Read Vute Jûdə̀ 1 Bible Online

Jûdə̀ 1 - Vute bible

Jûdə̀ 1

¹Mɨ Jûdə̀, wúrúb Jáàk, mɨ nò du nɨ̀kɨ̧́ɨ̧ Yésù Krístùù, mɨ tana nùb Mèín ya ɓéré á. Ŋgáb nùb Mèín nò du Táà du ɗúnɨ, Yésù Krístù duce ŋgáb gə́tɨ̀niì.

²Mɨ yóóŋ Mèín ŋgə́ ók nyí mwàm. Ŋgə́ nàɓà nyí ju ɗóóŋ ɓe ɗûnɨ́m.

³Ɓwàjììb moò, mɨ yaá ɗúɓànɨ nyí tɨ̀nnànɨ ɓe ɨ́r ɓə́r duna nɨ́m lâs lè. Mɨ ɨ́ pê á ɗúnɨ mɨ tɨ̀ìnmè káàtà kɨ́ tààmnànɨ nyí njɔ̧̀, àm nyí a lɨ̀ɨ̀ŋhȩ̀ ɓe ɨ́r ə́ə́m Mèín ya na kɨ́ gwìí mwi̧í̧ nùb lâs ók ɓe ŋgéé rè.

⁴Ɓetí nùb ɓɨ́b kù yooréé bɨ́ síí mvókín nyínè no; ŋgáb á ŋgə̀ə̀mkɨ́nɨ Kìn du ɓe ɨ́r ndɨ̀ŋnyàáŋ Mèèín, àm ŋgáb du ju hȩ ŋgáb ɗúré, ŋgáb a mvû ə́ə̀mnɨ Yésù Krístù, ŋgə́ mwi̧ nò du Kéké ɓe Tá tɔ̀hí nɨ́mè. Kúúŋ nùb du ndɨ̀ŋnɨ u̧nèé, ténnèé àm ŋgábè ŋgwéné yaá cɨ̀ nɨ tɨinkí̧i̧ káàtà Mèèín no.

⁵Dùgɨ̀ hȩ nyí ɗəəŋɓacɨ sà̧à̧ Kéké ya ɓátɨhó̧ gbàŋ Ísràyéèl ti Èjíìbtə̀ no, ŋgə́ ɨ́ ndɨ̀ŋ kùb kwíhɨ̀ nùb ya mvú ŋgə́ ə́ə̀mniì rɨ, á ɗúnɨ mɨ vùùŋcùnàhá nyí àm kɨ́.

⁶Lə́əmcunáye dùgallɨb Mèèín kù ya du bɨ́ nyòm kùb ya na ŋgábè gə́tɨ̀wá, ŋgáb ɨ́ éíkî yɨ́ ŋgáb yi dukomndé rɨ. Mèín á ŋgáb gə́tɨ̀nɨ nìrì yɨ́ mɨ̀sɨ́mnɨ̀rí, há̧á̧ hȩ ye ŋgwìn jíri ɓa ɗóòniì.

⁷Lə́əmcunáye Sòdôm, Gòmóòr ɓe kwɨ́ì duteewo gə́nȩ̀né, nùb Sòdôm, Gòmóòr ɓe kwɨ́ì kɨ́ noò yi ndɨŋtɨ́ nɨ́m dùgallɨb kɨ́ yi ndɨŋ kɨ́: ŋgáb yi áá ŋguùŋ ŋgáb ɨ́ kɨ̂ tíí, ŋgáb ɨ́ yà ndɨ̀ŋnɨ nɨ́ɨ́b yi du hàrák ɗàwáá, ɗàrò ŋgáb á yínɨ wa du lɨ́mîn lɨ́ɨ̀mnɨ ɗàwáá no. Ju ŋgáb du kɨ́ ɨ́ duce tànànɨ nɨ̀vɨ́tɨ̀b ŋgáb gə́tìi ru.

⁸U̧ á nùb ɓɨ́b kɨ́ du ndɨ̀ŋɓwênɨ: Ŋgáb á ɓe mɨ̀lə́mkáín du gèrénɨ síí ŋgáb nɨ̀mibi cumí. Ŋgáb á jààŋkɨ́nɨ Ŋgɔ̧́ɔ̧̀ Kékéé, ŋgáb á jààŋkɨ́nɨ dùgallɨb ɓɨllɨnne du ɓe mgbíhɨ́rí.

⁹Nɨ́m Mísàyêl, dùgal kàm jíri Mèèín yi du ndɨ̀ŋwáá á kí. Ɓwâ ŋgə́ ɓe Sátàìn ya ndaikom ŋgáb a jundɨce fín Mòyíìs, ŋgə́ yi nɨ́ sátàìn àm ŋgwéé téínwa, ŋgə́ yi taɗóohá nɨ́ ɨnè: «Mèín túùm wu jábɨ́r!»

¹⁰Ɨ́dù nùb ɓɨ́b lè á bɨ́ àndɨ̀nɨ nɨ́m ŋgáb du ɗə̀ə̀ŋwáá, nɨ́m ŋgáb duce ndɨ̀ŋsésòɓànɨ ɗàá ku hȩ nɨ́m nyə̀m ndɨŋndé rɨ ɨ́ du ŋgáb láàŋkɨ́nɨ ru.

¹¹Jábɨ́r á ɓe ŋgáb, ɓetí ŋgáb tuú jɨ̀r Kàyə̧́ə̧̀; ɓe ɨ́r mònéè, ŋgáb ɨ́ kàŋ kààŋ hȩ Bàlâm yi ndɨŋndé, ŋgáb yi nduktɨ́, àm ŋgáb yi ndɨŋ ŋgwé ɓáŋhîn hȩ Kòrê.

