Read Vute Àpòkàlîb 17 Bible Online

Àpòkàlîb 17 - Vute bible

Àpòkàlîb 17

¹Á dùgallɨb tɨ́ɓaám yi du ɓe toòb tɨ́ɓaám ŋgáré rè, nɨ̀mwi̧ mvókín ŋgábè noò go mɨ tànànɨ ɨnè: «Gom mɨ túùmnà wu hȩ Mèín ɓa nànɨ kwɨ́í jíri du ó̧o̧ gín mvúmí, du hȩ nɨ̀gwi sàkèè rè jábɨ́rí.

²Mvènnɨ́b jííb ɗɔ̀bɨ́nné ɓəttɨ́ ɓíì ŋguŋnì ŋgə́ yá, ɗà nùb ɗɔ̀bɨ́nné ɨ́ sèìcê àám ŋguŋnì ŋgéé kɨ́ hȩ súm.»

³Nyéhè Mèèín ɨ́ lê mɨ só, ɗà dùgal ɨ́ hàìngè mɨ ŋgwàì ndɨ̀ŋnì. Féín ku, mɨ ɨ́ pê nɨ̀gwi kù nyàm kù ya du̧ú̧, nyàm kɨ́ yaá jandîn cááŋ, ɨ́ì andɨ Mèèín só ti̧nɨ́b ti̧nɨ́b; ŋgób tɨ́ɓaám ɨ́ gaàm cóóŋ.

⁴Nɨ̀gwi kɨ́ yaá ɓe júúb kàtɨ́b dɨmɨri só. Nɨ́ɨ́b no sóò yaá kɨ́b kù nyaŋhɨ́b ɓe gôl, kɨ́b kù ɓe sɨɨ kù ɨnè njarɨ́b njarɨ́b. Kɨ́b kù ɓe njàráàb, kɨ́b kù cè hȩ du jandîn hȩ du súdì. Ŋgə́ yaá ɓe tob kù ŋgáré nyaŋhîn ɓe gôl, nɨ́ɨ́b nyáŋní sàkèè no kɨ́ no ɗéé.

⁵Ŋgə́ yaá ɓe ɨ́r kù mɨ́ŋnì tɨín, njàb kɨ́ ɨ́ dù nɨ́ yo̧ó̧. Ɨ́r kɨ́ yaá ɨnè: «Bàbìlôn jíri, yà sàkè ɓe nɨ́ɨ́b nyáŋní ɗɔ̀bɨ́nné.»

⁶Mɨ ɨ́ pê nɨ̀gwi kɨ́ á nɨ seín ɓe tɨ́m nùb gbàŋ Mèèín. Seín ɓe tɨ́m nùb kùb ya kwíhe àm ŋgáb yi du jə̀ŋnɨ Yésùù. Pê mɨ pə́ ŋgéé, mɨ ɨ́ gbɨ̀ɨ̀ŋɓà cei.

⁷Á dùgal tana mɨ ɨnè: «Wu gbɨɨŋce wú àm wu pə́ nyàm kù ŋgób tɨ́ɓaám ɓe gaàm cóóŋ hànnɨ nɨ̀gwi kù àm níì? Mɨ ɓa wu tànànyààŋnɨ njàb nɨ́m wu pə́ kíì á.

⁸Nyàm wu tɨ pə́ kɨ́ yaá jáŋ, ɨ́dù ɗàrò ŋgə́ nɨ jáŋ ɗàcɨ̀wá. Á ɗúnɨ ŋgə́ fó̧ njaŋnjɨ̧ɨ̧́, ɨ́dù gwɨ̀ì ŋgə́ ɓa nɨ́ lɔ̧́nɨ lɔ̧́ne. Nùb ɗɔ̀bɨ́nné ɨ́r ɓoò du tɨín yànɨ yàllì káàtà du nànɨ mèè no ɗàwáá, ɓa gbɨ̀ɨ̀ŋnɨ ɓwâ ŋgáb ɓa ŋgə́ péniì á, ɓetí ŋgə́ yaá jáŋ, ɨ́dù ɗàrò ŋgə́ nɨ jáŋ ɗàcɨ̀wá. Nɨ́m mwi̧ kùb ɓahá bɨ́ ŋgə́ pə́cùnɨ á.

