Read Vute Àpòkàlîb 14 Bible Online

Àpòkàlîb 14 - Vute bible

Àpòkàlîb 14

¹Mɨ á cè góòmhánɨ, á mɨ pə́ Mwin ndèɗúú ə́ŋhîn ɓe Sìyôŋ ya, ŋgə́ ɓe nɨ̀vɨ́tɨ̀b tɔ́sìn təmərì mwi̧ ɨ́ yɔ̀k vii bɨrɨ́b ɨ́ nààsɨ̀b yi du ɓe ɨ́r noò, ɓe kɨ́ Tá noò tɨín mɨ́ŋnì.

²Mɨ ɨ́ ô kúu kù nyìnsónɨ ɓɨllin hȩ ùr kàtɨ́b mvúmí, hȩ ɓànné nàhí. Kúu mɨ yi ók kɨ́ yaá hȩ ɓwâ nɨ̀vɨ́tɨ̀b du kùnnɨ háàrpə̀ rɨ.

³Vùùm nùb kíì lâs yaá ə́ŋhîn sòŋnɨ wàì heé; kò mvènnì, nɨ́ɨ́b nààsɨ̀b hȩ nɨ̀vɨ́tɨ̀b lè ɨ́ kɨ̀jííb* a cè ɓo tíí ə́ŋhîn. Nò kù yi nɨ́ sàmàìn soŋ wàì kíì ɗàà, sé nùb tɔ́sìn təmərì mwi̧ ɨ́ yɔ̀k vii bɨrɨ́b ɨ́ nààsɨ̀b Mèín ya céíncuré.

⁴Nùb kɨ́ bɨ mààŋ[6] ndɨ̀ŋwá, ŋgáb gə́tií bɨ́ síí ɓóò járkɨ́ták. Ŋgáb á tùnɨ Mwin ndèɗúú yɨ́ lâs ŋgə́ du gìniì; kùb ya céínhó̧ó̧ ŋgáb mvókín nɨ̀vɨ́tɨ̀bì àm ŋgáb a dù nùb yàyɨ̀rí ók ɓe Mèín ɨ́ Mwin ndèɗúú.

⁵Àm kàŋnì kù nɨ ŋgábè ɓɔ̧ɔ̧ fó̧kɨ́yèwá, nɨ́m yɨ̀tíí kù nɨ ŋgábè só ɗàà.

⁶Mɨ ɨ́ pê dùgal kù mvɨ̀nnɨ còóm cóo; ŋgə́ yaá ɓe Kìn ŋgə́ tana tɨb ɓe gbààŋ ɗɔ̀bɨ́nné lâs ɓɔ̧ɔ̧, Kìn kwá melɨ́ŋ tɨ́ɨ́.

⁷Ŋgə́ yaá tànɨ kúu còóm ɨnè: «Jəŋnáam Mèín, nyí a mgbíhè ŋgə́, ɓetí ɓwâ ŋgə́ ŋgwin nùb ɗɔ̀bɨ́nné ɗóotɨ́; ɗómnáam nò ya nyaŋhȩ ɓɨɨr, ɗɔ̀ɔ́b, mɨ̀kwehɨ̀r ɨ́ munɨ́b cutɨ́b mvúmí lâs!»

⁸Dùgal bɨrɨ́bí ɨ́ tùndôŋ nò tɨ tíí rè ŋgə́ a tace: «Bàbìlôn jíri gumeɓagií. Ŋgə́ njóotɨ́ tɨb ɗɔ̀bɨ́nné ndɨ̀ŋ mààŋ hȩ súm á ŋgáb du mènnɨ!»

⁹Dùgal taarɨ́bí ɨ́ tùndôŋ nùb bɨrɨ́b tɨ tíí rè, ŋgə́ a tace kúu còóm ɨnè: «Nò ɓa ɗómnɨ nyàm ŋgób tɨ́ɓaám ndè ɓe ɓɨ̀m ŋgéé nɨ̀vɨ́tɨ̀b yi nyaŋhȩ rè, nò kɨ́ ɨ́ ə́ə̀mɓwéhè kùb kɨ́klénà ní lìím mɨ́ŋnì ɓe ŋgáár lame,

¹⁰súm njù̧ú̧ Mèín sɨllé tobȩ̀ȩ̀ rè, nò kɨ́ ɓa mèìɓwênɨ á. Nùb ndɨŋ u̧nèé lâs ɓa pénɨ jábɨ́r sûfɨ̀rə̀ no á, dùgallɨb Mèèín ɓe Mwin ndèɗúú tíí.

