Read Vute Àpòkàlîb 16 Bible Online

Àpòkàlîb 16 - Vute bible

Àpòkàlîb 16

¹Tií na mɨ ɨ́ ô kúu kàm kù nyìnhó̧nɨ Mèèín yó, tànànɨ dùgallɨb tɨ́ɓaám ndè ɨnè: «Gɨnáam sɨ̀ìsénɨ jábɨ́r Mèín ɓa túùmniì du toòb tɨ́ɓaám no hȩ súm ɗàrɨ́ ɗɔ̀bín!»

²Dùgal tíí ɨ́ gì, ŋgə́ ɨ́ sɨ̀ìsê tob noò ɗɔ̀bín. Nùb lâs yi du ɓe lɨ̀m nyàm ŋgób tɨ́ɓaám ndè só, yi duɓwéhe ɗómnɨ nò nɨ̀vɨ́tɨ̀b yi nyaŋhȩ rè, ɓàì wùr ɨ́ fó̧tèè ŋgábè só.

³Dùgal bɨrɨ́bí ɨ́ sɨ̀ìlê tob noò mɨ̀kwehɨ̀rí. Mvúm ɨ́ dùcù hȩ tɨ́m ləhîn, ɗà nɨ́ɨ́b jáŋ du mɨ̀kwehɨ̀rí lâs ɨ́ ndùk.

⁴Dùgal taarɨ́bí ɨ́ sɨ̀ìlê tob noò mvúm saibi, ɗà ɨ́ sèìkî lâs tɨ́m kɨ̀ tɨ́m.

⁵Á mɨ ókgi dùgal du kɨ́ɨ́nɨ mvúúm lâs tànɨ ɨnè: «Wu nò du járkɨ́ták, wu nò du dùnɨ, wu nò ya ɗóŋ dùniì, jábɨ́r wu túmnɨ u̧ kɨ́ á ɓà hàrák.

⁶Ɓetí ŋgáb yi kwíitɨ́ nùb gbàŋ Mèèín noò, ɓe tɨ́kɨ̀nɨ́b*. Ɗàrò, wu naɓa ŋgáb tɨ́m ŋgáb mə̀ttɨ gbák á!»

⁷Tií na, mɨ ɨ́ ô kúu kù nyìnwònɨ yɨ́ tə́bə̀rè múbí*, a tace ɨnè: «I̧i̧, Mèín nò du Kékéé. Wu nò du ɓe nyòme lâs, jábɨ́r wu du túùmniì á hàrák, á cè ɗɨ́ɗɨ̧́!»

⁸Dùgal nààsɨ̀bì ɨ́ sɨ̀ìwúsò kɨ́ noò mvihɨri còóm, mvii ɨ́ kwà nyòm ŋgə́ ɓwehɨ nɨ̀vɨ́tɨ̀b ɓe mɨ́màáŋ nóò.

⁹Nɨ̀vɨ́tɨ̀b ɨ́ ɓwèèɓà ɓe mɨ́màáŋ kàm kɨ́, ŋgáb ɨ́ yà njà̧à̧nɨ ɨ́r Mèín nò du ɓe nyòm túmnɨ kúúŋ jábɨ́r kíì. Dugɨ u̧, ŋgáb ɨ́ nyàhȩ̀ ɓàndɨ̀nɨ sum àm vúm tɨ̀ mgbíhɨ Mèèín.

¹⁰Dùgal ŋgibì ɨ́ sɨ̀ìwû tob noò kò mvènnì nyàm ŋgób tɨ́ɓaám ndèè ya, ɗà yɨ́ ŋgə́ yi ŋgáŋkomndé lâs ɨ́ sɨ́ɨ̀mɓà ndùúŋ, nɨ̀vɨ́tɨ̀b ɨ́ yà yúum tɔ̧̀ɔ̧́ ɓe yíìnɨ́m.

¹¹Ŋgáb ɨ́ njà̧à̧nɨ Mèín nò du ɓɨllɨnne ɓe ɨ́r jábɨ́r ɓe ɓààì ŋgábè kíì. Ŋgáb ɨ́ nyàmèhâ mbɨ́knɨ nɨ́ɨ́b ɓáŋhɨ́b ŋgáb yi ndɨŋkomndé.

