Read Vute Àpòkàlîb 2 Bible Online

Àpòkàlîb 2 - Vute bible

Àpòkàlîb 2

¹Á nɨ́m mɨ yi pə́ hȩ nɨ̀vɨ́tè rè tana mɨ ɨnè: «Tɨnnam dùgal du gə́tɨ̀nɨ mɨ̀kwìn nùb ə́mní Èféès ɨnè: «Nò du bìnɨ káŋyerɨ̀b tɨ́ɓaám ŋgáár lame, duce dùnɨ tɨŋtɨ̀ŋ nɨ́ɨ́b tɨ́ɓaám kùb dɨhɨ túrúkáŋ yáà, nɨ́m ŋgə́ wáaré á rè:

²Mɨ ɗəəŋtɨ́ ɗɨ́m wóò lâs, mɨ ɗəəŋtɨ́ jábɨ́r wu yi pə́ré, mɨ ɗəəŋceé jíhɨ́r wu du ɓe kíí. Mɨ ɗəəŋtɨ́ sàmàìn wu jíhɨ nùb ɓáŋhɨ́bí ɗàà; nùb du bɨ́ nùb tómé sé ɨ́dù ŋgáb a tà vúm nùb tómé á na rɨ, wu kəhií ŋgáb, wu ɨ́ pê ŋgáb bɨ tɨ́kàŋkáàŋ á.

³Wu á ɓe jíhɨ́r. Wu péé jábɨ́r ɓe ɨ́r moò, ɨ́dù wu cè wú mɨ mbɨ́kháwa.

⁴Ɨ́dù nɨ́m mɨ du wu no yètɨ̀niì á àm wu du wú mɨ ɗúcɨ̀nɨ hȩ yàá yàllì ɗàà rè.

⁵Lə́əmcuye ɗɨ́m wu ya du ɓe kí tíí, ɓandɨm sum, wu a ndɨ̀ŋcù nɨ́m wu ya ndɨŋkom yàá yàllì. Wu ɨ́ dù wú sum ɓàndɨ̀wá, mɨ ɓa gònɨ wo yó á, mɨ a ákî túrúkáŋ wóò yɨ́ no juu.

⁶Nɨ́m du nyɔ̧ɔ̧́ ɓe wé á, wu á wu ɓə̀ndɨ̀ɓwênɨ nùb Nìkòláà cùrìì hȩ mɨ ɓəndɨ ŋgábè.

⁷«Nò lâs du ɓe tó ók àmnì, ókɓà mîn nɨ́m Nyéhè Mèèín du tànànɨ mɨ̀kwìn nùb ə́mní bɨ rè.» «Nùb ɓace ɓə̀nnɨ suu, yɔ̀ ɓɨllin du nànɨ mè rɨ, mɨ ɓa ŋgáb nànɨ nyòm taŋ guum yɔ̀ kíì pàràdî á.»

⁸Nɨ́m mɨ yi pə́ hȩ nɨ̀vɨ́tè rè ɨ́ tànà mɨ ɨnè: «Tɨnnam dùgal du gə́tɨ̀nɨ mɨ̀kwìn nùb ə́mní Sɨmíìrnə̀ ɨnè: «Nò du yààr, duɓwée cáŋhɨ̀r, ŋgə́ nò ya kú kú̧u̧ ɨ́ sə̀ə̀mcùú, nɨ́m ŋgə́ wáaré á ɨnè:

⁹Mɨ ɗəəŋtɨ́ jábɨ́r woò, mɨ ɗəəŋtɨ́ tii woò, ɨ́dù wu wu ɓe tii ɗàà, (wu á wú ɓe njɔdì!) Nùb du bɨ́ Jwîf[1] sé ɨ́dù ŋgáb a tà vúm bɨ Jwîf á rɨ, mɨ ɗəəŋtɨ́ ɓáŋhîn ŋgáb du wu nyìnnɨ sóò. Ŋgáb du bɨ mɨ̀kwìn nùb Sátààìn á.

