Read Vute Àpòkàlîb 21 Bible Online

Àpòkàlîb 21 - Vute bible

Àpòkàlîb 21

¹Cùr kɨ́ no, mɨ ɨ́ pê ɓɨɨr heé ɓe ɗɔ̀ɔ́b heé. Ɓɨɨr fìn ɓe ɗɔ̀ɔ́b fìn yi lɔ̧́kíí bɨ́, mɨ̀kwehɨ̀r yi nɨ́ ɗàɓwêcɨ̀wá.

²Á mɨ pə́ Yèrúsàlèm heé Mèín tómsóworé sónɨ ɓɨllin, nyaaŋkí̧i̧ hȩ nɨ̀gwi gùmní nyaaŋce síí gìnɨ yɨ́ ŋgwáhé rɨ u̧.

³Mɨ ɨ́ ô kúu tamnì kù nyinwo kò mvènnì yaà tànɨ ɨnè: «Ɗàrò yá juu Mèèín á nɨ̀vɨ́tɨ̀bì tə̧ə̧́. Ŋgə́ ɓa dùnɨ ɓe ŋgáb á, ŋgáb a dùcè gbàŋ bɨ ŋgéé. Mèín nɨ̀mɨr ɓa dùnɨ ɓe ŋgáb á, ŋgə́ a dù Mèín ŋgábè.

⁴Ŋgə́ ɓa pə̀kkɨ́nɨ ɨ́sɨ̀m ŋgábè íhɨ́nné á. Cwé tɨ̀ nɨ dùcɨ̀r. Kɨ́kɨ́í, bɨ̀ìmèrè ɓe yînɨ́m tɨ̀ bɨ dùcɨ̀r ɓetí nɨ́ɨ́b fɨ̀ìn lâs lɔ̧́kíí bɨ́.»

⁵Á nò yi du kò mvènnì ya rè wáhe ɨnè: «Ɗàrò, mɨ ndɨŋtɨ́ nɨ́ɨ́b lâs dù heé.» Á ŋgə́ tana mɨ: «Tɨin, ɓetí nɨ́ɨ́b mɨ nyin kɨ́ á àmɨɨr, á cè sàmàìn kùb səŋ gíí ɓe nɨ́m mɨ nyin kíì.»

⁶Ŋgə́ ɨ́ tàkwà: «Àà, cɔ̧́tɨ́. Mɨ yààr á, mɨ cè cáŋhɨ̀r á. Nò síì mvúmí du ndɨ̀ŋniì, mɨ ɓa túwònɨ mvúm ŋgóndúm mvúm du nànɨ mèè no á, mɨ a nà ŋgə́ kɨ́ samí.

⁷Nò ɓa ɓə̀nnɨ suu, mɨ ɓa nò kɨ́ nànɨ nyər á. Mɨ ɓa dùnɨ Mèín nò kíì á, nò kɨ́ a dù mwin móò.

⁸Duce kɨ́ vùvúùb, nùb mɨ̀sə́ndɨ̀rí, cɨcóòm, nùb kwíhɨ nɨ̀rì, nùb ɓei ɓíì ɓe ɨ́r ŋguŋnì, tɨ́cwáàb, nùb du yóŋnɨ mèín nyaŋhɨ́bí ɓe tɨ́kàŋkáàŋ lâs, yɨ́ juu ŋgábè á ɓáí sûfɨ̀rə̀ du yínɨ yí̧ne du cwá gwì bɨrɨ́bí rɨ no.»

⁹Dùgallɨb tɨ́ɓaám yi du ɓe toòb tɨ́ɓaám ŋgáré jábɨ́r no ɗéé ɗéé rè, nɨ̀mwi̧ mvókín ŋgábè noò ɨ́ gò mɨ tànànɨ ɨnè: «Gom, mɨ ɓa wu túùmnànɨ gwi Mwin ndèɗúú á.»

¹⁰Nyéhè Mèèín ɨ́ lê mɨ só, ɗà dùgal ɨ́ hàìngè mɨ ɓe kàm nyáam kù ya, ŋgə́ ɨ́ túùmnà mɨ Yèrúsàlèm, kwɨ́í sarîn sónɨ ɓɨllin. Mèín yi ɨ́ tómsówo ru.

¹¹Ɓe mwa̧ Mèèín yi du ŋgə́ nóò, kwɨ́í kɨ́ yaá ɓə̀nɨ njarɨ́b njarɨ́b, hȩ du súdì, hȩ du jandîn, hȩ du láŋlaŋ.

¹²Kpɨ́ kàm nyáam kù yaá ŋgə́ kɨ̀rɨ̀nɨ, ɓavɨ̀ì ya cóóŋ ɨ́ bɨrɨ́b. Dùgallɨb cóóŋ ɨ́ bɨrɨ́b yi ɨ́ duce ɓavɨ̀ì kɨ́ gə́tɨ̀nɨ ru. Ɨ́ì gbààŋ Ísràyéèl cóóŋ ɨ́ bɨrɨ́b yaá ɓavɨ̀ì kɨ́ ya ti̧nɨ́b ti̧nɨ́b.