¹²Ɓwâ nyí du ɓáhîn ɓe kùb mwin yàáb cɔɔ̀ŋ ndɨ, ju ŋgáb du nyínè tə̧né á nyí cɔŋ ɓɔ̧ɔ̧ ɓáàŋkɨ́nɨ, ɓetí ŋgáb á yúùnɨ súwá cɔɔ̀ŋ ŋgábè sə̀ré ɗàà, ŋgáb lə́əmce bɨ́ ɓwɨi ŋgáb nɨ̀mibi á. Ŋgáb á hȩ nà̧á̧ du sɨ́nnɨ a dù nɨ́ nàre. Ŋgáb á hȩ yɨ̀ɨ́b du bɨ́ gòmnɨ ɗàà, dùgɨ̀ ɓè ɓwâ gomndé ɗóoré. Ŋgáb du bɨ hȩ yɨ̀ɨ́b sárɨkí̧i̧, ducɨ bɨ́ kúrií á.

¹³Ŋgáb á ndɨ̀ŋnɨ nɨ́m sə̀réé hȩ ɓwâ tɔkain mɨ̀kwehɨ̀rí éíwoɓa, ɨ́dù a gò sèìnɨ káfə́ré sam sɔ̀ɔ́ rɨ u̧. Ŋgáb á dùɓàgɨ̀nɨ hȩ káŋyerɨ̀b du yə̀ŋtèèɓànɨ, u̧ rɨ yɨ́ juu Mèín mbɨ́kna ŋgábè á yɨ́ mɨ̀sɨ́mnɨ̀r lúklúk lɨ́.

¹⁴Hènôk, nyȩ tɨ́ɓamí Àdáàm ɨ́ du nò ya takɨ́yaye àm ŋgábè sóò ru, ɓetí ŋgə́ ya taá ɨnè: «Mɨ tànà nyí, Kéké ɓa gònɨ ɓe dùgallɨb noò vidɨ̧̀ á,

¹⁵àm ŋgə́ go ŋgùnnɨ nùb lâs, àm ŋgə́ téín nùb ɓáŋhɨ́b lâs àm ŋgwéé ɓe ɨ́r nɨ́ɨ́b ɓáŋhɨ́b ŋgáb ya ndɨŋ Mèèín, ɓe ɨ́r nyindí ɓáŋhɨ́b cɨcóòm kɨ́ ya nyin ɓe ɨ́r noò.»

¹⁶Nùb ɓɨ́b kɨ́ á óknɨ ɓáŋhîn, ŋgáb á nyi̧i̧teece. Ŋgáb á dùnɨ ju hȩ ŋgáb nɨ̀miib ɗúré; ŋgáb á nyìnnɨ nyindí ɓe tamŋgwé cúk, ŋgáb a mbətɨhó̧ce nɨ̀vɨ́tɨ̀b nɨ́m ŋgáré.

¹⁷Ɨ́dù kɨ́ nyínè, ɓwàjììb moò, lə́əmcunáye nɨ́m nùb tómé Yésù Krístù nò du Kéké nɨ́mè ya takɨ́na nyí ɓwâ kù rɨ.

¹⁸Ŋgáb ya tanahaá nyí ɨnayâna jíìb cáŋhɨ̀rí no, nùb kù kwá kə́ə nyí, ŋgáb kwá du ju ɗóhîn ɓe mɨ̀lə́mkáín ɓáŋhɨ́b ŋgábè sumíì ye.

¹⁹Nùb kɨ́ ɨ́ du kɨ́klénɨ gɔ̀ mvókín nɨ̀vɨ́tɨ̀bì ru; mɨ̀lə́m ŋgábè á nɨ́ kɨ́ nɨ̀vɨ́tɨ̀bì, ŋgáb bɨ ɓe Nyéhè Mèèín só ɗàà.

²⁰Ɨ́dù kɨ́ nyínè, ɓwàjììb moò, gɨnáam tíí ɓe gə́tèé ə́ə́m nyínè. Yóŋnáam Mèín ɓe nyòm Nyéhè Sarɨ́nne,

²¹ə́əŋnáam kpéín ɗûnɨ́m Mèèín no, móŋkɨ́nɨ mè mɨ̀cɨ̧̀ Yésù Krístù nò du Kéké nɨ́mè ɓa nyí nànɨ ɓe ɗûnɨ́m ŋgéé rè.

²²Nùb duye njɨ̀kkɨ́nɨ péín ə́mní rɨ, mbətɨrénáam ŋgáb.

²³Paahó̧kɨ́náam ŋgáb ŋgwìn Mèèín no, ɓátɨ̀nɨ ŋgáb. Mbətɨrénáɓwéem nùb kù ə́mní. Ɨ́dù gə́tɨnáam, nyí tɨ̀ gamɓwée nɨ́ ɗɨ́m mɨ̀lə́m ɓáŋhɨ́b ŋgábè kɨ́.

²⁴Mèín ŋgə́ mwi̧, ŋgə́ nò yi ɓátɨ nɨ́m ɓe ɨ́r Yésù Krístù nò du Kéké nɨ́mè, ŋgə́ nò fɨ́tɨ nyí gə́tɨ̀nɨ àm ə́ə́m nyínè tɨ̀ guré, ŋgə́ a ndɨ̀ŋkwà nyí fó̧ járkɨ́ták, ɓe mɨ̀tù cúk ə́ə̀ŋnɨ no tíí yɨ́ no mgbíhɨ́rí. Mgbíí, nyòme ɓe sɨr dù ɓe ŋgə́ yànɨ ɓwâ yi tíí, dùgɨ̀ ɗàrò ɓe ɓwâ lâs. Àmèn!