¹⁰Wu wu vùù ô àm wu ɓa jábɨ́r péniì. Gə́tɨm, Sátàìn ɓa kɨ́klénɨ nùb ví̧i̧ mvókín nyínè noò nìrì á, àm kəhɨ nyínè; nyí a pê jábɨ́r há̧á̧ jíì cóóŋ. Jíhɨm há̧á̧ cwéé, mɨ ɓa wu hàndɨ̀nànɨ kàŋ du túúm mèè á.

¹¹«Nò du ɓe tó ók àmnì, ókɓà mîn nɨ́m Nyéhè Mèèín du tànànɨ mɨ̀kwìn nùb ə́mní bɨ rè. «Nùb kwá ɓei suu, cwá gwì bɨrɨ́bí[2] kwá nɨ ŋgáb bɨ̀r.»

¹²Nɨ́m mɨ yi pə́ hȩ nɨ̀vɨ́tè rè ɨ́ tànà mɨ ɨnè: «Tɨnnam dùgal du gə́tɨ̀nɨ mɨ̀kwìn nùb ə́mní Pèrgáàm ɨnè: «Nɨ́m nò du ɓe jì̧í̧ ŋgáré úhîn péín ndè péín ndè wáaré á rè:

¹³Mɨ ɗəəŋtɨ́ yɨ́ wu du dùniì, wu du yɨ́ Sátàìn du ŋgáŋniì á. Wu á ɓà ɓaín ɓe mɨ. Ə́ə́m wu du ce ɓe kí péín moò cè nɨ́ gùwá, dùgɨ̀ ɓwâ kùb ya kwíhe Àŋtìpâs, mɨ̀námé jɨ̧ɨ̧́ moò nyínè ku, yɨ́ Sátàìn du dùniì rɨ.

¹⁴Nɨ́m mwi̧, wu á wú gə́tɨ̀nɨ nùb du bɨ́ tùnɨ tɔ̀ɔ́ Bàláàm yɨ́ woò. Bàlâm kɨ́ yaá njóònɨ Bàlâk ndɨ̀ŋ nùb Ísràyéèl tàŋ fè kùb mób mèín saai ɓe kíí, ŋgáb a ɓèìɓwê ɓíì du ɓe ɨ́r ŋguŋnì àm ŋgáb a gùrê cumí. Nɨ́m mɨ du wu no yètɨ̀niì á kí.

¹⁵Wu á kwà wu tùnɨ tɔ̀ɔ́ nùb Nìkòláà cùrìì.

¹⁶Ɓandɨm sum, duú u̧ ɗàà, hò̧ mvin ti ŋgób, mɨ ɓa wu gàìnsònɨ á. Ɓe jì̧í̧ du fó̧nɨ mo ɓɔ̧ɔ̧ rè, mɨ a lèhè su ɓe kí.

¹⁷«Nò du ɓe tó ók àmnì, ókɓà mîn nɨ́m Nyéhè Mèèín du tànànɨ mɨ̀kwìn nùb ə́mní bɨ rè. «Nùb kwá ɓei suu, mɨ ɓa ŋgáb nànɨ Mân[3] du yo̧né á. Vùùm ŋgábè lâs, mɨ ɓa nànɨ nɨ̀mwi̧ sɨɨ mɨ̀vɨ́rì ɨ́r heé du yá tɨnné á. Nò kù tɨ̀ nɨ ɨ́r kɨ́ ɗə̀ŋhɨ̀r, sé nò ɓa kwànɨ sɨɨ kíì.»

¹⁸Nɨ́m mɨ yi pə́ hȩ nɨ̀vɨ́tè rè ɨ́ tànà mɨ ɨnè: «Tɨnnam dùgal du gə́tɨ̀nɨ mɨ̀kwìn nùb ə́mní Tìyàtíìr ɨnè: «Mwin Mèèín íí du wɔ̧ɔ̧́ mgbuu, gurùb cè sánnɨ hȩ gôl lè, nɨ́m ŋgə́ wáaré á rè:

¹⁹Mɨ ɗəəŋtɨ́ ɗɨ́m wóò lâs, mɨ ɗəəŋtɨ́ ɗûnɨ́m wóò, ɓe jɨ̧ wu du ɓe kíí, njɔ̧̀ kpɔ̂ kùŋ mwin yàá ɓe jíhɨ́r wu du ɓe kíí. Mɨ ɗəəŋtɨ́ nɨ́ɨ́b wu du ndɨ̀ŋnɨ ɗàròò, ndóŋtɨ́ kɨ́ yàwòó yàllì.