⁹«Yɨ́ rè hò̧, á ɗúnɨ wu dù ŋgwé jáŋ, wu a dù ɓe kɨ̀cáàb. Ŋgób tɨ́ɓaám ndè du ŋgòom tɨ́ɓaám nɨ̀gwi rè du yá du̧ú̧ rè á, ŋgáb duɓwée mvènnɨ́b jííb tɨ́ɓaám á.

¹⁰Mvènnɨ́b jííb tɨ́ɓaám kɨ́, ŋgiì kúcií bɨ́, mwi̧ á yè ŋgáŋnɨ, mwi̧ kù cè féínyèwá. Ɓwâ ŋgə́ ɓace féínniì, Mèín ɓa mbɨ́knɨ ŋgə́ ŋgáŋhó̧ɗô ŋgób á.

¹¹Nyàm yi du jáŋ ɨ́ dùcì nɨ́ ɗàrò kúri rè, ŋgə́ nɨ̀mɨ́r ɨ́ du mvèìn sə́rì ru, ŋgə́ duɓwée nɨ̀mwi̧ kpáín nùb tɨ́ɓaám tɨ tíí rè noò á, ɨ́dù ŋgə́ cuwo nɨ gwɨ̀ì ŋgə́ ɓa nɨ́ lɔ̧́nɨ lɔ̧́ne á.

¹²«Gaàm cóóŋ wu tɨ pə́ɓwée ɗàrɨ́, du mvènnɨ́b cóóŋ du bɨ́ yàréyèwá ŋgáŋniì á. Ɨ́dù kùb ɓa ŋgáb nànɨ nyòm ŋgáb ŋgáŋhó̧ɗóo mvókín ti ŋgóbí á, ŋgábe nyàm ndè cúk.

¹³Vùùm ŋgábè cóóŋ lâs, kɨ̀cáàb ŋgábè ŋgwȩ́né á mwi̧. Kɨ̀cáàb kɨ́ á vúm kɨ́klé nyòm vúmè lâs éínànɨ nyàm ndè.

¹⁴Ŋgáb ɓa lèènɨ su ɓe Mwin ndèɗúú á, ɨ́dù Mwin ndèɗúú ɓe nùb noò Mèín ya caré, duce ŋgə́ jə̀ŋniì ɓa ŋgáb ɓə̀nnɨ su á, àm ŋgə́ du Kéké kùb kékébí ɓe mvèìn kùb mvènnɨ́bí.»

¹⁵Á dùgal tanakwa mɨ ɨnè: «Mvúúm lâs wu tɨ pə́ yɨ́ nɨ̀gwi kàm sàkèè tɨ du ə́ŋhîn ɗàrɨ́, tɨm gbààŋ bɨ ɓe tɨb lâs á.

¹⁶Gaàm cóóŋ wu tɨ pə́ nyàm ndèè ŋgwéé rè ɓe nyàm kɨ́ nɨ̀mɨr ɓa ɓə̀ndɨ̀nɨ nɨ̀gwi kàm sàkèè rè á; ŋgáb ɓa ákɨ́nɨ nɨ́ɨ́b lâs ŋgə́ du ɓe kíí á, ŋgáb a njòrɨ̀kî nɨ́ɨ́b no sóò lâs, ŋgə́ a mè síí sam, ŋgáb ɓa tàŋhó̧nɨ sɨ́r no sóò á, nɨ́ɨ́b meré ŋgáb a tòŋkî.

¹⁷Ɓetí Mèín yi mbɨ́kléé mɨ̀lə́m ŋgáb ndɨŋ nɨ́m ŋgə́ ɗúré ŋgábè njɔ̧̀; ŋgáb ɓa dùnɨ lâs kúu mwi̧ á, ŋgáb a kɨ́klê nyòm ŋgábè lâs éínànɨ nyàm ndè, há̧á̧ hȩ nyindí Mèèín ɓa fó̧nɨ hàráá.

¹⁸«Nɨ̀gwi wu tɨ pə́ ɗàrɨ́ du kwɨ́í kàm jíri, mvèìn nokwe du ŋgáŋnɨ mvènnɨ́b tɨb ɗɔ̀bɨ́nné lâs ya kwe á.»