Read Vute Àpòkàlîb 4 Bible Online

Àpòkàlîb 4 - Vute bible

Àpòkàlîb 4

¹Cùr kɨ́ no, mɨ ɨ́ pə́kwà nɨ́m kù hȩ ndɨŋ wuúm. Mɨ ɨ́ pê ɓavɨ̀r ɓɨllin fuuŋ. Nò yi nyinnakom mɨ, mɨ yi ók kúu noò ɓə́ŋnɨ hȩ tóŋ ndè ɨ́ tànà mɨ ɨnè: «Wúwom hò̧, mɨ túùmnà wu nɨ́m ɓa ndóŋnɨ cɨ́m yȩné.»

²Ɓè mu̧u̧, Nyéhè Mèèín ɨ́ lê mɨ só. Ɓɨllin ɓè, kò mvènnì yaá aín, nò kù cè kò kɨ́ ya du̧ú̧.

³Síí nò kíì yaá ɓə̧̀nɨ njarɨ́b njarɨ́b hȩ du súdì, hȩ du jandîn, kum kù yi kə́əŋkɨrɨkíí kò mvènnì kɨ́, síí kum kíì yaá súdì.

⁴Kò mvènnì bɨ kù yaá ɓwê ɓè vɨríí ɨ́ nààsɨ̀b, kɨ̀rɨ̀nɨ kɨ́ mwi̧ rè. Kò vɨríí ɨ́ nààsɨ̀b kɨ́ ya lâs, kɨ̀jííb vɨríí ɨ́ nààsɨ̀b yaá yá dutȩȩ́ júúb mɨ̀vúùb só só, kɨ̧̀ nyaŋhîn ɓe gôl ŋgwéé ŋgwéé.

⁵Mɨ yaá pénɨ nà̧á̧ nyə̧́ə̧̀ŋhó̧nɨ kò tə̧ə̧́ rè no. Mɨ yaá ókɓwênɨ nà̧á̧ no ɓàìnhó̧nɨ. Túrúkááŋ tɨ́ɓaám yaá to̧ó̧ kò mvènnì rè tíí, kí ta Nyéhɨ̀b tɨ́ɓaám Mèèín na á.

⁶Kò mvènnì rè tíí, yaá hȩ ɓáí kù ɨ́ du nɨ́ ɓè rɨ u̧, mvúm kɨ́ ɨnè láŋlaŋ. Gín kò mvènnì rè yɨ́k, nɨ́ɨ́b kù yaá ɓè nààsɨ̀b péín ndè péín ndè hȩ nɨ̀vɨ́tɨ̀b. Íí só bɨ̂ŋ péín tíí ɓe péín cùrì cúk.

⁷Nò tíí yaá fɨ́tɨ̀nɨ kpə́b. Nò bɨrɨ́bí yaá fɨ́tɨ̀nɨ càmù ndèèìn. Nò tarɨ́bí, ɓɨ̀m noò yaá hȩ kɨ́ nɨ̀vɨ́tèé. Nò nààsɨ̀bì yaácè hȩ ndì du mvɨ̀ìséniì.

⁸Nɨ́ɨ́b nààsɨ̀b kɨ́, vùùm ɓoò lâs yaá ɓe gɨ̀gɔɔ̀ tínmwi̧ tínmwi̧. Gɨ̀gɔɔ̀ kɨ́ cè lâs íí ya bɨ̂ŋ, còóm ɓe ɗàá. Mvihin ɓe cɨ́ɨ́m cúk ŋgáb yaá sòŋnɨ wàì lè: «Sarîn, Sarîn, Sarîn, Mèín nò du Kéké du ɓe nyòme lâs, ŋgə́ nò ya ɗóŋ dùnɨ, ducéye dùnɨ, ɓace gòniì á Sarîn.»

⁹Ɓwâ lâs nɨ́ɨ́b nààsɨ̀b lè du sòŋnɨ wòr àm mgbíhe nò du du̧ú̧ kò mvènnì ya rè, dɨ̀ɨ̀mnɨ ŋgə́, sáktɨ̀nɨ ŋgə́, ŋgə́ nò du jáŋ tɨ́k kɨ̀ tɨ́ɨ́,

¹⁰kɨ̀jííb vɨríí ɨ́ nààsɨ̀b lè a cáàmsê ɗàá nò du du̧ú̧ kò rè ya rè tíí, ŋgáb a ɗôm ŋgə́, ŋgə́ nò du tɨ́k kɨ̀ tɨ́ɨ́. Ŋgáb a lèèsê kɨ̧̀ ɓoò kò mvènnì rè tíí, ŋgáb a tà:

¹¹«Kéké nɨ́mè, Mèín nɨ́mè, á ɓà hàrák wu dù ɓe mgbíí, ɓe dɨmɨɨr ɓe nyòme. Ɓetí nɨ́ɨ́b lâs ɗoŋwo wu ya á, àm wu ya ɗúceré á nɨ́ɨ́b kɨ́ du dùnɨ ru.»