¹³Péín lâs yaá ɓe ɓavɨ̀ì taarɨ́b taarɨ́b. Péín haré ɓavɨ̀ì taarɨ́b, péín sɨnné ɓavɨ̀ì taarɨ́b, péín mvii fó̧ré ɓavɨ̀ì taarɨ́b, péín mvii lə́ré ɓwê ɓavɨ̀ì taarɨ́b.

¹⁴Kpák kwɨ́í kíì yi dusé sɨɨ cóóŋ ɨ́ bɨrɨ́b ya á. Ɨ́ì nùb tómé* cóóŋ ɨ́ bɨrɨ́b Mwin ndèɗúú yaá sɨɨ cóóŋ ɨ́ bɨrɨ́b kɨ́ ya tɨín tɨín.

¹⁵Dùgal yi du mɨ nyìnnànɨ rè yaá ɓe mɨ̀ɗúhìn kù ŋgáré, nyaŋhîn ɓe gôl, àm ɗóhɨ kúr, ɓavɨ̀ì kúrì ɓe kpɨ́ɨ̀.

¹⁶Kwɨ́í kɨ́ yaá ɓe gúùr nààsɨ̀b, ŋguŋgo̧ hàrák ɓe yɨ́yáré. Dùgal ɨ́ ɗóhè kwɨ́í kɨ́ ɓe mɨ̀ɗúhìn no ŋgáré rè. Ŋguŋgo̧ ŋgéé yaá kílòmétà tɔ́sìn bɨrɨ́b ɨ́ təmərì nààsɨ̀b. Yɨ́yáre ɓe nyɨ́nyáme hàrák ɓe ŋguŋgo̧.

¹⁷Dùgal lè, ɓe mɨ̀ɗóhìn yi nó ŋgáré rè, ŋgə́ ɨ́ ɗóhè nyínyáme kpɨ́ɨ̀, ɨ́ fô̧ métà vii taarɨ́b ɨ́ yɔ̀k tínmwi̧.

¹⁸Kpɨ́ kɨ́ yaá ma̧á̧ ɓe sɨɨ kù ɨnè njarɨ́b njarɨ́b, kwɨ́í kɨ́ nɨ̀mɨ́r yaá cè ɨnè láŋlaŋ, sarîn fèín hȩ gôl.

¹⁹Yààr leè kpák kíì yaá ma̧á̧ ɓe sɨklɨb kù ɨnè njarɨ́b njarɨ́b, kɨ́b kù yaá hȩ du súdì, hȩ du jandîn, kɨ́b kù bùlûm, kɨ́b kù súdì.

²⁰Kɨ́b kù jandɨ́b, kɨ́b kù hȩ du màgánà hȩ du súdì.

²¹Ɓavɨ̀ì cóóŋ ɨ́ bɨrɨ́b lè yɨɨ́m njàráàb cóóŋ ɨ́ bɨrɨ́b á. Vùùm ɓavɨ̀ì kíì lâs yaá nyaŋhîn ɓe njàráàb mwi̧í̧ mwi̧. Jɨ̀r jíri kwé tə̧né yaá ɨnè láŋlaŋ, sarîn fèín hȩ gôl.

²²Mɨ ɨ́ dù mɨ́ pə́wa yɨ́ ɗóm Mèèín ɓetí Mèín nò du Kékéé ɨ́ dùkwà ɓe nyòme lâs ɓe Mwin ndèɗúú yi ducɨ bɨ yɨ́ ɗóm Mèèín á.

²³Mgbíí Mèèín ɓe Mwin ndèɗúú yi ɨ́ du bɨ́ mwa kwɨ́í kíì ru, àm kɨ́ á yi du nɨ́ ŋgə́ ɗúnàcɨ̀wá mwa mvii ɓe njumií ru.

²⁴Gbààŋ bɨ ɗɔ̀bɨ́nné ɓa dùnɨ mwa̧ ŋgéé no á, ɗà mvènnɨ́b jííb ɗɔ̀bɨ́nné a gètèèrówò njɔdɨ̀b ɓoò no.

²⁵Ɓavɨ̀ì kwɨ́í kɨ́ noò kwá bɨ ɗeín dùr, ɓetí mɨ̀sɨ́mnɨ̀r kwá nɨ kwé ku sɨ́mnɨ̀r.

²⁶Kùb kwá geso mgbíí ɓe njɔdɨ̀b tɨb lâs kɨ́í kɨ́ no.

²⁷Tɨ́kàŋkáàŋ, nùb du ndɨ̀ŋnɨ nɨ́ɨ́b nyáŋní, dùgɨ̀ nɨ́m jɨ̀rí kwá bɨ kwɨ́í kɨ́ no lə̂r. Jɔ̀sé nùb ɨ́r ɓoò du tɨín káàtà mè mɨ̀cɨ̧̀ɨ̧́ no, káàtà ók ɓe Mwin ndèɗúú.