Read Vute Àpòkàlîb 11 Bible Online

Àpòkàlîb 11 - Vute bible

Àpòkàlîb 11

¹Kùb ɨ́ nàrégì mɨ kɨ̀càì tamnì kù, yi du mɨ̀ɗúhɨ̀ní ŋgáré, kùb ɨ́ tànà mɨ ɨnè: «Gɨm ɗóònɨ Dúú jíri Mèèín, dùgɨ̀ tə́bə̀rè múbí, wu a fàìnɓwéhè nùb du mɨ ɗómnɨ yó kwe.

²Ɨ́dù mbɨ́k wu laŋtaŋ jíri, wu wu kí ɗóhɨ̀r, ɓetí kí mɨ ya mbɨ́knaá mɨ́ nùb Mèín mɨr ɗə̀ə̀ŋwáá. Ŋgáb kwá kpók nùb Yèrúsàlèèm ŋgwé ɗàá há̧á̧ njumi vii bɨrɨ́b ɨ́ yɔ̀k bɨrɨ́b.

³Mvókín njumi vii bɨrɨ́b ɨ́ yɔ̀k bɨrɨ́b kɨ́ no á mɨ ɓa tómnɨ tɨ́kɨ̀nɨ́b moò bɨrɨ́b, ɓe júk jɨ̀rí só, ŋgáb gɨ̀ tàtèènɨ Kìn Mèèín ndu.»

⁴Cin òlìvíyéè bɨrɨ́b ɓe túrúkáŋ bɨrɨ́b du Mèín nò du ŋgáŋnɨ ɗɔ̀ɔ́b lè yaà tíí rè ɨ́ du tɨ́kɨ̀nɨ́b mo bɨrɨ́b kɨ́ ru.

⁵Nò kù ɨ́ ɗû ŋgáb ndɨ̀ŋnɨ ɓáŋhîn, wa ɓa fó̧nɨ ŋgábè ɓɔ̧ɔ̧ á, a yíìkî nùb ɓəndɨ ŋgábè. Nò ɗú ŋgáb ndɨ̀ŋnɨ ɓáŋhɨ́nne, u̧ á du ɗúnɨ kwíìkɨ́ nò kɨ́.

⁶Tɨ́kɨ̀nɨ́b kɨ́ á ɓe nyòm bɨkɨ́ nàá há̧á̧ hȩ ɓwâ ŋgáb kwá cáŋhɨ tàtèé Kìn Mèèín. Ŋgáb á ɓwê ɓe nyòm ndɨŋ mvúm sèì tɨ́m. Ŋgáb á kwà ɓe nyòm ŋgáb ndɨŋ, ɓwâ lâs ŋgáb ɗúré, ɓáŋhîn nyin nyin kwà nùb ɗɔ̀bɨ́nné.

⁷Ɓwâ ŋgáb ɓa tàcáàŋnɨ Kìn moò, nyàm kàm kù hȩ mèékɨ̀r ɓa fó̧nɨ njaŋnjɨ̧ɨ̧́ gàìnwònɨ ŋgáb á, ŋgə́ a bɨ̀kwíìkî ŋgáb.

⁸Fɨ́nɨ́b ŋgábè ɓa dùnɨ laŋtaŋ kwɨ́í jírií yɨ́ kùb ya kpáaŋwú Kéké ŋgábè bɨ̧̀ɨ̧́ rɨ á. Kwɨ́í kɨ́ á ɓe jábɨ́r hȩ kɨ́ ya Sòdóòm, duceé u̧ ɗàà Èjîbtə̀.

⁹Nùb gbààŋ ɓe tɨb lâs tɨ̀ bɨ ə́mnɨ̀r kùb vɨ́rɨ̀ fɨ́nɨ́b ŋgábè, ŋgáb ɓa góòmyènɨ fɨ́nɨ́b kɨ́ há̧á̧ jíì taarɨ́b ɨ́ gbɨ́ktèìn á.

¹⁰Nùb ɗɔ̀bɨ́nné ɓa tɔ̀knɨ ɓe ɨ́r cwá nùb bɨrɨ́b kíì á. Mvókín ŋgábè no, ŋgáb ɓa kùb ɓoò tóòmnànɨ ɓúúm àm ŋgáb du mɨ̀tùú á, ɓetí tɨ́kɨ̀nɨ́b bɨrɨ́b kɨ́ ya jáabɓatɨ́ bɨ́ nùb ɗɔ̀bɨ́nné cei.

