Read Vute 3 Jâŋ 1 Bible Online

3 Jâŋ 1 - Vute bible

3 Jâŋ 1

¹Mɨ, kɨ̀jíri ə́mní, mɨ nyindɨsotɨ́ wu Gàyûs, nò mɨ du ɗúmèɓàniì.

²Ɓwàjìrí moò, mɨ á ɗúnɨ ɓè nɨ́ɨ́b lâs tɨ gɨnaɓaye wu mɨ́nne, ɓè wu tɨ hainɓaye síí mîn hȩ nyéhè woò duɓwéece Mèèín tíí ɓe jábɨ́r kù ɗàwáá naa.

³Ɓwâ mwin yàáb ə́mní éíwo yɨ́ woò, tɨ go mɨ tànànɨ ɨnayâna wu á ɓaín ɓe kìn Mèèín àmɨrì, wu á cè ndɨ̀ŋnɨ nɨ́m kìn kɨ́ taré na, mɨ tɨ ókɓatɨ́ mɨ̀tù cei.

⁴Nɨ́m na mɨ mɨ̀tù a ndôŋ ɓwâ mɨ ók ɨnayâna munɨ́b moò péín ə́mní á dùnɨ ɓaín ɓe kìn Mèèín àmɨrì nɨ ɗàà.

⁵Ɓwàjìrí moò, wu nò jɨ̧ɨ̧́ á, ɓetí wu á kpɔ́knɨ mwin yàá bɨ ə́mní, ŋgáb dùgɨ̀ nɨ̀gwííb.

⁶Kpáín nùb ə́mní tíí, ŋgáb yi nyintɨ́ àm ɗûnɨ́m wu du ɓe kíí. Ŋgáb gɨ̀ndóŋnɨ tíí gwɨ̀ì ə́ré, wu ɨ́ kpɔ̂ ŋgáb hȩ Mèín du ɗúniì, ɗəŋhɨm ɨnayâna wu ndɨŋtɨ́ mîn.

⁷Ɓe ɨ́r ɓéhèé Kìn Kékéé á ŋgáb lə́ jȩ̀ȩ̀, ŋgáb ɨ́ mvû nùb Mèín mɨr ɗə̀ə̀ŋwáá kpɔ́k vúm ndu.

⁸Nɨ́m nùb Krístùù, á ɗúnɨ nɨ́m kpɔ́k kúúŋ nùb u̧ kíì, ɓwâ kɨ́ ə́r ɓéhèé kìn Mèèín àmɨrì kɨ́, nɨ́me ŋgáb a éì ŋgárɨ̀b ŋgárɨ̀b.

⁹Mɨ tɨinsonaá kpáín nùb ə́mní káàtà ti, ɨ́dù hȩ Dìyòtɨ́rèf ɗú nɨ́ kɨ̂ kùbèè, ŋgə́ ɨ́ dù nɨ́ nɨ́m mɨ tɨ tɨinso kɨ́ ɓɔ̧ɔ̧ áréwa.

¹⁰Àm kɨ́ á, ɓwâ mɨ ɓa gɨ̀sòniì, nɨ́ɨ́b ɓáŋhɨ́b ŋgə́ du ndɨ̀ŋniì lâs, mɨ á wáàsénɨ ɗàá. Ŋgə́ á nɨ́m lə́ə̀mnànɨ ɓáŋhîn, ŋgə́ á ɓwê nɨ́m kààŋ só tȩ́ȩ̀wúnɨ. Nɨ́m duɓagɨ ɓíí á kɨ́ ŋgə́ du mvó gàmnɨ gúúr mwin yàá bɨ ə́mní, nùb ɗúce vúm yè tɨ gaám ŋgábè, ŋgə́ a kàŋhȩ̀ nùb kɨ́, ŋgə́ a tàɓàcéyè ní yè juhó̧kíí ŋgáb kpáín nùb ə́mní no na rè.

¹¹Ɓwàjìrí moò, wu wu nɨ́m du ɓáŋhɨ́nne gàndɨ̀r, gàndɨ̀ wu nɨ́m du nyɔ̧né. Ɓetí nò ndɨŋlɨ́ŋ nyɔ̧né du nɨ nò Mèèín á, nò ndɨŋce ɓáŋhɨ́nne nɨ Mèín ɗə̀ə̀ŋwá.

¹²Nùb lâs á kúùmnɨ Dèmètɨ̀rûs, ɗɨ́m nyɔ̧ɔ̧́ ŋgéé á cè túùmnɨ ɨnayâna ŋgə́ á ndɨ̀ŋnɨ nɨ́ɨ́b nyɔ̧ɔ̧́. Nɨ́m ɓwê, nɨ́m á ŋgə́ ə́ə̀ŋnànɨ mɨ̀námé, wu ɗəəŋceé ɨnayâna nɨ́m nɨ́m ta kɨ́ á àmɨɨr.

¹³Mɨ á ɓe nɨ́ɨ́b ví̧i̧ mɨ nyinna wé, ɨ́dù sàmàìn mɨ tɨinsona wu tɨnné ɗàà.

¹⁴Jíìb kù hò̧ nɨ́me wu ɓainháá á, nɨ́m a tùɓà mîn.

¹⁵Ju ɗóóŋ dù ɓe wu. Ɓwàjììb woò nyindɨsoó wu. Nyindɨm ɓwàjììb nɨ́mè mwi̧í̧ mwi̧.