¹¹Wa jábɨ́rí ŋgábè kɨ́ ɓa lànnɨ tɨ́k kɨ̀ tɨ́k á. Nùb lâs ɗóm nyàm ndè ɓe ɓɨ̀m noò nɨ̀vɨ́tɨ̀b yi nyaŋhȩ rè, ɨ́ ə́mnè kùb kɨ́klénà vúm lɨ̀m noò ŋgáré ɓe mɨ́ŋnì rɨ, nùb kɨ́ kwá pə́ jábɨ́r tɨ́k kɨ̀ tɨ́k, jábɨ́r kɨ́ kwá nɨ ndoóm ndòm.»

¹²Àm kɨ́ á du ɗúnɨ nùb gbàŋ Mèèín noò lâs, du jə̀ŋnɨ ɓíhɨ̀b Mèèín ɨ́ jə̀ŋɓwê Yésùù, dù ɓe jíhɨ́r péín ə́mní.

¹³Cùr kɨ́ no, mɨ ɨ́ ô kúu kù nyìnsónɨ ɓɨllin ɨnè: «Tɨin ɨnè: ‹Mɨ̀tù á ɓe nùb kúré éí Kékéé no yànɨ ɗàròò!› ‹I̧i̧, Nyéhè Mèèín wáametɨ́ u̧. Nùb kɨ́ ɓa ùwèènɨ ə́rɨ́b tamnɨ̀b ɓoò á, ɓetí nɨ́ɨ́b nyɔ̧ɔ̧́ ŋgáb ya ndɨŋndé ɓa túùmnɨ àmɨɨr ŋgábè á!› »

¹⁴Mɨ á cè góòmhánɨ, á mɨ pə́ ɓàk kù mɨ̀vɨ́rì, ɓàk kɨ́ ya cè, nɨ́m kù du̧ú̧ hȩ nɨ̀vɨ́tè. Ŋgə́ yaá kɨ̧̀ ŋgwéé nyaŋhîn ɓe gôl, mɨ̀kpáìn úhîn ŋgáré bi̧í̧.

¹⁵Dùgal kù ɨ́ fó̧wò Mèèín yó. Nò tɨ du du̧ú̧ ɓàk lè ya rè, ŋgə́ ɨ́ tànà ŋgə́ kúu còóm ɨnè: «Yaréem ténnɨ, ɓetí ɓwâ ténndé ɗóotɨ́, nàám ɗɔ̀bɨ́nné waŋtɨ́!»

¹⁶Á nò tɨ du du̧ú̧ ɓàk lè ya rè yɔ́ksówo mɨ̀kpáìn ɗɔ̀bín, ŋgə́ ɨ́ téìn nàám ɗɔ̀bɨ́nné lâs.

¹⁷Dùgal kù ɨ́ fó̧kwà Mèèín yó, ɓɨllin ku. Ŋgə́ yaá ɓwê ɓe mɨ̀kpáìn úhîn ŋgáré.

¹⁸Dùgal kù éíwo yɨ́ tə́bə̀rè múbí* ɨ́ fó̧kwàhâ, ŋgə́ yaá ɓe nyòm kɨ́k waá. Ŋgə́ ɨ́ kɨ́ŋsònà nò yi du ɓe mɨ̀kpáìn úhîn ŋgáré rè ɨnè: «Yaréem ténnɨ gaar gum na súmé, ɓetí ŋgáb waŋtɨ́.»

¹⁹Ŋgə́ ɨ́ yɔ́ksówò mɨ̀kpáìn noò ɗɔ̀bín, ŋgə́ ɨ́ tȩ́nè gum na súmé ɗɔ̀bɨ́nné lâs, ŋgə́ ɨ́ lùùŋndê cɨcèè. Cɨ̀cè kɨ́ du jábɨ́r Mèín ɓa túùmniì á.

²⁰Kùb ɨ́ kàm gum yɨ̀ɨ́ kɨ́ cɨcèè ku kúr gə́nȩ̀ȩ́; tɨ́m ɨ́ yà jóbhó̧nɨ cɨcèè ku, ɨ́ kóòsê há̧á̧ kílòmétà təmərì taarɨ́b, lɨ́lé cè métà mwi̧ ɨ́ gbɨ́ktèìn.