Read Vute Àpòkàlîb 1 Bible Online

Àpòkàlîb 1 - Vute bible

Àpòkàlîb 1

¹Káàtà rè no, Yésù Krístù viinaá Jâŋ nɨ́ɨ́b ɓa ndɨ̀ŋniì. Mèín yi naá Jâŋ nyòm vihe nɨ́ɨ́b ɓa ndɨ̀ŋnɨ kɨ́ àm túumna nùb ə́nna Kékéé nɨ́m mekɨ́cɨ ŋgób féínniì. Dùgal Krístù tómworé ɨ́ gò túùmnànɨ Jâŋ nò du nò ə́ré Krístùù nɨ́ɨ́b kɨ́.

²Jâŋ ɨ́ átè nɨ́ɨ́b ŋgə́ yi pə́ré lâs. Ŋgə́ ɨ́ tà Kìn Mèèín Yésù Krístù viina ní kɨ́ dumeɓa àmɨɨr á.

³Nò fain káàtà rè mɨ̀kùnɨ́nné á ɓe mɨ̀tù. Nò ókɓwée nyindí Kìn kɨ́ du nyìnnɨ ɓe ɨ́r jíì mwánnè ɓe cɨ́m yȩné, ɨ́ jə̀ŋɓwê nɨ́m du tɨín káàtà rè noò á ɓwê ɓe mɨ̀tù. Ɓetí ɓwâ yi du ɓwáin ɓe ɨ́r nɨ́ɨ́b ɓa ndɨ̀ŋnɨ kíì ŋgóobcií nɨ́.

⁴Nyìndí Jâŋ nyindɨso mɨ̀kwìn nùb ə́mní tɨ́ɓaám dutee ɗɔ̀ɔ́b Àsíì noò á ɨnè: Mɨ yóóŋ Mèín nò du dùniì, Ŋgə́ nò ya ɗóŋ dùniì, Ŋgə́ nò ɓace gòniì, ɓe nyéhɨ̀b tɨ́ɓaám du gín kò mvènnì noò nà nyí faám ɓe ju ɗóóŋ.

⁵Yésù Krístù nò du mɨ̀námé jɨ̧ɨ̧́, ŋgə́ nò ya səəmcuhó̧yaye mvókín nɨ̀kwíbí, ŋgə́ nò du ŋgáŋnɨ mvènnɨ́b ɗɔ̀bɨ́nné yaà, ŋgə́ nàɓwê nyí faám ɓe ju ɗóóŋ. Krístù á nɨ́m ɗúnɨ. Ɓe cwá ŋgə́ ya kúré, ŋgə́ yi ɓátɨhó̧ó̧ nɨ́m cum nɨ́mè no,

⁶ŋgə́ ɨ́ ndɨ̀ŋ nɨ́m sèì gbàŋ nùb na satɨgàà àm éína Mèín nò du Tá noò. Mgbíí ɓe nyòme dù ɓe Yésù Krístù tɨ́k kɨ̀ tɨ́k. Àmèn.

⁷Pə́náye ŋgə́ á gònɨ ɓɨɨr nàhí no, nò lâs kwá pə́ ŋgə́, dùgɨ̀ nùb ya túmndé ŋgə́ páín ɓwàríì. Gbàŋ ɗɔ̀bɨ́nné lâs kwá yɨ́ só ɓe àm noò. I̧i̧, ɓa ndɨ̀ŋmènɨ u̧ á. Àmèn.

⁸«Mɨ yààr á, mɨ cè cáŋhɨ̀r á.» Nɨ́m Mèín nò du Kékéé, duce ɓe nyòme lâs taré á kí. Ŋgə́ nò du dùniì, ŋgə́ nò ya ɗóŋ dùniì, ŋgə́ nò ɓace gòniì.

