Read Vute Àpòkàlîb 22 Bible Online

Àpòkàlîb 22 - Vute bible

Àpòkàlîb 22

¹Dùgal ɨ́ túùmnàɓwéhè mɨ mvúm du nànɨ mèè súhó̧nɨ kò mvènnì Mèèín ɓe Mwin ndèɗúú ya ɨnè láŋlaŋ.

²Mvúm kɨ́ yaá kóòsénɨ jɨ̀r jíri kwé tə̧né no. Yɔ̀ du nànɨ mèè yaá gín mvúm kíì péín ndè péín ndè. Yɔ̀ kɨ́ yaá njáàbnɨ dáín mwi̧ nó gwì cóóŋ ɨ́ bɨrɨ́b, kí ta njumi mwi̧ nó gwì mwi̧ na á. Ɓe kehɨ́b yɔ̀ kíì á kùb yi du wáàŋnɨ nɨ̀yáàb tɨb ɗɔ̀bɨ́nné noò ru.

³Kwɨ́í kɨ́ no, nɨ́m kù káá Mèèín ɓa bɨ̀kwàniì nɨ ɗàcɨ̀wá. Kò mvènnì Mèèín ɓe kɨ́ Mwin ndèɗúú ɓa dùnɨ kwɨ́í kɨ́ no á, ɗà nùb ə́ré Mèèín a ɗôm ŋgə́.

⁴Ŋgáb ɓa pénɨ ɓɨ̀m noò á, ɨ́í noò a dùcè tɨín ŋgábè mɨ́ŋnì.

⁵Mɨ̀sɨ́mnɨ̀r tɨ̀ nɨ dùcɨ̀r. Tɨ̀ nɨ ŋgáb mwa lámbàà, dùgɨ̀ kɨ́ mvihɨri ɗúnàcɨ̀r, ɓetí Mèín nò du Kékéé ɓa ŋgáb nànɨ mwa nóò á, ŋgáb a ŋgáŋcè kɨ́ gwìí mwi̧í̧.

⁶Á dùgal tanaá mɨ ɨnè: «Nyindí kɨ́ á àmɨɨr, á cè sàmàìn kùb səŋ gíí ɓe nyindí kíì. Kéké nò du Mèèín, ŋgə́ nò du nànɨ tɨ́kɨ̀nɨ́b Mèèín* kɨ̀cáblì, tómwotɨ́ dùgal noò, gò túùmnànɨ nùb no ə́ré nɨ́m mekɨ́cɨ ŋgób féínniì.»

⁷Yésù taá ɨnè: «Ókye, mɨ ɓacuwo ru. Mɨ̀tù á ɓe nùb du jə̀ŋnɨ nɨ́ɨ́b tɨ́kɨ̀nɨ́b Mèèín* tɨnndé káàtà rè noò!»

⁸Mɨ Jâŋ, mɨ óktɨ́ sà̧à̧ nɨ́ɨ́b kíì, mɨ pə́ceé. Ɓwâ mɨ yi ók nɨ́ɨ́b kɨ́ mɨ ɨ́ pə́cèé, á mɨ gucáamsé dùgal yi túumna mɨ nɨ́ɨ́b kɨ́ rè tíí ɗómnɨ ŋgə́.

⁹Ɨ́dù ŋgə́ ɨ́ tànà mɨ: «Wu wu u̧ ndɨ̀ŋ, mɨ duɓwée mɨ nò éína Mèèín hȩ wu, hȩ mwin yàáb bɨ woò tɨ́kɨ̀nɨ́b Mèèín*, hȩ nùb lâs du jə̀ŋnɨ Kìn du káàtà rè noò á. Ɗómbɨ̂ŋ wu Mèín!»

¹⁰Á ŋgə́ tana mɨ: «Wu wu nɨ́ɨ́b tɨ́kɨ̀nɨ́b Mèèín* tɨnndé káàtà rè no yo̧ó̧ gə́tɨ̀r, ɓetí ɓwâ nɨ́ɨ́b kɨ́ ɓa ndɨ̀ŋniì ɗóotɨ́.

