Read Vute Àpòkàlîb 5 Bible Online

Àpòkàlîb 5 - Vute bible

Àpòkàlîb 5

¹Nò yi du kò mvènnì ya du̧ú̧ rè, mɨ ɨ́ pê ɓuùŋ káàtàà no ŋgáár lame, nɨ́m yá tɨín péín kù péín kù, yaŋkí̧i̧ cè ɓe nɨ̧̀ mɨ̀yɨ́ tɨ́ɓaám.

²Mɨ ɨ́ pê dùgal jíri Mèèín fɔ́nɨ kúu còóm ɨnè: «Na ɨ́ du ɗóhîn ɓe wèìkî nààŋ ndè, ŋgə́ a kùùmndê káàtà rè noò?»

³Ɨ́dù nò kuumdé káàtà kɨ́ no ŋgə́ a fànné ɨ́ dù nɨ́ sə̀mwá, dùgɨ̀ ɓɨllin, dùgɨ̀ ɗɔ̀bín, dùgɨ̀ ko̧ó̧.

⁴Mɨ ɨ́ yà kɨ́ínɨ àm nò kuumdé káàtà kɨ́ no ŋgə́ a fànné yi du nɨ́ sə̀mwá rè.

⁵Á nɨ̀mwi̧ mvókín kɨ̀jíbí tana mɨ ɨnè: «Kɨ́íwa! Péye, kpáb gbàŋ Jùdáà noò, nyȩ tamnì Dàvíìt nò du mvèìn jírií ɓəttɨ́ su. Á sàmàìn ŋgə́ worɨkɨ́ nàŋ tɨ́ɓaám káàtà kɨ́ yaà, ŋgə́ a kùùmdê no.»

⁶Mɨ ɨ́ pê Mwin ndèɗúú ə́ŋhîn gín kò mvènnì rè, nɨ́ɨ́b nààsɨ̀b lè ɓe kɨ̀jííb á cè ŋgə́ kɨrîn. Ŋgə́ yaá hȩ nò kùb ya kwíhɨ kwíhɨ́nne. Ŋgə́ yaá ɓe gaàm tɨ́ɓaám ɓe íí tɨ́ɓaám yi du nyéhɨ̀b Mèèín tɨ́ɓaám kùb yi tómtee ɗɔ̀ɔ́b lè bɨ̂ŋ.

⁷Nò yi du kò mvènnì ya du̧ú̧ rè yaá ɓe ɓuùŋ káàtàà ŋgáár lame bi̧í̧, á mwin ndèɗúú ŋgɨɨso, ŋgə́ ɨ́ gàmhô̧ ɓuùŋ káàtàà kɨ́.

⁸Ɓwâ ŋgə́ gamhó̧ ɓuùŋ káàtà rèè, nɨ́ɨ́b nààsɨ̀b lè ɓe kɨ̀jííb vɨríí ɨ́ nààsɨ̀b lè ɨ́ cáàmsê ɗàá no tíí. Ŋgáb lâs, ŋgáb yaá ɓe háàrpə̀ ɨ́ toòb nyaŋhîn ɓe gôl ŋgáré ŋgáré, nyuŋ nó ɗéé ɗéé. Nyuŋ kɨ́ du mɨ̀yú̧ nùb gbàŋ Mèèín noò á.

⁹Ŋgáb yaá sòŋnɨ wòr heé, wàì kɨ́ yaá ɨnè: «Á ɓà hàrák wu gàmhó̧ ɓuùŋ káàtàà rè, wu a wòrɨ̀kî nààŋ ya rè. Ɓetí kùb ya téínkíí wu, ɓe cwá wu ya kú hȩ satɨgà kɨ́, wu ya céíncunatɨ́ Mèín nɨ̀vɨ́tɨ̀b ví̧i̧, tɨb ɓe gbààŋ lâs no.

¹⁰Wu ndɨŋtɨ́ ŋgáb sèì gbàŋ nùb na satɨgàà àm ə́nna Mèèín, ŋgáb ɓace ŋgáŋnɨ ɗɔ̀ɔ́b lè bɨ̂ŋ á.»

¹¹Mɨ yaáyè góòmkɨ́nɨ, á mɨ ók kúu dùgallɨb vidɨ̧̀, ŋgáb ya kɨrií kò mvènnì nɨ́ɨ́b nààsɨ̀b ɓe kɨ̀jííb lè.

¹²Ŋgáb ɨ́ yà sòŋnɨ kúu còóm ɨnè: «Mwin ndèɗúú kùb ya téínkɨ́ré, á ɓà hàrák ŋgə́ dù ɓe nyòme, ɓe njɔdì, ɓe kɨ̀cáàb ɨ́ taám. Á hàrák kùb dɨ̀ɨ̀m ŋgə́, kùb mgbíì ŋgə́, kùb ŋgə̀m ŋgə́.»

¹³Mɨ ɨ́ ô nɨ́ɨ́b jáŋ Mèín ya nyaaŋndé lâs, dùgɨ̀ ɓɨllin, dùgɨ̀ ɗɔ̀bín, dùgɨ̀ ko̧ó̧, dùgɨ̀ mɨ̀kwehɨ̀rí sòŋnɨ wòr ɨnè: «Nò du du̧ú̧ kò mvènnì yaà ɓe mwin ndèɗúú, Ŋgìím, dɨmɨɨr, mgbíí ɓe nyòme ók ɓe ŋgáb tɨ́k kɨ̀ tɨ́k.»

¹⁴Nɨ́ɨ́b nààsɨ̀b lè ɨ́ yà ə́ə̀mnɨ wàì kɨ́ ɨnè: «Àmèn!» Á kɨ̀jííb cáamsé ɗàá nò yi du du̧ú̧ kò mvènnì ya rè ɓe mwin ndèɗúú tíí ɗómnɨ ŋgáb.