨ́ kùŋ mwin yàá ə́mní, ŋgə́ du nɨ tɨ́kàŋkɨ̧́ á. Ɓetí, ɓwâ ŋgə́ jɨkɨ́yaye kùŋ mwin yàá ŋgə́ du péniì rɨ, ŋgə́ tɨ̀ ɗúce Mèín nò ŋgə́ du pénɨ ɗàwáá ɨna?

²¹Nò ɗú Mèèín, ɗúɓwê kùŋ mwin yàá no ə́mní. Ɓíì Mèín na nɨ́mè á ná kí.