¹¹Nò ɓáŋhîn gɨ̀hácɨ̀ tíí ɓe ndɨ̧̀ɨ̧́ ɓáŋhɨ́nne. Nò jɨ́nɨ̀m cumí sóò dùhácɨ̀ nɨ ɓe kí. Nò nyɔ̧ɔ̧́ gɨ̀hácɨ̀ tíí ɓe ndɨ̧̀ɨ̧́ nyɔ̧né. Nò cum só ɗàwáá dùhácɨ̀ nɨ u̧.»

¹²Yésù taá: «Ókye, mɨ ɓacuwo ru. Mɨ ɓa cùwònɨ ɓe lɔ̀ɔ́ á, mɨ a nà nùb lâs, nɨ̀mwi̧ ɗóhîn ɓe nɨ́m ŋgə́ ya ndɨŋndé.

¹³Mɨ yààr á, mɨ cáŋhɨ̀r á. Mɨ nò tíí á, mɨ cè nò cáŋhɨ̀rí á.»

¹⁴Mɨ̀tù á ɓe nùb se sàró ɓóò, kùb ɨ́ nà ŋgáb nyòm ŋgáb taŋ gum yɔ̀ du nànɨ mèè, kùb ɨ́ nàkwà ŋgáb nyòm ŋgáb ndóŋhó̧ ɓavɨ̀rì lénɨ kwéè.

¹⁵Ɨ́dù cɨcóòm, tɨ́cwáàb, nùb ɓei ɓíì ŋguŋnì, nùb kwíhɨ nɨ̀rì, nùb yóŋ mèín nyaŋhɨ́bí, nùb lâs du kàŋnɨ kààŋ nyindí ɓɔ̧ne ɓe nɨ́ɨ́b ndɨ̧ɨ̧́ ya kwe, nùb kɨ́ lâs, kùb tɨ̀ bɨ ŋgáb lə́ kwé ku ə́mnɨ̀r.

¹⁶«Mɨ Yésù, mɨ tómsoó dùgal moò gɨ̀ nyí tànànɨ nɨ́ɨ́b kɨ́ lâs Mɨ̀kwìn Nùb Ə́mní no. Mɨ nyȩ gbàŋ Dàvíìt noò á, mɨ káŋyerè yekɨ́rɨ̀bì á.»

¹⁷Nyéhè ɓe nɨ̀gwi gùmní á tànɨ: «Gom!» Nò ók ɓə́r kíì tàɓwê: «Gom!» Nò síì du ndɨ̀ŋniì gòtɨ. Nò ɗúú mvúm du nànɨ mèè, kùb nà ŋgə́ kɨ́ samí.

¹⁸Mɨ Jâŋ, àm ndè mɨ tana nùb du óknɨ nɨ́ɨ́b tɨ́kɨ̀nɨ́b Mèèín* yi tɨnndé káàtà rè no rè á. Gə́tɨnáam! Nò kù ɨ́ ɓààrê nɨ́m kù kɨ́ du tɨín káàtà rè no rè ya, Mèín ɓa nò kɨ́ ɓààrénàɓwênɨ jábɨ́r du káàtà rè no tɨín ndè kɨ́ nò kɨ́ tɨ duye ɓe kí tíí ya á.

¹⁹Nò kù ɨ́ ákɨ́cè nɨ́m kù kɨ́ du tɨín káàtà rè no rè ya, Mèín ɓa nò kɨ́ ákɨ́nàɓwênɨ gɔ̀ gum du nànɨ mèè, ɓe gɔ̀ kwɨ́í sarɨ́nne du tɨín káàtà rè no rè á.

²⁰Nò nyaaŋkɨ́ce àm àmɨɨr nɨ́ɨ́b kíì lâs wáatɨ́ ɨnè: «I̧i̧, mɨ ɓawo ru.» Yée, nɨ́m kɨ́ ndɨ̀ŋ u̧; gom, Kéké Yésù!

²¹Faám Yésù nò du Kékéé dù ɓe nùb lâs.