¹²Dùgal tínmwi̧í̧ ɨ́ sɨ̀ìlê tob noò mvúm jíri kùb ɓé ƏÈfɨ̀rât lɨ no, ɗà mvúm kɨ́ ɨ́ cə́ə̀ŋkî, mbɨ́knànɨ mvènnɨ́b jííb éíwo péín mvii fó̧ré jɨ̀r ŋgáb ndóŋndé.

¹³Mɨ ɨ́ pê nyéhɨ̀b ɓáŋhɨ́b taarɨ́b hȩ mvùb fó̧nɨ nyàm tɨ hȩ ŋgɔ̀ rè ɓɔ̧ɔ̧, nyàm ŋgób tɨ́ɓaám ndè ɓɔ̧ɔ̧ ɓe tɨ́kìn kàŋnì ɓɔ̧ɔ̧.

¹⁴Nɨ̀wàtɨ̀b taarɨ́b kɨ́ ndɨŋ lìím á. Ŋgáb ɨ́ du gɨ̀tèènɨ yɨ́ mvènnɨ́b jííb ɗɔ̀bɨ́nné, ɓáàtèèwònɨ ŋgáb gwɨ̀ì suu ye Mèín nò du ɓe nyòme lâs ɓa ŋgùnnɨ nɨ̀vɨ́tɨ̀bì ru.

¹⁵Kéké taá ɨnè: «Ókye, mɨ á gònɨ hȩ ŋgàyɨ́r. Mɨ̀tù á ɓe nò dukɨ́ jáŋ, ɓe júk nóò kɨ́kkí̧i̧, kə́sə́k lə́rə́nɨ, àm ŋgə́ tɨ̀ ə́llé u̧ síí sam mvòròŋ, ɗà sə̀ré a bì ŋgə́ àm kùb pə́ ŋgə́ u̧nèé.»

¹⁶Nɨ̀wàtɨ̀b lè ɨ́ ɓáàsò mvènnɨ́b jííb yɨ́ kùb du ɓénɨ ɓe nyindí Èbɨ̀rə̂ Hàrmàgèdôŋ ndɨ.

¹⁷Dùgal tɨ́ɓamí ɨ́ sɨ̀ìwúkî tob noò còóm. Kúu kàm kù ɨ́ nyìnhô̧ Mèèín yó yɨ́ kò mvènnì duré, ɨ́ tà: «Àà, cɔ̧́tɨ́!»

¹⁸Mɨ ɨ́ pê nyə́ŋhȩ̀ȩ́ nàhí, mɨ ɨ́ ô wùúm bɨ, ɓànné nàhí, ɗɔ̀ɔ́b ɨ́ jɨ̀ɨ̀ɓà cei. Hȩ Mèín ya nyàŋhɨ̀ nɨ̀vɨ́tɨ̀bì, kúúŋ jɨ̀hèé kàm ɗɔ̀bí kɨ́ u̧ ndɨ̀ŋkɨ́yèwá.

¹⁹Bàbìlôn jíri ɨ́ gɔ̀ɔ̀rê tə̧ə̧́ taarɨ́b, ɗà dúhɨ́b kwɨ́ì jííb tɨb lâs noò ɨ́ lùŋhȩ̀. Mèín ɨ́ dù nɨ́ ɨ̀láŋwa nùb Bàbìlôn jírií; ɓe njùŋ kàm ŋgə́ yi du ɓe kíí, ŋgə́ ɨ́ mə̀ttè ŋgáb jábɨ́r.

²⁰Tɨ́kwá bɨ lâs ɨ́ lɔ̧́kî, ɓe ɓəb cúk.

²¹Taar kàtɨ́b lúhɨ́b sàmàìn kílò vii bɨrɨ́b ɨ́ yà sùtɨ̀sónɨ nɨ̀vɨ́tɨ̀b ya. Nɨ̀vɨ́tɨ̀b ɨ́ yà njà̧à̧nɨ Mèín ɓe àm ɓààì kàtɨ́b taar lè yi ɗə́me ŋgábè, ɓetí ɓààì kɨ́ yaá ɓà bɨ lȩ́ȩ.