Read Vute Àpòkàlîb 15 Bible Online

Àpòkàlîb 15 - Vute bible

Àpòkàlîb 15

¹Cùr kɨ́ no, mɨ ɨ́ pê lɨ̀m bɨ̀llì kù du nànɨ gbɨgbɨŋnéé ɓɨllin. Yɨɨ́m dùgallɨb tɨ́ɓaám á, ɓe jábɨ́r tɨ́ɓaám ŋgáré. Jábɨ́r kɨ́ yi ɨ́ du kɨ́b cáŋhɨ̀rí ru, ɓetí cùr jábɨ́r tɨ́ɓaám kíì á njùŋ Mèèín yi du cɔ̧́nɨ ru.

²Á mɨ pə́ nɨ́m kù hȩ ɓáá, mvúm kɨ́ láŋlaŋ, ɓáhîn ɓe wa; nyàm ŋgób tɨ́ɓaám ndè ɓe ɓɨ̀m noò nɨ̀vɨ́tɨ̀b yi nyaŋhȩ rè, ɨ́ lɨ̀m ɨ́r noò. Mɨ ɨ́ pê nùb ya ɓei ŋgáb suu. Nùb kɨ́ yaá ə́ŋhîn mvúm láŋlaŋ ndè ya, ɓe háàrpə̀[7] Mèín ya na ŋgábè ŋgáré ŋgáré.

³Ŋgáb yaá sòŋnɨ wàì Mòyîs nò ə́ré Mèèín yi kəblé, ɓe wàì Mwin ndèɗúú yi kəblé; wàì kɨ́ yaá ɨnè: «Kéké, Mèín nò du ɓe nyòme lâs, ə́rɨ́b woò á ɓà ɓe bɨ̀ɨ̀r, á cè nànɨ gbɨgbɨŋné! Wu nò du ŋgáŋnɨ tɨb ɗɔ̀bɨ́nné lâs yaà, ɓwáár woò á hàrák ɨ́ dùgwàhè ɗɨ́ɗɨ̧́!

⁴Nɨ̀vɨ́tɨ̀b lâs ɓa wu lùnɨ á, nùb lâs a mgbíhè ɨ́r woò, ɓetí wu ɨ́ du Mèín àmɨɨr. Nùb ɗɔ̀bɨ́nné lâs ɓa gònɨ wu ɗómnɨ á, ɓetí nùb lâs péé nɨ́ɨ́b ɗɨ́ɗɨ̧́ wu du ndɨ̀ŋniì.»

⁵Cùr kɨ́ no mɨ ɨ́ pê Dúú Mèèín kùùmnɨ ɓɨllin. Njáàŋ jin nyàáŋ Mèèín yaá yó ku.

⁶Dùgallɨb tɨ́ɓaám yi du ɓe jábɨ́r tɨ́ɓaám ŋgáré rè ɨ́ fó̧wò Mèèín yó ku. Ŋgáb yaá ɓe júúb mɨ̀vûú só ɓə̧̀nɨ ɓə̧ə̧́, ɓe lí kù nyaŋhîn ɓe gôl leendó̧o̧ kàméé.

⁷Nɨ́ɨ́b nààsɨ̀b yi du gín kò mvènnì hȩ nɨ̀vɨ́tɨ̀b lè, nò mwi̧ ɨ́ nà dùgallɨb tɨ́ɓaám toòb tɨ́ɓaám nyaŋhɨ́b ɓe gôl, lâs yú̧u̧ ɓe jábɨ́r Mèín nò du dùnɨ tɨ́k kɨ̀ tɨ́ɨ́ ɓa túùmniì.

⁸Mgbíí ɓe nyòm Mèèín ɨ́ yà mótɨ̀nɨ jùm, jùm kɨ́ ɨ́ yûk Mèèín yó fɨ̀tɨ̀b, yi nɨ́ sàmàìn nò kù lə́ Mèèín yóò ɗàà há̧á̧ hȩ jábɨ́r tɨ́ɓaám dùgallɨb yi gewo rè yi ɓa ndóŋniì.