Read Vute Àpòkàlîb 3 Bible Online

Àpòkàlîb 3 - Vute bible

Àpòkàlîb 3

¹Nɨ́m mɨ yi pə́ hȩ nɨ̀vɨ́tè rè ɨ́ tànà mɨ ɨnè: «Tɨnnam dùgal du gə́tɨ̀nɨ mɨ̀kwìn nùb ə́mní Sáàrdə̀ ɨnè: «Nɨ́m nò du ɓe nyéhè Mèèín tɨ́ɓaám, ɓe káŋyerè tɨ́ɓaám wáaré á rè: Mɨ ɗəəŋtɨ́ ɗɨ́m wóò, mɨ ɗəəŋtɨ́ wúúm woò á ɨnayâna wu á jáŋ, u̧ kɨ́ wu du kúri á.

²Gə́tɨm tèré ti tɨ ɗú kúnɨ rè. Səmnɨm ŋgə́, ŋgə́ tɨ̀ kúcáŋhɨ, ɓetí mɨ péé mɨ́ nɨ́ɨ́b ndɨ̧ɨ̧́ woò bɨ yúklîn ɗàà Mèín móò tíí.

³Lə́əmcuye Kìn wu yi óklé, jə̀ŋ Kìn kɨ́, wu a ɓàndè sum. Wu ɨ́ dù wú jáŋ dùkɨ́wa, mɨ ɓa gònɨ hȩ ŋgàyɨ́r á, wu tɨ̀ wu ɗə̀ə̀ŋwá mvókín ŋgé no á mɨ ɓa gònɨ wu sɨ̀rɨ̀nɨ.

⁴Nɨ́m mwi̧, Sáàrdə̀ ku, nùb wo kù, jɨ́nɨ̀m cumí nɨ ŋgáb làìwá, ŋgáb á júúb mɨ̀vúùb[5] só, mɨ háàgènɨ. Ɓetí ŋgáb á ɗóhîn ɓe nùb háhe mé.

⁵«Nùb kwá ɓei suu, kwá duɓwée júúb mɨ̀vúùb kɨ́ só u̧. Mɨ tɨ̀ mɨ ɨ́r ɓoò káàtà ɨ́r nùb du ɓe mè mɨ̀cɨ̧̀ɨ̧́ du nó tɨnné no ákɨ̂r. Tá moò ɓe dùgallɨb noò tíí, mɨ ɓa tàɓànɨ wááŋ ɨnayâna ŋgáb ók ɓe mɨ á.

⁶«Nò du ɓe tó ók àmnì, ókɓà mîn nɨ́m Nyéhè Mèèín du tànànɨ mɨ̀kwìn nùb ə́mní bɨ rè.»

⁷Nɨ́m mɨ pə́ hȩ nɨ̀vɨ́tè rè ɨ́ tànà mɨ ɨnè: «Tɨnnam dùgal du gə́tɨ̀nɨ mɨ̀kwìn nùb ə́mní Fìlàdèlfíì ɨnè: «Nò du járkɨ́ták, duɓwée àmɨrìí, nò du ɓe kpər ŋgɔ̧́ɔ̧̀ Dàvíìt ŋgáréè, nò du: ŋgə́ kuumtɨ́ ɓavɨ̀r, sàmàìn nò kù ɗenndé ɗàà; ŋgə́ ɗeinceé, sàmàìn nò kù kuumndé ɗàà rɨ, nɨ́m ŋgə́ wáaré á rè:

⁸Mɨ ɗəəŋtɨ́ nɨ́ɨ́b wu du ndɨ̀ŋniì lâs. Mɨ ɗəəŋtɨ́ wu ɓe nyòme cei ɗàà, u̧ kɨ́ wu yi jəŋtɨ́ mɨ, wu cè mɨ càmwá. Mɨ kuumnatɨ́ wu ɓavɨ̀r àm wu éína mé, sàmàìn nò kù ɗeín ɓavɨ̀r kíì ɗàà.

⁹Nɨ́m mɨ ɓa ndɨ̀ŋnɨ mɨ̀kwìn nùb Sátààìn á rè: tɨ́kàŋkáàŋ du bɨ́ gbàŋ Mèèín sé ŋgáb a tà vúm bɨ gbàŋ Mèèín á na rɨ, mɨ ɓa kpɔ́ɔ̀nɨ ŋgáb gò wu cáàmsénànɨ ɗàá á, ŋgáb a ɗə̀ə̀ŋgì mɨ á wu ɗúnɨ.

