Read Vute 1 Jâŋ 5 Bible Online

1 Jâŋ 5 - Vute bible

1 Jâŋ 5

¹Nò ə́mne ɨnayâna Yésù du Krístù á rɨ, nò kɨ́ du mwin Mèèín á. Nɨ̀vɨ́tè wu ɗúú tá, wu a ɗúɓwê munɨ́b.

²Ɗûú Mèèín ɓe ndɨ̧̀ɨ̧́ nɨ́m ɓíì noò taré ɨ́ du túùmnɨ ɨnayâna nɨ́m á ɗúnɨ munɨ́b Mèèín ndu.

³Nɨ́m fɨ́tɨ túùmnɨ ɨnayâna nɨ́m á ɗúnɨ Mèèín, du ɓè nɨ́m du jə̀ŋnɨ ɓíhɨ̀b noò á. Ɓíhɨ̀b noò cè bɨ́ ɓí jə̀ŋnɨ ɗàà.

⁴Ɓetí nò du mwin Mèèín, á sàmàìn ndóŋ nɨ́ɨ́b ɓáŋhɨ́b ɗɔ̀bɨ́nné nyòmeè. Ɓe ə́ə́m nɨ́mè á nɨ́m fɨ́tɨ ndóŋnɨ ɓáŋhɨ́b ɗɔ̀bɨ́nné nyòme ru.

⁵Na ma ɨ́ duce tamnì ndóóŋ nɨ́ɨ́b ɓáŋhɨ́b ɗɔ̀bɨ́nné? Sé nò ə́mne ɨnayâna Yésù du Mwin Mèèín á na rɨ.

⁶Yésù Krístù yi goó ɗɔ̀bín; ŋgə́ yi goó, ɗà kùb ɨ́ kɔ̀hè ŋgə́ kɔ ə́mní ɓe mvúm, tɨ́m noò ɨ́ sû ɓwâ ŋgə́ yi kúré. Ŋgə́ yi nɨ́ gòwá ŋgə́ ɨ́ kɔ̀kɗóò kɔ ə́mní ɓe mvúm, ɨ́dù tɨ́m noò ya súɓwéetɨ́ ɓwâ ŋgə́ yi kúré. Nyéhè Sarîn ə́əŋtɨ́ mɨ̀námé ɨnayâna àm kɨ́ àmɨɨr á, ɓetí Nyéhè Sarîn sàmàìn kaŋ kààŋ ɗàà.

⁷Nùb ə́ŋhȩ mɨ̀náméé á taarɨ́b:

⁸Nyéhè Sarîn, mvúm ɓe tɨ́m, ŋgáb taarɨ́b lâs, ŋgáb á cè bɨ́ kúu mwi̧.

⁹Nɨ́m á ə́ə̀mnɨ mɨ̀nám nɨ̀vɨ́tɨ̀bì, mɨ̀nám Mèèín ndóóŋ nɨ́ kɨ́ nɨ̀vɨ́tɨ̀bì, kí á cè ŋgə́ ə́əŋna Mwin nóò ru.

¹⁰Àm kɨ́ á du, nò ə́mne Mwin Mèèín, nò kɨ́ á ɓe mɨ̀nám kɨ́ sumí ru. Ɨ́dù, nò du nɨ́ ə́ə̀mwáá, settɨ nɨ Mèín tɨ́kàŋkɨ̧́ á, ɓetí ŋgə́ nɨ ə́ə̀mwá mɨ̀nám Mèín ə́ŋhȩ ɓe ɨ́r Mwin nóò rè.

¹¹Mɨ̀nám kɨ́ á cè tànɨ i̧? Mɨ̀nám kɨ́ taá ɨnayâna Mèín naá nɨ́m mè mɨ̀cɨ̧̀, ɓe Mwin nóò á nɨ́m fɨ́tɨce kwànɨ mè kɨ́ ru.

¹²Nò du ɓaín ɓe Mwin Mèèín á ɓe mè kɨ́, nò duce nɨ́ ɓaín ɓe Mwin Mèèín ɗàwáá nɨ ɓe mè kɨ́ ɗàà.

¹³Nyí nùb ə́mne Mwin Mèèín, mɨ tɨnna nyí àm nyí a ɗə̀ŋhȩ̀ ɨnayâna nyí á ɓe mè mɨ̀cɨ̧̀ yáá na á.

¹⁴Ɓwâ nɨ́m du Mèèín tíí, nɨ́m á ɓe gíí sumí, ɓetí nɨ́m ɗəəŋtɨ́, nɨ́m ɨ́ ɓwèì ŋgə́ nɨ́m kù ɗóhîn hȩ ɗûnɨ́m nóò duré, ŋgə́ á óknɨ.

¹⁵Hȩ nɨ́m ɗə̀ə̀ŋnɨ ŋgə́ á óknɨ ɓoré nɨ́m du ŋgə́ ɓwèìniì, nɨ́m ɗəəŋɓwéeceé ɨnayâna nɨ́m nɨ́m ɓwei kɨ́, ŋgə́ ɓa nɨ́m nànɨ á.

¹⁶Nò kù ɨ́ pê kùŋ mwin yàá ə́mní ndɨ̀ŋnɨ cum tɨ̀ du nɨ́ ə́ə́m nóò kwíìre, á ɗúnɨ ŋgə́ yóŋ Mèín, ɗà Mèín a nà mwin yàá ə́mní kɨ́ mè. Mɨ tàwá nùb du ndɨ̀ŋnɨ cum du kwíìnɨ ə́mní, ɓetí cum kù á ku kwíìnɨ ə́ə́m. Ɓe ɨ́r kúúŋ cum kíì, mɨ tàwá nò kù yóŋ Mèín.

¹⁷Ɓáŋhîn nɨ̀vɨ́tè ndɨŋndé lâs du nɨ cum á, ɨ́dù cum kù á ku du nɨ́ ə́ə́m kwíìnɨ ɗàwáá.

¹⁸Nɨ́m ɗəəŋtɨ́ nò du mwin Mèèín, sàmàìn gɨ tíí ɓe cumí ɗàà, ɓetí Mèín á ŋgə́ gə́tɨ̀nɨ, sàmàìn Sátàìn ndɨŋce ŋgə́ nɨ́m kù ɗàà.

¹⁹Nɨ́m ɗəəŋtɨ́ nɨ́m ók nɨ́ ɓe Mèín á. Nùb ɗɔ̀bɨ́nné cè, Sátàìn ɨ́ du nɨ́ ŋgáb ya ŋgáŋnɨ ru.

²⁰Nɨ́m ɗəəŋtɨ́ Mwin Mèèín yi goó ɗɔ̀bín, ŋgə́ ɨ́ nà nɨ́m kɨ̀cáàb nɨ́m ɗəŋhȩ Mèín àmɨrìí. Ju nɨ́m du ɓaín ɓe Mèèín, go nɨ Yésù Krístù Mwin nóò ya á. Ŋgə́ ɨ́ du Mèín àmɨrìí ru, ŋgə́ mè mɨ̀cɨ̧̀ á.

²¹Munɨ́b moò, gə́tɨnáam ɓe mèín bɨ kàŋnì.