²⁰Ɨ́dù nɨ́m mɨ du wu no yètɨ̀niì á rè: Jèsàbêl, nɨ̀gwi ta ní tɨ́kìn Mèèín á na rè, ŋgə́ á njóònɨ nùb du mɨ ə́nnàniì ŋgáb ndɨ̀ŋ mààŋ, ŋgáb a tàŋkwà fè kùb mób mèín saai ɓe kíí àm ŋgáb a gùrê cumí, wu a mbɨ́kce ŋgə́ ndɨ̀ŋ nɨ́m kɨ́.

²¹Mɨ mbɨ́knaá ŋgə́ mvókín ŋgə́ ɓandɨ sumí, ɨ́dù ŋgə́ ɗúnɨ mbɨ́knɨ ɗɨ́m nó sàkèè kɨ́ ɗàà.

²²Àm kɨ́ á mɨ ɓa ndɨ̀ŋnɨ ŋgə́ gù yə́b, dùgɨ̀ nùb ya ndɨŋ mààŋ ɓe ŋgéé, mɨ ɓa ŋgáb túùmnàɓwênɨ jábɨ́r cei á, sé ɓè ŋgáb ɓandɨ sum ŋgáb ɨ́ mbɨ̂ nɨ́m ŋgáb yi ndɨŋkom ɓe ŋgéé.

²³Mɨ a ndɨ̀ŋkwà nùb yi tukom ŋgéé lâs kúu. U̧ á mɨ̀kwìn nùb ə́mní lâs ɓa ɗə̀ə̀ŋnɨ ɨnayâna mɨ ɨ́ du nò ɗəŋhȩ mɨ̀lə́m nɨ̀vɨ́tɨ̀bì ɓe nɨ́ɨ́b ŋgáb ɗúré lâs lu. Vùùm nyínè lâs, mɨ ɓa túùmnɨ nɨ̀mwi̧ jábɨ́r ɗóhîn ɓe nɨ́m ŋgə́ ya ndɨŋndé á.

²⁴«Kɨ́ nyí nùb mece mɨ̀kwìn nùb ə́mní Tìyàtíìr noò, hȩ tɔ̀ɔ́ yo̧ó̧ Sátàìn du ɓe kí, nùb kɨ́ talɨ́ŋ ndɨ́, nyí nɨ ə́ə̀mwá. Mɨ tanaɓa nyí àmɨɨr wááŋ á, mɨ tɨ̀ mɨ nyí ha̧á̧ kù ŋgwéé ɗòbwúcɨ̀r.

²⁵Ə́əŋnáɓam kpéín ə́ə́m nyínè no, há̧á̧ hȩ mɨ ɓa cùwòniì.

²⁶«Nùb kwá ɓei suu, ŋgáb ɨ́ jə̀ŋ nɨ́m mɨ ɗúré há̧á̧ cáŋhɨ̀rí, mɨ ɓa ŋgáb nànɨ nyòm kɨ́ɨ́ nùb Mèín mɨr ɗə̀ə̀ŋwáá á.

²⁷Ŋgáb kwá ge nùb kɨ́ ɓe íí wɔ̧ɔ̧́, ŋgáb a ɔ̀hè ŋgáb hȩ nɔɔ̀b vɨ́tè.

²⁸Hȩ mɨ yi gam nyòm kɨ́ yɨ́ Tá moò, mɨ á ŋgáb nàɓwênɨ u̧. Mɨ ɓa ŋgáb nàɓwênɨ káŋyerè yekɨ́rɨ̀bì[4] á.

²⁹«Nò du ɓe tó ók àmnì, ókɓà mîn nɨ́m Nyéhè Mèèín du tànànɨ mɨ̀kwìn nùb ə́mní bɨ rè.»