Read Vute 2 Jâŋ 1 Bible Online

2 Jâŋ 1 - Vute bible

2 Jâŋ 1

¹Mɨ, kɨ̀jíri ə́mní, mɨ nyindɨsoó wu yàáŋ,[1] nò Mèín ya caré, mɨ nyindɨsoɓwéetɨ́ munɨ́b woò mɨ du ɗúmèɓàniì. Nɨ mɨ mwi̧ sé ɗóò ɨ́ du nyí ɗúnɨ, ɨ́dù nùb lâs ɗəŋhȩ kìn Mèèín àmɨrì á nyí ɗúɓwênɨ.

²Ɓetí kìn Mèèín àmɨrì kɨ́ á nɨ́mè sumí, ɓace nɨ́ dùlɨ́ŋnɨ ɓè ɓwâ lâs á.

³Mɨ yóóŋ Mèín nò du Táà ɓe Yésù Krístù nò du Mwin Táà, ŋgáb túùmnà nɨ́m nyàŋnjɔ̧̀. Ŋgáb ók nɨ́m mwàm, ŋgáb nà nɨ́m ju ɗóóŋ. Ŋgáb nà nɨ́m nyər kɨ́, nɨ́m nùb ə́əmmeɓa kìn Mèèín àmɨrì, nɨ́m ɨ́ dùkwà ɓe ɗûnɨ́m mvókín nɨ́mè noò.

⁴Ɓwâ mɨ tɨ féín, mɨ ɨ́ kwà mvókín munɨ́b woò, nùb kù á tùnɨ jɨ̀r àmɨrì hȩ Tá yi taré, mɨ ɨ́ ókɓà mɨ̀tù cei.

⁵Ɗàrò cè, yàáŋ, mɨ taá ɨnayâna nɨ́m dùná ɓe ɗûnɨ́m mvókín nɨ́mè no. Nɨ ɓíì heé sé mɨ du wu tɨ̀nnànɨ, du nɨ ɓíì kùb yi na nɨ́m yàá ɓwâ nɨ́m yi sei nùb ə́mní á.

⁶Ɗûnɨ́m du nɨ jə̧̀ə̧́ ɓíhɨ̀b Mèèín á. Hȩ nyí ya ókháce yàá ɓwâ nyí ya sei nùb ə́mní rɨ, ɓíì kɨ́ ta nyí dù ɓe ɗûnɨ́m mvókín nyínè no na á.

⁷Tɨ́kàŋkáàŋ ví̧i̧ á cɨ̀ bɨ ɗɔ̀ɔ́b lè bɨ̂ŋ; ŋgáb ɗúwa ə́ə̀mnɨ ɨnayâna Yésù yi ámeɓatɨ́ síí nɨ̀vɨ́tèé. Nò du nɨ́ ɓe kúúŋ mɨ̀lə́m kíì du nɨ tɨ́kàŋkɨ̧́ á, ŋgə́ du nɨ nò ɓəndɨ Krístùù á.

⁸Nyí ma gə́tìi, ə́r nyínè tɨ̀ lɔ̧́ sam, nyí tɨ̀ məm lɔ̀ɔ́ nyínè lâs.

⁹Nò du nɨ́ tùwá tɔ̀ɔ́ Krístù naré jɨ́k, ŋgə́ ɨ́ ɓààrê àám kàŋnì ya, nò kɨ́ nɨ ɓaín ɓe Mèín ɗàà. Nò ə́əmce tɔ̀ɔ́ kíì, á ɓaín ɓe Tá ɓe Mwin cúk.

¹⁰Nò kù ɨ́ gò yɨ́ nyínè, ŋgə́ ɨ́ du nɨ́ nyí tɔ̀ɔ́ Krístùù kɨ́ gèwònàwá, nyí nɨ ŋgə́ yó gàmdə̂r, nyí nɨ ŋgə́ nyìndɨ̀ɓàcéyè.

¹¹Ɓetí nò nyindɨ ŋgéé, du nɨ ɓe ŋgə́ kúu mwi̧ ndɨ̧̀ɨ̧́ ɓáŋhɨ́nne kɨ́ no á.

¹²Mɨ á ɓe nɨ́ɨ́b ví̧i̧ mɨ nyinna nyínè, ɨ́dù sàmàìn mɨ tɨín tɨnné ɗàà. Mɨ nɨ̀mɨr mɨ ɓa gɨ̀sònɨ nyí nyìnnàɓànɨ á, ɗà mɨ̀tù nɨ́mè sumíì a dùɓà yúklîn.

¹³Mwin yàá woò Mèín yi caɓwéeré, munɨ́b noò nyindɨsotɨ́ wu.