Read Vute Àpòkàlîb 19 Bible Online

Àpòkàlîb 19 - Vute bible

Àpòkàlîb 19

¹Cùr kɨ́ no, mɨ ɨ́ ô vùùm kàm nɨ̀vɨ́tɨ̀bì gbə̀mnɨ ɓɨllin ŋgáb a tace kúu còóm ɨnè: «Álèlúyà! Ɓə́r, mgbíí ɓe nyòme dù ɓe Mèín nɨ́mè.

²Ŋgwìn ŋgéé á hàrák, á cè ɗɨ́ɗɨ̧́! Ɓetí nɨ̀gwi kàm sàkèè yi du ɓáàŋkɨ́nɨ ɗɔ̀ɔ́b lè ɓe ə́r màŋnì rè, ŋgə́ ténntɨ́ nɨ̀gwi kɨ́ àm ŋgwéé. Mèín lɔ̧tɨ́ síí àm nɨ̀gwi kɨ́ yi kwíikɨ́na ŋgə́ nùb no ə́ré.»

³«Álèlúyà! Jùm kwɨ́í kàm ndè du mwéíniì á wúínɨ kɨ́ gwìí mwi̧í̧!»

⁴Kɨ̀jííb* vɨríí ɨ́ nààsɨ̀b lè ɓe nɨ́ɨ́b nààsɨ̀b hȩ nɨ̀vɨ́tɨ̀b lè ɨ́ cáàmsê ɗàá, ŋgáb ɨ́ yà ɗómnɨ Mèín, ŋgə́ á cè du̧ú̧ kò mvènnì ya; ŋgáb yaá tànɨ ɨnè: «Àmèn, álèlúyà!»

⁵Mɨ ɨ́ ô kúu kù nyìnwònɨ kò mvènnì ya a tace ɨnè: «Gbəmnáam Mèín nɨ́mè. Nyí lâs, nyí nùb no ə́ré. Nyí nùb du ŋgə́ jə̀ŋniì, dùgɨ̀ nùb ɨ́r sóò, dùgɨ̀ nùb saai!»

⁶Mɨ ɨ́ ókkwà kúu nɨ̀vɨ́tɨ̀b ví̧ne gbə̀mwònɨ hȩ ùr kàtɨ́b mvúmí, hȩ ɓànné kàm nàhí. Ŋgáb yaá tànɨ ɨnè: «Álèlúyà! Kéké nò du Mèín nɨ́mè, ŋgə́ nò du ɓe nyòme lâs, ŋgə́ léé ŋgɔ̧́ɔ̧̀ noò no.

⁷Nɨ́m ókná mɨ̀tù, nɨ́m mgbíìná ŋgə́, ɓwâ jùrúb gùúm mwin ndèɗúú ɗóotɨ́. Kóóm noò á cè nɨ́ nyaaŋkí̧i̧.

⁸Kùb tɨ naá ŋgə́ nyòm ŋgə́ lə́ nyààŋ kàm júk sarîn du ɓə̀ə̀niì.» (Nyààŋ kàm júú rè du nɨ́ɨ́b nyɔ̧ɔ̧́ nùb gbàŋ Mèèín yi ndɨŋndé á.)

⁹Dùgal ɨ́ tànà mɨ ɨnè: «Tɨin ɨnè: Mɨ̀tù á ɓe nùb kùb yi ɓé jùrúb gùmní mwin ndèɗúú.» Ŋgə́ ɨ́ tàkwà ɨnè: «Kìn àmɨrì Mèèín á ɗàrɨ́.»

¹⁰Mɨ ɨ́ gùcáàmsê no ɓusiín ŋgə́ ɗómnɨ, ɨ́dù ŋgə́ ɨ́ tànà mɨ ɨnè: «Wu wu u̧ ndɨ̀ŋ, mɨ duɓwée mɨ nò ə́nna Mèèín hȩ nyíne mwin yàá bɨ woò Yésù ya viina Kìn àmɨrìí rɨ á. Ɗómbɨ̂ŋ wu Mèín!» Kìn àmɨrìí Yésù ya viiré ɨ́ du nànɨ tɨ́kɨ̀nɨ́b* nyòm ŋgáb ɓéhe kìn Mèèín ndu.

