Read Vute Àpòkàlîb 18 Bible Online

Àpòkàlîb 18 - Vute bible

Àpòkàlîb 18

¹Cùr kɨ́ no, mɨ ɨ́ pê dùgal ji kù sónɨ ɓɨllin. Mèín yi naá ŋgə́ nyòme, síí nóò yaá sánnɨ sáin, ɗà mwa kɨ́ ɨ́ èrɨ̀kî ɗɔ̀ɔ́b bɨ̂ŋ.

²Ŋgə́ ɨ́ tà kúu còóm ɨnè: «Bàbìlôn jíri gumeɓagií; ŋgə́ ducɨ nɨ ɗàrò yɨ́ nɨ̀wàtɨ̀b ɓe kúúŋ nyéhɨ̀b ɓáŋhɨ́b lâs duré á. Kúúŋ gààì ɓáŋhɨ́b lâs kùb du ɓə̀ndɨ̀niì duɓwée ɓè á.

³Ŋgə́ njóotɨ́ tɨb ɗɔ̀bɨ́nné lâs ndɨ̀ŋ mààŋ hȩ súm á ŋgáb du mènnɨ. Mvènnɨ́b ɗɔ̀bɨ́nné ndɨŋtɨ́ mààŋ ɓe ŋgə́, nùb ndɨŋ mákə́tìì dɨmtɨ́ éí kàm sàkèè ŋgéé ndóŋnîn kɨ́ ya.»

⁴Mɨ ɨ́ ô kúu ji tàsónɨ ɓɨllin ɨnè: «Gbàŋ moò, éíhó̧kɨ́ná nɨ ŋgə́ nó, nyí tɨ̀ lə́ɓwée nɨ́ ndɨ̧̀ɨ̧́ cumí ŋgéé kɨ́ no, jábɨ́r Mèín ɓa ŋgə́ túùmnɨ rè nyí tɨ̀ pə́ɓwée nɨ́.

⁵Ɓetí cum nóò aaŋtɨ́ nɨ́ jɔ̀, Mèín cè nɨ́ ɨ̀láŋwa ɓáŋhɨ́b ŋgə́ ndɨŋndé.

⁶Nɨ́m ŋgə́ yi ndɨŋ kùbè, ɓáabnáam. Ɓáabnáam nɨ́m kɨ́ há̧á̧ gwì bɨrɨ́b. Məttɨnáam ŋgə́ jábɨ́r a ndôŋ kɨ́ ŋgə́ ya məttɨ nyínè.

⁷Jɨ̀ ŋgə́ ya dukom ju dɨmɨri ɓe ju nyɔ̧ɔ̧́ rɨ, túùmnànáɓwê ŋgə́ jábɨ́r u̧. Ɓetí ŋgə́ á tànɨ no sumí ɨnè: ‹Mɨ á hò̧ yɨhîn hȩ màm, mɨ mɨ mámkwííb sé, cwé kwá nɨ mɨ kwà.›

⁸Àm kɨ́ á jábɨ́r du ŋgə́ móŋkɨ́niì ɓa ŋgə́ kwànɨ lâs ye mwi̧; jábɨ́r kɨ́ du yáb cwéé, cwé nɨ̀mɨr ɓe cɨ̧̀ á; wa ɓa ŋgə́ yíìkɨ́nɨ á ɓetí Mèín nò du Kékéé, duce ŋgə́ jábɨ́r kɨ́ túùmniì á ɓe nyòme.»

⁹Mvènnɨ́b jííb ɗɔ̀bɨ́nné, ŋgə́ ɓe ŋgáb yi dukom ju màŋnì ɓe ju nyɔ̧ɔ̧́ rɨ ɓa kɨ́ínɨ á. Ɓwâ ŋgáb ɓa pénɨ jùm ŋgə́ du yíniì mwéíwúnɨ rɨ, a yíì ŋgáb só.

¹⁰Vùù jábɨ́r ŋgə́ ɓa péniì ɓa ŋgáb bìnɨ á, ŋgáb a ə́ə̀ŋsò bɨ́ cóo, ŋgáb a tà: «Yée, Bàbìlôn, wu nò ya du kwɨ́í kàm jíri du ɓe nyòmeè, á kùb cáaŋkɨ́ wu ɨnè mbáàwá rè à!»

¹¹Ɓa yínɨ nùb ndɨŋ mákə́tìì só á, ŋgáb ɓa kɨ́ínɨ á ɓetí nò gwɨi nɨ́ɨ́b mákə́tìì ŋgábè nɨ ɗàcɨ̀wá.

¹²Nɨ́ɨ́b mákə́tìì kɨ́ yɨɨ́m: nɨ́ɨ́b lééb kùb nyaŋhɨ ɓe gôl, ɓe tú̧ kùb nyaŋhɨ mòné noò, ɓe sɨɨ kù ɨnè njarɨ́b njarɨ́b ɨ́ njàráàb á. Kúúŋ júúb kàtɨ́b dɨmɨri lâs. Yɨ̀ɨ́b kùb du kwàkɔ́ɔ̀nɨ ɗàwáá, ɓe burôŋjə̀, ɓe tú̧, ɓe sɨɨ kùb ɓé márɨ̀bɨ̀rə̀ rɨ.

