Read Vute Àpòkàlîb 20 Bible Online

Àpòkàlîb 20 - Vute bible

Àpòkàlîb 20

¹Cùr kɨ́ no, mɨ ɨ́ pê dùgal kù sónɨ ɓɨllin. Ŋgə́ yaá ɓe kpər njaŋnjɨ̧ɨ̧́, ɨ́ háínkòb kàm kù ŋgáré bi̧í̧.

²Ŋgə́ ɨ́ bì nyàm kàm hȩ ŋgɔ̀ rè. Nyàm kɨ́ ɨ́ du nyó̧ó̧ fìn, Sátàìn nò mbáaŋtee nùb ɗɔ̀bɨ́nné lâs lu. Ŋgə́ ɨ́ kpàllê ŋgə́ háínkòb ŋgáré, ŋgə́ dù no há̧á̧ dáín tɔ́sìn mwi̧.

³Dùgal ɨ́ lèèrésò ŋgə́ njaŋnjɨ̧ɨ̧́, ŋgə́ ɨ́ kpàìkî ɓavɨ̀r, ŋgə́ ɨ́ sáblè àm ŋgə́ a dù no há̧á̧ hȩ dáín tɔ́sìn mwi̧ ndè ɓa ndóŋniì, ŋgə́ tɨ̀ fó̧cuye gìnɨ mbáàŋtèènɨ nùb ɗɔ̀bɨ́nné. Cùr kɨ́ no, Mèín a mbɨ́kcùhó̧gì ŋgə́ mvókín ti ŋgób.

⁴Mɨ ɨ́ pê kò mvènnì bɨ. Nùb yi dutee yá du̧né, kùb ɨ́ nà ŋgáb nyòm ŋgáb ŋgáŋndé. Nùb kùb ya kwíhe àm ŋgáb ya ta kìn àmɨrìí Yésù ya viiré, ɨ́ kìn Mèèín ndɨ, mɨ ɨ́ pə́ɓwê nyéhè ŋgábè. Ŋgáb ya bɨ́ ɗómwa nyàm kàm hȩ ŋgɔ̀ rè, dùgɨ̀ ɓɨ̀m noò nɨ̀vɨ́tɨ̀b ya nyaaŋndé. Kùb ya bɨ́ ŋgáb kɨ́knàɓwêwá lɨ̀m nyàm ndèè mɨ́ŋnì, dùgɨ̀ ŋgáré. Ŋgáb ɨ́ sə̀ə̀mcù, ŋgáb ɨ́ ŋgáŋɓáhè ɓe Mèsî* há̧á̧ dáín tɔ́sìn mwi̧.

⁵Nɨ̀kwííb meré ɨ́ dù bɨ́ sə̀ə̀mcùwá há̧á̧ hȩ dáín tɔ́sìn mwi̧ rè yi cɔ̧́ré. Sə̀ə̀mcùhô̧ cwéé yàyɨ̀rí á kí.

⁶Mɨ̀tù á ɓe nùb səəmcuhó̧yaye cwéé kɨ́, ŋgáb ók bɨ́ ɓe Mèín á. Ŋgáb tɨ̀ bɨ cwá gwì bɨrɨ́bí ɓa dùnɨ wa̧á̧ rè kúcɨ̀r, ŋgáb ɓa dùnɨ nùb na satɨgàà* àm ə́nna Mèín ɓe Mèsíì* á, ŋgáb ɓace ŋgáŋɓáànɨ ɓe Mèsî* há̧á̧ dáín tɔ́sìn mwi̧ á.

⁷Ɓwâ dáín tɔ́sìn mwi̧ ndè ɓa ndóŋniì, Mèín a mbɨ́khó̧gì Sátàìn.

⁸Ŋgə́ a gò mbáàŋnɨ tɨb dutee ɗɔ̀bɨ́nné lâs, kí ta Gôk ɓe Màgôk na á. Ŋgə́ ɓa ŋgáb ɓáànɨ àm suu á. Ŋgáb ɓa dùɓà nɨ ví̧i̧ hȩ sasé gín mɨ̀kwehɨ̀rí á.

⁹Ŋgáb érɨsokíí ɗɔ̀ɔ́b bɨ̂ŋ, ŋgáb gií kɨ̀rɨ̀nɨ kwɨ́í ɗûnɨ́mí Mèèín, yɨ́ gbàŋ noò duré. Ɨ́dù Mèín tómsówoó wa ɓɨllin gò ŋgáb ndùùkɨ́nɨ.

¹⁰Á kùb leerégi Sátàìn nò yi mbáaŋkom ŋgábè ɓáí sûfɨ̀rə̀ du yínɨ yí̧ne no, yɨ́ kùb tɨ leeré nyàm kàm ndè ɓe tɨ́kìn kàŋnì rè. Ŋgáb ɓa pénɨ jábɨ́r no tɨ́k kɨ̀ tɨ́k á, cɨ́ɨ́m ɓe mvihin cúk.

¹¹Á mɨ pə́ kò mvènnì kàm kù mɨ̀vɨ́rì ɓe nò yi du yá du̧né, ɗɔ̀ɔ́b ɓe ɓɨɨr ɨ́ lɔ̧́kî bɨ́ gín nóò, kùb ɨ́ dù bɨ́ ŋgáb pə́cùcɨ̀wá.

¹²Cùr kɨ́ no, mɨ ɨ́ pê nɨ̀kwííb, nùb ɨ́r sóò ɓe nùb saai ə́ŋhîn kò mvènnì tíí. Kùb ɨ́ kùmnè káàtààb, kùb ɨ́ kùùmkwà káàtà ji. Kí yɨɨ́m káàtà mè mɨ̀cɨ̧̀ɨ̧́ á. Kùb ɨ́ ŋgwìn nɨ̀vɨ́tɨ̀b ɗóhîn ɓe nɨ́m ŋgáb yi ndɨŋndé yi du tɨín káàtààb kɨ́ noò.

¹³Mɨ̀kwehɨ̀r ɨ́ wààcùhô̧ fíín ya du ŋgə́ nóò. Cwé ɓe ko̧ ɨ́ wààcùhô̧ fíín ŋgáb ya gə́tɨkomndé. Kùb ɨ́ ŋgwìn nùb lâs ɗóhîn ɓe nɨ́m ŋgáb ya ndɨŋndé.

¹⁴Kùb ɨ́ wààrê cwé ɓe ko̧ ɓáí waá no, ɓáí waá kɨ́ du cwá gwì bɨrɨ́bí á.

¹⁵Kùb ɨ́ lèèrê nùb lâs yi du ɓe ɨ́r ɓoò tɨín káàtà mè mɨ̀cɨ̧̀ɨ̧́ no ɗàwáá ɓáí waá no.