¹¹Ɨ́dù cùr jíì taarɨ́b ɨ́ gbɨ́ktèìn kɨ́, Mèín ɨ́ sə̀ə̀mcù ŋgáb, ŋgáb ɨ́ éícùwû còóm. Nùb pə́ ŋgábè lâs, vùù a bì nùb kɨ́.

¹²Tɨ́kɨ̀nɨ́b bɨrɨ́b lè ɨ́ ókgì kúu kàm kù tàsónànɨ ŋgáb ɓɨllin ɨnè: «Wúwonáam hò̧!» ŋgáb ɨ́ wúì ɓɨllin ɓàk kù no, nùb ɓəndɨ ŋgábè a góomwúce ŋgáb.

¹³Mvókín kɨ́ no ɓè mu̧u̧, ɗɔ̀ɔ́b ɨ́ jɨ̀ɨ̀ɓà, kúr tə̧ə̧́ gɔklȩ́ȩ cóóŋ, gbɨ́ktèìn mwi̧ ɨ́ lùŋhȩ̀, ɗà nɨ̀vɨ́tɨ̀b tɔ́sìn tɨ́ɓaám ɨ́ kû ɓe jɨ̀hèé ɗɔ̀bí kɨ́. Nùb meré, vùù ɨ́ bɨ̀ɓà ŋgáb, ŋgáb ɨ́ tà Mèín nò du ɓɨllɨnne á ɓe nyòme.

¹⁴Jábɨ́r bɨrɨ́bí ndóŋtɨ́, kɨ́ taarɨ́bí ɓawo ru.

¹⁵Dùgal tɨ́ɓamí ɨ́ fɨ́ì tóŋ. Kúu kàtɨ́b kù ɨ́ nyìnsówò ɓɨllin a tace ɨnè: «Ŋgɨ́ŋgɔ̧́ ɗɔ̀bɨ́nné ókcɨ nɨ ɗàrò ɓe Kéké nɨ́mè ɨ́ Mèsî ŋgéé ŋgə́ ya caré á, ŋgə́ ɓa ŋgáŋnɨ kɨ́ gwìí mwi̧í̧ á!»

¹⁶Kɨ̀jííb vɨríí ɨ́ nààsɨ̀b yi du du̧ú̧ kòó Mèèín tíí rè ɨ́ gùfúùsê ɗàá, ŋgáb ɨ́ ɗôm Mèín,

¹⁷ŋgáb a tace: «Kéké nò du ɓe nyòme lâs, wu nò duré, wu nò ya ɗóŋ dùniì, nɨ́m sáktií wu, wu nò túmnɨ nyòm woò, wu nò yaré ŋgáŋniì.

¹⁸Nùb Mèín mɨr ɗə̀ə̀ŋwáá tɨ á óknɨ ɓáŋhîn, ɨ́dù ɓwâ wu túmnɨ njùŋ woò ɗóotɨ́, ɓwâ wu ŋgwin nɨ̀kwíbí ɗóotɨ́; Ɓwâ wu na tɨ́kɨ̀nɨ́b du wu éínàniì, nùb ók ɓe wé, du wu jə̀ŋniì lɔ̀ɔ́ ɗóotɨ́, ŋgáb dùgɨ̀ nùb ɨ́r sóò, ŋgáb dùgɨ̀ nùb saai. Ɓwâ wu nduukɨ́ nùb du kùb kwíìtèènɨ ɗɔ̀bɨ́nné ɗóotɨ́!»

¹⁹Dúú jíri Mèèín ɨ́ kùùmgì ɓɨllin, mɨ ɨ́ pê bôk jin nyàáŋ no yó ku. Mɨ ɨ́ pê nyə́ŋhȩ̀ȩ́ nàhí, mɨ ɨ́ ô wùúm bɨ, ɓe ɓànné nàhí, ɗɔ̀ɔ́b ɨ́ jɨ̀hè, ɗà taar ɨ́ yà sùtɨ̀sónɨ.