Read Vute Àpòkàlîb 13 Bible Online

Àpòkàlîb 13 - Vute bible

Àpòkàlîb 13

¹Cùr kɨ́ no, mɨ ɨ́ pê nyàm kù fó̧nɨ mɨ̀kwehɨ̀rí. Ŋgə́ yaá ɓe ŋgób tɨ́ɓaám, ɓe gaàm cóóŋ. Gaàm kɨ́ lâs kɨ̧̀ ya tèè. Ŋgób cóóŋ ndè cè lâs ɨ́ì andɨ Mèín ɓe kíí ya ti̧nɨ́b ti̧nɨ́b.

²Nyàm mɨ ya pə́ kɨ́ yaá fɨ́tɨ̀nɨ yə́m, gurùb kàtɨ́b ŋgéé yaá mvɨ̀tí kɨ̀ mvɨ̀tí, kaai kàtɨ́b yá wòò hȩ kɨ́ nyàm kùb ɓé ûrs lɨ u̧. Ɓɔ̧ kàm ndè cè hȩ kɨ́ kpə́bì. Nyàm kàm mɨ tɨ pə́yaye tíí hȩ ŋgɔ̀ rè ɨ́ nàɓwéhè ŋgə́ nyòme, kò mvènnì ɓe ŋgɨ́ŋgɔ̧́.

³Ŋgób tɨ́ɓaám ndè, ŋgwé mwi̧ yaá ɓe nɨ́m kù hȩ lààm kàm ɓàì kwè ya. Hȩ nùb ɗɔ̀bɨ́nné pénɨ kúúŋ nyàm u̧ kíì, ŋgáb ɨ́ yà ŋgə́ sènnɨ, á ŋgáb ɓáhe ŋgə́ tùnɨ.

⁴Nɨ̀vɨ́tɨ̀b ɨ́ yàrê ɗómnɨ nyàm kàm hȩ ŋgɔ̀ rè, àm ŋgə́ yi naɓbwéhe nyàm ku mwi̧í̧ rè ŋgɨ́ŋgɔ̧́ɔ̧́. Nɨ̀vɨ́tɨ̀b ɨ́ ɗómɓwéhè nyàm kù mwi̧í̧ kɨ́ ŋgáb a tace ɨnè: «Nò ɗóhe ɓe nyàm ndèè ɗàà, nò fɨ́tɨce lèènɨ su ɓe ŋgéé nɨ ɗàɓwêwá.»

⁵Nyàm kù mwi̧í̧ rè ɨ́ kwà nyòm ŋgə́ nyin nyindí tam ŋgwéé, ŋgə́ a àndè Mèèín. Ŋgə́ ɨ́ kwàkwà nyòm ŋgə́ ndɨŋ nɨ́m ŋgə́ ɗúré há̧á̧ njumi vii bɨrɨ́b ɨ́ yɔ̀k bɨrɨ́b.

⁶Nyàm kù mwi̧í̧ rè ɨ́ yàrê nyìnɓáàŋnɨ ɓe ɨ́r Mèèín. Ŋgə́ ɨ́ yàrê njà̧à̧ɓwênɨ ɨ́r Mèèín, dùgɨ̀ yɨ́ Mèín du dùniì, dùgɨ̀ nùb du dùnɨ ɓɨllɨnne lâs.

⁷Kùb ɨ́ nà ŋgə́ nyòm ŋgə́ lehɨ su ɓe gbàŋ Mèèín, ŋgə́ a ɓèì ŋgáb suu. Kùb ɨ́ nàkwà ŋgə́ nyòm ŋgə́ ŋgáŋ gbààŋ lâs ɓe tɨb lâs ya kwe.

⁸Nùb ɗɔ̀bɨ́nné lâs ɨ́r ɓoò du bɨ́ tɨín yàwòó yàllì káàtà du nànɨ mèè no ɗàà rɨ ɓa ŋgə́ ɗómnɨ á. Káàtà du nànɨ mè kɨ́ ók nɨ́ ɓe Mwin ndèɗúú kùb ya téínkɨ́ré á.

