Read Vute Àpòkàlîb 10 Bible Online

Àpòkàlîb 10 - Vute bible

Àpòkàlîb 10

¹Cùr kɨ́ no, mɨ ɨ́ pə́kwà dùgal jíri Mèèín kù sónɨ ɓɨllin. Ɓɨ̀ yaá ŋgə́ só hȩ júk. Kum ɨ́ kə́ə̀ŋkɨ̀rɨ̀kî ŋgə́ ŋgwé. Ɓɨ̀m noò yaá hȩ mvii, gurub noò cè wa kɨ̀ wa, haám kɨ́ hȩ bɨ́rɨ̧́ yɔ̀ɔ.

²Ɓuùŋ káàtàà ti kù kumnîn yaá no ŋgáré. Ŋgə́ ɨ́ ɗèìsê gurub lam mɨ̀kwehɨ̀rí, gurub pèìn cè ɗàá sɨrí.

³Ŋgə́ ɨ́ nyìnɓà ɓe kúu tamnì hȩ ɓwâ kpə́b du tɨ́ŋniì. Cùr ŋgə́ yi nyin u̧nèé, ɓànné nàhí tɨ́ɓaám ndè ɨ́ ə́ə̀mtèèwò mgbɨ̀rɨ̀ɨ̀ŋ.

⁴Nyìnné ŋgáb nyin u̧nèé, mɨ ɨ́ ô kúu kù mɨ tàsónànɨ ɓɨllin ɨnè: «Nɨ́m wu ók ɓànné nàhí tɨ́ɓaám nyin ɗàrɨ́, gə́tɨrə́əm wo sumí, wu wu tɨín tɨ̀ìn.»

⁵Dùgal mɨ tɨ pə́ rè ɨ́ bɨ̀wû ŋgáár lam còóm,

⁶ŋgə́ ɨ́ sàbɓà ɓe ɨ́r Mèín nò du jáŋ tɨ́k kɨ̀ tɨ́ɨ́. Mèín nò ya nyaŋhȩ ɓɨɨr ɓe nɨ́ɨ́b du nóò lâs, ɗɔ̀ɔ́b ɓe nɨ́ɨ́b du nóò lâs, mɨ̀kwehɨ̀r ɓe nɨ́ɨ́b du nóò lâs, ŋgə́ ɨ́ tà ɨnè: «Mèín tɨ̀ nɨ ɓwáin ɓwáícɨ̀r.

⁷Ɨ́dù ye kùb ɓa óknɨ dùgal tɨ́ɓamí fɨ́ínɨ tóŋ ndɨ, ye kɨ́ á Mèín ɓa yúùgɨ̀nɨ ɓwáár noò yi du yo̧ó̧, hȩ ŋgə́ ya tana tɨ́kɨ̀nɨ́b noò du ŋgə́ éínàniì.»

⁸Á kúu mɨ tɨ ók nyìnsónɨ ɓɨllin ndè tanakwa mɨ ɨnè: «Dùgal du ə́ŋhîn gurub kù mɨ̀kwehɨ̀rí, gurub kù ɗàá sɨrí ɗàrɨ́, gɨm gàmhó̧nɨ ɓuùŋ ti káàtàà no ŋgáré kumnîn ɗàrɨ́.»

⁹Mɨ ɨ́ ŋgɨ̀ɨ̀sò gín dùgal lèè, mɨ ɨ́ tà: «Yée, na mɨ ɓuùŋ ti káàtàà rè.» Á ŋgə́ tana mɨ: «Gam, wu a tàŋ. Ɓa dùnɨ ɓɔ̧ɔ̧ hȩ lamé á, ɨ́dù ɓur ɓa wu ŋgɨ́nnɨ ɓe kí á.»

¹⁰Mɨ ɨ́ gàmhô̧ ɓuùŋ ti káàtàà rè, mɨ ɨ́ tàŋ. Yaá ɓɔ̧ɔ̧ hȩ lamé, ɨ́dù ɓwâ mɨ meiséré, ɓur ɨ́ yàrê mɨ ŋgɨ́nnɨ.

¹¹Á kùb ta: «Á ɗúnɨ wu tànàkwà gbààŋ bɨ ví̧i̧, tɨb ví̧i̧, ɓe mvènnɨ́b jííb Kìn Mèèín.»