Read Vute Àpòkàlîb 6 Bible Online

Àpòkàlîb 6 - Vute bible

Àpòkàlîb 6

¹Nààŋ tɨ́ɓaám yi du ɓuùŋ káàtàà ya rè, mɨ ɨ́ pê mwin ndèɗúú wèìkɨ́nɨ kɨ́ tíí. Nɨ́ɨ́b nààsɨ̀b yi du gín kò mvènnì hȩ nɨ̀vɨ́tɨ̀b lè, mɨ ɨ́ ô kúu nò tíí hȩ ɓànné nàhí, ŋgə́ ɨ́ tà: «Gom!»

²Mɨ góomso, á mɨ pə́ ɗə̧́ə̧́ mɨ̀vɨ́rì. Nò yi du ɗə̧́ə̧́ kɨ́ yaà yaá ɓe cɔk ŋgáré, kùb ɨ́ hàndɨ̀nà ŋgə́ kɨ̧̀. Hȩ ŋgə́ tɨ ɓeiye suu, ŋgə́ ɨ́ ə́llê gìnɨ ɓèìkwànɨ su.

³Mwin ndèɗúú ɨ́ wèìkî nàŋ bɨrɨ́bí, kúu nò bɨrɨ́bí ɨ́ tà ɨnè: «Gom!»

⁴Á ɗə̧́ə̧́ kù fó̧kwa, kí yaá jandîn. Nò yi du ɗə̧́ə̧́ kɨ́ yaà, kùb ɨ́ nà ŋgə́ nyòm ŋgə́ ahɨ su ɗɔ̀bín, àm nɨ̀vɨ́tɨ̀b a ndùùcùɓà síí mvókín ŋgábè. Kùb ɨ́ nàrê ŋgə́ jìn kàm kù ŋgáré.

⁵Á Mwin ndèɗúú weikɨ́ nàŋ taarɨ́bí. Mɨ ɨ́ ô kúu nò taarɨ́bí tànɨ ɨnè: «Gom!» Mɨ góomso, á mɨ pə́ ɗə̧́ə̧́ sîn. Nò yi du ɗə̧́ə̧́ kɨ́ yaà yaá ɓe kílò ŋgáré.

⁶Tɨŋtɨ̀ŋ nɨ́ɨ́b nààsɨ̀b lè, mɨ ɨ́ ô hȩ kúu kù á tàhó̧nɨ ɨnè: «Kílò fàrîn mwi̧ ɓe ɨ́r ə́r mvii mwi̧ bɨ̂ŋ. Kílò mùm óòrjə̀ cè taarɨ́b ɓe ɨ́r ə́r mvii mwi̧ bɨ̂ŋ ɓwê, ɨ́dù wu wu kúrúm ɓe súm ɓáàŋkɨ̂r.»

⁷Mwin ndèɗúú ɨ́ wèìkî nàŋ nààsɨ̀bì, á mɨ ók nò nààsɨ̀bì tànɨ ɨnè: «Gom!»

⁸Mɨ góomso, á mɨ pə́ ɗə̧́ə̧́ kù síí hȩ síí keé, ɨ́dù vùkù vùkù. Nò yi du ɗə̧́ə̧́ kɨ́ yaà ɨ́r noò yaá cwé, ko̧ yaá cè ŋgə́ tùrénɨ cùrì. Ɗɔ̀ɔ́b tə̧ə̧́ gɔklȩ́ȩ nààsɨ̀b, kùb ɨ́ nà ŋgáb piì mwi̧, ŋgáb ndùùkɨ́ nùb ya kwe ɓe jì̧í̧, ɓe ŋgàk, yə́b, ɓe nyèém káhȩ̀né.

⁹Mwin ndèɗúú ɨ́ wèìkî nàŋ ŋgibì. Nùb kùb ya kwíhe ɓe àm ŋgáb ya taɓa àm Mèèín ɓe jɨ̧ cúú, mɨ ɨ́ pê nyéhɨ̀b ŋgábè tə́bə̀rè múbí siín.

¹⁰Ŋgáb yaá kɨ́ɨ̀ŋhó̧nɨ ɨnè: «Kéké, wu nò du járkɨ́ták ɨ́ dùgwàhè àmɨrìí, nùb ɗɔ̀bɨ́nné ya kwíhe nɨ́m ndè, wu móŋce ní ŋgùnnɨ ŋgáb, wu a túmnè ŋgáb jábɨ́r?»

¹¹Á kùb natee ŋgáb lâs sàró mɨ̀vɨ́rì mwi̧í̧ mwi̧, kùb ɨ́ tà ŋgáb jíìkwàyè ŋgób, há̧á̧ hȩ fain mwin yàáb ə́mní ɓe ŋgáb ya éíkom cúk, yi du ɗúnɨ kùb kwíhɨ̀ hȩ kùb ya kwíhe ŋgábè ɓa yúùniì.

¹²Mwin ndèɗúú ɨ́ wèìkî nàŋ tínmwi̧í̧, ɗà ɗɔ̀ɔ́b ɨ́ jɨ̀ɨ̀ɓà, mvii ɨ́ sɨ́ì hȩ júk jɨ̀rí. Njumi ɨ́ wàŋɓà mgbuu hȩ tɨ́m.

¹³Káŋyerɨ̀b ɨ́ yà sùtɨ̀sónɨ ɓɨllin hȩ mvin guum yɔ̀ɔ sutɨce ɓwâ cɨ́cɔ̧̂ tamnì du fùniì rɨ u̧.

¹⁴Ɓɨɨr ɨ́ lɔ̧̂ hȩ ɓwâ kùb du ɓòŋnɨ pàmnɨ̀rí. Ɓəb ɓe tɨ́kwá̧a̧ bɨ ɨ́ éítèèkî yɨ́ ŋgábè juu.

¹⁵Mvènnɨ́b jííb ɗɔ̀bɨ́nné, nùb geé tií, mvènnɨ́b sójàbì, nùb njɔdìì, nùb ɨ́r sóò, ɓe nùb lâs, dùgɨ̀ mbɔ́ɔ́, dùgɨ̀ mbɔ́ɔ́ sé ɨ́ gì yòktènɨ mgbàŋnìn, ɓe mvókín ɓéhí ɓəbì.

¹⁶Ŋgáb yaá tànànɨ ɓəb ɓe ɓéhɨ́b ɨnè: «Fúukɨ́náam nɨ́m, yòkkɨ́ná nɨ́m. Nò du du̧ú̧ kò mvènnì ya rè tɨ̀ pə́ nɨ́ nɨ́m. Jábɨ́r Mwin ndèɗúú ɓa túùmnɨ rè tɨ̀ kwaɓwée nɨ́ nɨ́m.

¹⁷Ɓetí ye jíri ŋgáb na kùb jábɨ́rí ɗóotɨ́. Nò fɨ́tɨ jíìnɨ jábɨ́r kíì nɨ ɗàà.»