⁹«Nò du ɓe tó ók àmnì ókɓà mîn.

¹⁰Nò yi du ta̧á̧ kwá lə́ nìrì rɨ, kùb kwá gemehá bɨ́ ŋgə́ nìrì. Nò yi duce ta̧á̧ kwá kú ɓe jì̧í̧ rɨ, kùb kwá kwíimehá bɨ́ ŋgə́ ɓe jì̧í̧. Àm kɨ́ á du ɗúnɨ nùb gbàŋ Mèèín noò lâs dù ɓe jíhɨ́r péín ə́mní ru.»

¹¹Mɨ ɨ́ pə́kwà nyàm kù káínhó̧nɨ ɗɔ̀bín. Ŋgə́ yaá ɓe gaàm ŋgwéé bɨrɨ́b hȩ kɨ́ Mwin ndèɗúú. Kúu nyindíí noò yaá hȩ kɨ́ nyàm kàm hȩ ŋgɔ̀ rè.

¹²Nyàm ŋgób tɨ́ɓaám, ɓe lààm kàm kɨ́ mwi̧í̧ ya rè yi naá ŋgə́ nyòme. Ɓe nyòm kɨ́ á ŋgə́ duce kpɔ́ɔ̀nɨ nùb ɗɔ̀bɨ́nné lâs ɗóm nyàm ŋgób tɨ́ɓaám kɨ́, nò kɨ́ a pə́kɨ́ce ru.

¹³Nyàm yi káínhó̧ ɗɔ̀bín ndè yaá ɓà ndɨ̀ŋnɨ lìím kàtɨ́b. Ŋgə́ yaá ndɨ̀ŋnɨ wa éísó ɓɨllin gùùsónɨ ɗàá, nɨ̀vɨ́tɨ̀b a pə́ce.

¹⁴Lìím nyàm ŋgób tɨ́ɓaám ndè yi na ŋgə́ nyòm ndɨŋndé nyàm kɨ́ a pə́ce rè yaá ndɨ̀ŋnɨ nùb ɗɔ̀bɨ́nné fòb jɨ̀r Mèèín. Nyàm ndè yaá tànànɨ nùb ɗɔ̀bɨ́nné ŋgáb nyààŋ nɨ́m kù hȩ ɓɨ̀m nyàm kùb tɨ ɗə́mɨ ɨ́ dù nɨ́ kúwa rè, àm dɨmɨ ŋgéé.

¹⁵Kùb ɨ́ nà nyàm tɨ káínhó̧ ɗɔ̀bín ndè nyòm ŋgə́ na ɓɨ̀m nyàm ŋgób tɨ́ɓaám nɨ̀vɨ́tɨ̀b tɨ nyaŋhɨ rè fìí, àm ɓɨ̀m kɨ́ a wèì ɓɔ̧, ŋgə́ a kwíìkî nùb ɓa mvúnɨ ŋgə́ ɗómniì.

¹⁶Nyàm kɨ́ yaá kpɔ́ɔ̀nɨ nùb lâs, dùgɨ̀ nùb njɔdìì, dùgɨ̀ nùb tiri, dùgɨ̀ mbɔ́ɔ́, dùgɨ̀ mbɔ́ɔ́ sé, wu kwàhá lìím ŋgáár lam ya ɓe mɨ́ŋnì.

¹⁷Nò kù yi nɨ́ sàmàìn gwɨi nɨ́mí ɗàà, kɨ́ kù sə́rɨ̀nɨ sə́rîn, jɔ̀sé nò yi du ɓe ɨ́r kɨ́, kɨ́ kù lɨ̀m ɨ́r kíì sóò.

¹⁸Yɨ́ kɨ̀cáblì á rè. Nò du ɓe kɨ̀cáblì má ɗə̀ə̀ŋnɨ nɨ́m du kùb jáàbnɨ lɨ̀m ɨ́r nyàm ndèè noò, ɓetí du nɨ lɨ̀m nɨ̀rì á. Lɨ̀m kɨ́ du təmərì tínmwi̧ ɨ́ yɔ̀k vii taarɨ́b ɨ́ tínmwi̧ á.