Read Vute Àpòkàlîb 12 Bible Online

Àpòkàlîb 12 - Vute bible

Àpòkàlîb 12

¹Mɨ ɨ́ pê lɨ̀m kàm kù mwȩ́ȩ̀nɨ ɓɨllin; nɨ̀gwi kù mvii só ɓomnîn hȩ júk, njumi nó ɓusiín, kɨ̧̀ nyaŋhîn ɓe káŋyerɨ̀b cóóŋ ɨ́ bɨrɨ́b ŋgwéé handîn.

²Ŋgə́ yaá ɓe mwin só, ŋgə́ ɨ́ yà kɨ́ŋnɨ ɓe yíìnɨ́m fù̧ní.

³Lɨ̀m ji ɨ́ mwȩ́ȩ̀kwà ɓɨllin. Mɨ ɨ́ pê nyàm kàm kù hȩ ŋgɔ̀, síí jandîn, ɓe ŋgób tɨ́ɓaám, ɨ́ gaàm cóóŋ, ŋgób kɨ́ lâs kɨ̧̀ cutɨ́b ya.

⁴Vùùm káŋyerɨ̀b ɓɨllɨnne tə̧ə̧́ gɔklȩ́ȩ taarɨ́b, ŋgə́ ɨ́ ììsókî gbɨ́ktèìn mwi̧ ɗàá ɓe dum nóò. Ŋgə́ ɨ́ ə́ŋhȩ̀ nɨ̀gwi du móŋnɨ fù̧ú̧ rè tíí, móŋnɨ mwin sóó ɗàá ní a tàŋkî mwin kɨ́.

⁵Nɨ̀gwi rè ɨ́ fèìn mwin nɨ̀ŋgwá. Mwin kɨ́ ɨ́ ɓa gènɨ tɨb lâs ɓe íí wɔ̧ɔ̧́ ru. Ɨ́dù kùb ɨ́ hàìngèkî bɨ́ mwin ŋgéé kɨ́ gín Mèèín ɓe kò mvènnì noò.

⁶Nɨ̀gwi rè ɨ́ lùgè ŋgwàì ndɨ̀ŋnì, yɨ́ Mèín yi nyaaŋkɨ́na ŋgə́ yɨ́ juu, àm kùb a gə́tè ŋgə́ ku há̧á̧ jíì tɔ́sìn mwi̧ ɨ́ yɔ̀k təmərì bɨrɨ́b ɨ́ vii taarɨ́bí.

⁷Kí á su gugi ɓɨllin. Mísàyêl ɓe dùgallɨb noò, nyàm kàm ndè cè ɓe dùgallɨb noò, ŋgáb ɨ́ yà lèènɨ su.

⁸Ɨ́dù nyàm kàm ndè ɓe dùgallɨb noò ɨ́ gù su, kùb ɨ́ ŋgɨ́íhó̧kî ŋgáb ɓɨllin.

⁹Kùb ɨ́ lèèhô̧ nyàm kàm ndè lúu. Ŋgə́ ɨ́ du nyó̧ó̧ fìn ndu, kùb á ŋgə́ ɓénɨ Sátàìn nò mbáaŋtee nùb ɗɔ̀bɨ́nné lâs. Kùb ɨ́ lèèsówò ŋgə́ ɗɔ̀bín, ŋgə́ ɓe dùgallɨb noò lâs.

¹⁰Á mɨ ók kúu kàm kù tàsónɨ ɓɨllin ɨnè: «Ɓwâ Mèín ɓátɨ gbàŋ noò ɗóotɨ́. Mèín nɨ́mè túumgií nyòm mvènnì noò. Mèsî* noò ŋgə́ ya caré túumgií nyòm noò. Ɓetí nò ya ə́əŋkom Mèín nɨ́mè tíí gbándɨ̀nɨ mwin yàáb nɨ́mè cɨ́ɨ́m ɓe mvihin cúk lɨ, kùb juhó̧kíí ŋgə́ ɓɨllin.

¹¹Ɓe nyòm tɨ́m mwin ndèɗúú ɨ́ nyindí Mèèín ŋgáb ya ɓéeré á mwin yàá bɨ nɨ́mè ɓei ŋgə́ su ru. Ŋgáb ya kaikíí mè ɓoò, ŋgáb ɨ́ ə́mnè cwé.

¹²Àm kɨ́ á du ɗúnɨ nyí nùb du dùnɨ ɓɨllɨnne nyí ók mɨ̀tù. Ɨ́dù jábɨ́r á ɓe nyí, ɗɔ̀ɔ́b ɓe mɨ̀kwehɨ̀r, ɓetí Sátàìn sésoó yɨ́ nyínè mwîn ɓe njù̧, àm ŋgə́ ɗəŋhȩ ɨnayâna ɓwâ níì mecií nɨ́ ŋgób lè.»

¹³Ɓwâ nyàm kàm hȩ ŋgɔ̀ rè ɗəŋhɨ ɨnayâna kùb ŋgɨ́ísóó bɨ́ ní ɗɔ̀bín na rèé, ŋgə́ ɨ́ yàrê jùnɨ nɨ̀gwi tɨ fein mwin nɨ̀ŋgwá rè.

¹⁴Ɨ́dù kùb ɨ́ ɗòŋnà bɨ́ nɨ̀gwi rè gùgɔɔ̀ ndì kàm kwè, ŋgə́ ɨ́ mvɨ̀ìgè nɨ́ há̧á̧ ŋgwàì ndɨ̀ŋnì yɨ́ no juu. Ku á kùb yi ɓa ŋgə́ gə́tɨ̀nɨ há̧á̧ dáín taarɨ́b ɨ́ gbɨ́ktèìn, nyàm kàm ndè ŋgə́ kwàwá.

¹⁵Á nyàm ndè túŋteeso mvúm kàm kù nɨ̀gwi rèè cùrì, àm ŋgɨ́r mvúm kíì a hàìn ŋgéé.

¹⁶Ɨ́dù ɗɔ̀ɔ́b ɨ́ kpɔ̂ nɨ́ nɨ̀gwi rè. Ɗɔ̀ɔ́b ɨ́ mèìkî mvúm nyàm kàm ndè yi túŋteeso kɨ́.

¹⁷Hȩ nyàm ndè yi məm nɨ̀gwi rèè, ŋgə́ ɨ́ ô njù̧. Munɨ́b ɓe nyȩrɨ́b nɨ̀gwi rèè, yi jəŋkom ɓíhɨ̀b Mèèín ɓe àm Mèèín Yésù yi viiré, ŋgə́ ɨ́ gì ŋgáb ya njùŋwúnɨ.

¹⁸Nyàm kàm ndè ɨ́ gì ə́ə̀ŋnɨ saséé gín mɨ̀kwehɨ̀rí.