¹¹Mɨ ɨ́ pê ɓɨɨr kumnîn, ɗà ɗə̧́ə̧́ mɨ̀vɨ́rì kù ɨ́ mwȩ́ȩ̀hô̧. Nò yi du ɗə̧́ə̧́ kɨ́ yaà, ɨ́r noò yaá jɨ̧ ɓe àmɨɨr. Ŋgù̧ú̧ ŋgə́ du ŋgùnniì, ɓe sɔk ŋgə́ du lèèniì á ɗɨ́ɗɨ̧́.

¹²Íí noò yaá wɔ̧ɔ̧́ mgbuu. Kɨ̧̀ ŋgwéé fá̧à̧. Ŋgə́ yaá ɓe ɨ́r kù só tɨín, nò kù yi nɨ́ ɨ́r kɨ́ ɗə̀ə̀ŋwá, sé ŋgə́ mwi̧.

¹³Ŋgə́ yaá ɓe sàró kù só, tɨ́m ya mgbɨŋtɨɨŋ, ɨ́r noò yaá «Kìn Mèèín».

¹⁴Kúùŋ sójààb ɓɨllɨnne yaá ŋgə́ tùnɨ. Ŋgáb yaá ɗə̧́nɨ́b mɨ̀vúùb ya, ɓe nyààŋ kàtɨ́b júúb mɨ̀vúùb du ɓə̀ə̀niì só só.

¹⁵Jìn úhîn kù ŋgə́ ɓa ɓə̀nnɨ su ɓe kíí yaá fó̧nɨ no ɓɔ̧ɔ̧. Ŋgə́ kwá ge ŋgáb ɓe íí wɔ̧ɔ̧́. Cɨ̀cè du jábɨ́r Mèín nò du ɓe nyòme lâs ɓa túùmniì rɨ, no á ŋgə́ ɓa ŋgáb fòŋnɨ ru.

¹⁶Sàró ŋgéé ɓe ɓɨ̀r ŋgéé ya, ɨ́r kù yaá tɨín ɨnè: «Mvèìn kùb mvènnɨ́bí, Kéké kùb kékébí».

¹⁷Mɨ ɨ́ pê dùgal* kù ə́əŋhó̧o̧ mvihɨri tə̧ə̧́. Gààì bɨ lâs du mvùrɨ̀tèènɨ còóm cóo, ŋgə́ ɨ́ kɨ́ŋsònà ŋgáb ɓe kúu tamnì ɨnè: «Gonáam, ɓáawonáam tàŋnɨ cɔŋ jíri Mèín ɓéwona nyínè.

¹⁸Gonáam tàŋnɨ sɨ́r mvènnɨ́bí, sɨ́r nùb kɨ́ɨ́ mvènnɨ́b sójàbì ɓe sójààb nɨ̀miib. Sɨ́r ɗə̧́nɨ́bí ɓe kɨ́ nùb wúí ŋgábè. Sɨ́r nɨ̀vɨ́tɨ̀b lâs, sɨ́r mbɔ́klɨ́bí ɓe kɨ́ nùb du mbɔ́ɔ́ séé. Sɨ́r nùb ɨ́r sóò ɓe kɨ́ nùb saaibi.»

¹⁹Á mɨ pə́ nyàm kàm tɨ ŋgób tɨ́ɓaám ɓe gaàm cóóŋ ndè, mvènnɨ́b jííb ɗɔ̀bɨ́nné ɨ́ sójààb ɓoò, ɓáhîn lâs àm lehɨ su ɓe nò yi du ɗə̧́ní rè ɓe sójààb noò.

²⁰Kùb ɨ́ bì nyàm kàm ndè ɓe tɨ́kìn kàŋnì yi ndɨŋkom nɨ́ɨ́b sɨ̀sɨ̀rí no tíí ŋgə́ a pə́ce rè, (ɓe nɨ́ɨ́b sɨ̀sɨ̀rí kɨ́ á ŋgə́ ya mbáŋhɨ nùb kùb yi kɨ́kléna lɨ̀m nyàm ndèè tíí, ŋgáb ɨ́ ɗómcè ɓɨ̀m nyàm kíì nɨ̀vɨ́tɨ̀b ya nyaaŋndé ru.) Kùb ɨ́ lèèrê nyàm kàm ndè ɓe tɨ́kìn kàŋnì rè ɓáí sûfɨ̀rə̀ du yínɨ yí̧ne no.

²¹Nùb meré ɨ́ ndùkcè ɓe jìn yi fó̧kom nò yi du ɗə̧́ní rè ɓɔ̧ɔ̧ rè, ɗà gààì lâs ɨ́ sàì fíín ŋgábè ya.