⁹Mɨ Jâŋ, mwin yàá nyínè, mɨ á pə́ɓwênɨ jábɨ́r ɓe péín ə́mní nyí du péniì. Mɨ duɓwée nò ŋgɔ̧́ɔ̧̀ Krístùù noò hȩ nyí á. Hȩ mɨ dùnɨ ɓaín ɓe Krístùù, mɨ á jíìɓwênɨ kɨhɨr hȩ nyí. Kùb ya bɨgeé mɨ tɨ́kwá̧a̧ Pàtmôs no àm mɨ ya ɓéhe Kìn Mèèín, dùgɨ̀ àmɨɨr Yésù ya viina mé.

¹⁰Ye Kékéé, Nyéhè Mèèín ɨ́ lê mɨ só, á mɨ ók kúu kàm kù mo cùrì ɓə́ŋnɨ hȩ tóŋ.

¹¹Kúu kɨ́ yaá tànɨ ɨnè: «Nɨ́m wu du péniì, tɨində́əm káàtà kù no, wu a tómnà mɨ̀kwìn nùb ə́mní tɨ́ɓaám ndè: Èfês, Sɨmíìrnə̀, Pèrgâm, Tìyàtíìr, Sáàrdə̀, Fìlàdèlfî, ɓe Làwòdìsê.»

¹²Mɨ ɓandɨcu cùrì pénɨ nò du mɨ nyìnnànɨ kɨ́, mɨ ɨ́ pê nɨ́ɨ́b kùb dɨhɨ túrúkáŋ yáà tɨ́ɓaám, lâs nyaŋhîn ɓe gôl.

¹³Mɨ ɨ́ pê nɨ́m kù hȩ nɨ̀vɨ́tè ə́əŋhó̧o̧ tɨŋtɨ̀ŋ nɨ́ɨ́b kíì. Sàró nó sóò yaá ŋgo̧ó̧, ɓe lí kù nyaŋhîn ɓe gôl kàmȩ́ȩ́ leendó̧o̧.

¹⁴Mvɨ̀tí ŋgéé ŋgwéné yaá mɨ̀vɨ́rì tóóm, íí wɔ̧ɔ̧́ mgbuu.

¹⁵Gurub noò yaá sánnɨ njakɨ́kɨ́ hȩ gôl rɨ u̧. Kúu nóò yaá ɓə́ŋnɨ hȩ ùr kàtɨ́b mvúmí.

¹⁶Ŋgə́ yaá ɓe káŋyerɨ̀b tɨ́ɓaám no ŋgáár lame bi̧í̧, jì̧í̧ kù a fó̧ceé no ɓɔ̧ɔ̧ úhîn péín ndè péín ndè. Ɓɨ̀m tíí noò yaá sánnɨ hȩ mvii.

¹⁷Ɓwâ mɨ pə́ ŋgéé, mɨ ɨ́ gùfúùsê no gure hȩ mɨ du kúri rɨ u̧. Ŋgə́ ɨ́ kɨ́kwû mɨ ŋgáár lam só, á ŋgə́ ta: «Wu wu vùù ô, mɨ yààr á, mɨ cáŋhɨ̀r á.

¹⁸Mɨ ɨ́ du nò du nànɨ mèè ru. Mɨ yi kúú, ɨ́dù ɗàrò mɨ á cɨ̀ mɨ jáŋ kɨ́ gwìí mwi̧í̧. Mɨ ndóóŋ cwé nyòme, kpər ɓavɨ̀r ko̧né á mo ŋgáré.

¹⁹Tɨinhácɨm nɨ́m wu du péniì. Dùgɨ̀ kɨ́ wu du pénɨ ɗàròò, dùgɨ̀ kɨ́ ɓa gòniì.

²⁰Njàb ndúkli káŋyerɨ̀b tɨ́ɓaám mo ŋgáár lame ɓe nɨ́ɨ́b kùb dɨhɨ túrúkáŋ yáà tɨ́ɓaám ndè á rè: Káŋyerɨ̀b tɨ́ɓaám ndè du dùgallɨb Mèèín du gə́tɨ̀nɨ mɨ̀kwìn nùb ə́mní tɨ́ɓaám ndè á. Nɨ́ɨ́b kùb dɨhɨ túrúkáŋ yáà tɨ́ɓaám ndè duce mɨ̀kwìn nùb ə́mní tɨ́ɓaám kɨ́ á.»