¹⁰Mɨ yi taá wu dù ɓe mɨ̀súktéín. Hȩ wu gə́tɨ̀nɨ nyindí kíì, mɨ á wu gə́tɨ̀nɨ ɓe mvókín jábɨ́rí ɓa gònɨ ɗɔ̀ɔ́b lè bɨ̂ŋ gùr kəhɨ nùb ɗɔ̀bɨ́nné rè.

¹¹Mɨ ɓawo ru. Ə́əŋɓam kpéín ə́ə́m wóò no, àm nò kù tɨ̀ gahó̧ wu lɔ̀ɔ́ ɓə̀ré suu woò ŋgáréè.

¹²«Nò kwá ɓei suu, mɨ ɓa ndɨ̀ŋnɨ ŋgə́ dù hȩ sɨ̀ne dúú Mèín moò no á, ŋgə́ kwá nɨ fó̧cɨ̀r. Mɨ ɓa tɨ̀nndénɨ ɨ́r Mèín moò ŋgéé só á, mɨ a tɨ̀ìnɓwê ɨ́r Yèrúsàlèm heé du kwɨ́í Mèín moò tómsówo ɓɨllɨnne. Ɨ́r heé mo só rè, mɨ ɓa tɨ̀nndéɓwênɨ ŋgéé só á.

¹³«Nò du ɓe tó ók àmnì, ókɓà mîn nɨ́m Nyéhè Mèèín du tànànɨ mɨ̀kwìn nùb ə́mní bɨ rè.»

¹⁴Nɨ́m mɨ yi pə́ hȩ nɨ̀vɨ́tè rè ɨ́ tànà mɨ ɨnè: «Tɨnnam dùgal du gə́tɨ̀nɨ mɨ̀kwìn nùb ə́mní Làwòdìséè ɨnè: «Àmèn, nò du mɨ̀námé jɨ̧ɨ̧́ du tànɨ àmɨrìí, nò nɨ́ɨ́b lâs ɗoŋwo yáà, nɨ́m ŋgə́ wáaré á rè:

¹⁵Mɨ ɗəəŋtɨ́ ɗɨ́m wóò lâs. Mɨ ɗəəŋtɨ́ wu wu ɓə́ndîn ɗàà, wu cè wú kerîn ɗàà. Wu tɨ dùɓàyè ɓə́ndîn kɨ́ kù kerîn naa!

¹⁶Ɨ́dù hȩ wu du wú ɓə́ndîn ɗàà, kerîn ɗàcéwa, wu du wú ɓááɓá rèé, mɨ á wu jì̧ì̧nɨ.

¹⁷Wu á tànɨ ní nò njɔdìì á, ní á ɓe njɔdì cei. Nɨ́m tuŋ níì nɨ ɗàà na, wu pə́wa wu á mwàm kɨ̀ mwàm, tii kɨ̀ tii, ŋgwìn njéhɨ̀m, wu ɨ́ dùkwàgì íí ɓù̧ à?

¹⁸Sóóŋ mɨ na wé á wu gò yɨ́ moò, wu a gwɨ̀ì gôl ducɨ jɨ́nɨ̀m no ɗàwáá, wu a sèì nò njɔdìì. Gwɨiɓwéem júúb mɨ̀vúùb, wu a lə́rê só, yòkkɨ́nɨ sèì ŋgwìn wo njéhɨ̀m kíì. Wu a gwɨ̀ìɓwê ŋgar ɗììrénɨ íí wo rè no àm wu a pêé.

¹⁹Kɨ́ moò, nùb mɨ du ɗúniì, mɨ á ŋgáb yètɨ̀nɨ, mɨ a túmnè ŋgáb jábɨ́r àm ɗə́ŋhɨ ŋgábè. Kɨ́kléɓam njɔ̧̀ ə́mní, wu a ɓàndè sum.

²⁰Ókye, mɨ á ə́ə̀ŋnɨ ɓavɨ̀rì mɨ a kùtè. Nò ók kúu moò, ɨ́ kùmnè ɓavɨ̀rì, mɨ ɓa lénɨ nò kíì yó á, nɨ́me ŋgə́ a tàŋ cɔŋ, nò rè duwoó, nò rè a dùsòcè.

²¹«Nùb kwá ɓei suu, mɨ á ŋgáb nànɨ nyòm du gín móò kò mvènnì moò ya hȩ Tá moò ya naɓwée mɨ nyòm du gín nóò, kò mvènnì noò ya, ɓwâ mɨ ya ɓei suu.

²²«Nò du ɓe tó ók àmnì, ókɓà mîn nɨ́m Nyéhè Mèèín du tànànɨ mɨ̀kwìn nùb ə́mní bɨ rè.»