¹³Kúúŋ kúrúùm ɓe làmɨ́ndààb du ɓe mòné yaà lâs, súm, mùm fàrîn, ndèìn, jírɨ́b, ɗə̧́nɨ́b, màtúwààb ɗə̧́nɨ́b ɗamlɨ́ŋndé, ɓe mbɔ́klɨ́b á.

¹⁴Nùb ndɨŋ mákə́tìì a tànà Bàbìlôn ɨnè: «Nɨ́ɨ́b nyɔ̧ɔ̧́ wu ya ɗú kwàniì lɔ̧́kíí bɨ́. Njɔdì woò cɔ̧́tɨ́, wu tɨ̀ wu njɔdì kɨ́ kwàcùr!»

¹⁵Nùb ya kwa njɔdì ɓe mákə́tì ŋgáb yi ndɨŋkom kwɨ́í kɨ́ noò, ɓa ŋgáb só yínɨ á. Ŋgáb ɓa óknɨ vùù á, ŋgáb a ə́ə̀ŋsò cóo. Ŋgáb ɓa kɨ́ínɨ á.

¹⁶Ŋgáb a tà: «Yée, kúúŋ jábɨ́r ŋge á kwɨ́í lè du ɓe kí rè! Ŋgə́ yaá ɓe kúúŋ júúb dɨmɨri lâs só. Nɨ́ɨ́b lééb noò yaá nyaŋhɨ́b ɓe gôl, ɓe sɨɨ njarɨ́b njarɨ́b, ɓe njàráàb.

¹⁷Kùb nduukíí vùùm njɔdì kíì lâs mbáàwá!» Nùb ge kwááì jííb, dùgɨ̀ nùb gùrí nokwe, dùgɨ̀ nùb ə́ré nokwe ɓe nùb yi yəŋkom nó àm mákə́tìì lâs yaá ə́ə̀ŋsònɨ cóo.

¹⁸Ɓwâ ŋgáb ya pə́ jùm ŋgə́ du yíniì, ŋgáb ɨ́ yà tànɨ ɨnè: «Kwɨ́í ɗóhɨ ɓe kwɨ́í kàm ndèè yi nɨ́ ɗàà!»

¹⁹Yaá ŋgáb só yínɨ, ŋgáb ɨ́ yà sà̧à̧wúnɨ mvútúúb ŋgwéé ŋgáb a kɨ́íce. Ŋgáb a tace: «Yée, kúúŋ jábɨ́r ŋge á kwɨ́í kàm ndè du ɓe kí rè! Nùb yi du ɓe kwááì jííb lâs yi kwahó̧kom njɔdì kɨ́b ŋgéé no á, ŋgə́ məmtɨ́ nɨ́ɨ́b kɨ́ lâs mbáàwá!»

²⁰Nùb ɓɨllɨnne óknáam mɨ̀tù ɓe cáŋhȩ̀ȩ́ kùb cáaŋkɨ́ ŋgə́ kɨ́. Nùb gbàŋ Mèèín, nùb tómé* ɓe tɨ́kɨ̀nɨ́b Mèèín* óknáam mɨ̀tù, ɓetí Mèín túumtɨ́ ŋgə́ jábɨ́r ɓe ɨ́r ɓáŋhîn ŋgə́ ya ndɨŋ nyínè.

²¹Á dùgal jíri Mèèín kù hainwú sɨɨ kàm kù, haám kɨ́ yaá hȩ jùm gwìí, ŋgə́ ɨ́ ŋgɨ́tɨ̀rékî mɨ̀kwehɨ̀rí, ŋgə́ a tace: «Ɨnè á Mèín ɓa cáàŋkɨ́nɨ Bàbìlôn kwɨ́í jíri, ɓe nyòme cúk, kùb a tì dù bɨ́ ŋgə́ pə́cɨ̀r.

²²Kùb tɨ̀ bɨ wùúm háàrpə̀ ɓe nùb soŋ wòrí, dùgɨ̀ nɨ́ɨ́b kurɨ́b yɨ́ woò ókcɨ̀r. Kùb tɨ̀ bɨ nùb ə́ré kù yɨ́ woò kwàcɨ̀r. Kùb tɨ̀ bɨ wùúm gwìí yɨ́ woò ókcɨ̀r.

²³Mwa lámbàà tɨ̀ nɨ yɨ́ woò ɓə̀cɨ̀r. Gùúm tɨ̀ nɨ yɨ́ woò ɓùcɨ̀r. Ɗɔ̀ɔ́b lè no, nùb yi ndɨŋkom mákə́tì yɨ́ woò yaá ɓe njɔdì cei. Ɓe ə́rɨ́b cwéé woò, wu mbáaŋtɨ́ gbààŋ bɨ lâs.»

²⁴Kùb ya túum wu Bàbìlôn ndè jábɨ́r àm kùb ya kwa tɨ́m tɨ́kɨ̀nɨ́b Mèèín* ɓe tɨ́m nùb gbàŋ Mèèín, dùgɨ̀ tɨ́m nùb kùb ya kwíhɨ ɗɔ̀ɔ́b lè noò lâs yɨ́ woò rè á.