Read Vute Àpòkàlîb 7 Bible Online

Àpòkàlîb 7 - Vute bible

Àpòkàlîb 7

¹Cùr kɨ́ no, mɨ ɨ́ pê dùgallɨb nààsɨ̀b ə́əŋkɨrií ɗɔ̀ɔ́b mɨ̀yɨ́ nààsɨ̀b, àm kəŋmbə́r nààsɨ̀b tɨ̀ furówo ɗɔ̀bɨ́nné, dùgɨ̀ mvúúm, tɨ̀ di̧nɨɓacéye dùgɨ̀ yɔ̀ mwi̧.

²Mɨ ɨ́ pə́kwà dùgal Mèèín kù péín mvii fó̧ré, wúínɨ ɓɨllin ɓe sɨ̀tâm Mèín nò du jááŋ ŋgáré. Dùgallɨb nààsɨ̀b kùb yi na nyòm ɓáaŋkɨ́ ɗɔ̀ɔ́b ɓe mvúm ndè, ŋgə́ ɨ́ yà ŋgáb kɨ́ŋsònànɨ ɨnè:

³«Nyí nɨ ɗɔ̀ɔ́b, dùgɨ̀ mvúm, dùgɨ̀ yɨ̀ɨ́b ɓáàŋkɨ́tàm, nɨ́m wòòmndéyè nùb ə́ré Mèín nɨ́mè sɨ̀tâm mɨ́ŋnì mbáb.»

⁴Á mɨ ók fàìn nùb kùb ya woomndé sɨ̀tâm mɨ́ŋnì rè. Ŋgáb yaá lâs tɔ́sìn təmərì mwi̧ ɨ́ yɔ̀k vii bɨrɨ́b ɨ́ nààsɨ̀b, lâs nùb gbàŋ Ísràyéèl.

⁵Nùb kùb ya woomna sɨ̀tâm kíì yaá Jùdáà gbàáŋ tɔ́sìn cóóŋ ɨ́ bɨrɨ́b, Rúbèn gbàáŋ tɔ́sìn cóóŋ ɨ́ bɨrɨ́b, Gàd gbàáŋ tɔ́sìn cóóŋ ɨ́ bɨrɨ́b,

⁶Àséèr gbàáŋ tɔ́sìn cóóŋ ɨ́ bɨrɨ́b, Nèftàlíì gbàáŋ tɔ́sìn cóóŋ ɨ́ bɨrɨ́b, Mànàséè gbàáŋ tɔ́sìn cóóŋ ɨ́ bɨrɨ́b,

⁷Sìmèyóòŋ gbàáŋ tɔ́sìn cóóŋ ɨ́ bɨrɨ́b, Lèvíì gbàáŋ tɔ́sìn cóóŋ ɨ́ bɨrɨ́b, Ìsàkáàr gbàáŋ tɔ́sìn cóóŋ ɨ́ bɨrɨ́b,

⁸Sàbùlóòŋ gbàáŋ tɔ́sìn cóóŋ ɨ́ bɨrɨ́b, Yòsə̂b gbàáŋ tɔ́sìn cóóŋ ɨ́ bɨrɨ́b, Bèìnjàmə̧́ə̧̀ gbàáŋ tɔ́sìn cóóŋ ɨ́ bɨrɨ́b.

⁹Cùr kɨ́ no, mɨ a cè góòmhánɨ, á mɨ pə́ vùùm kàm nɨ̀vɨ́tɨ̀bì vidɨ̧̀, nùb gbààŋ ɓe tɨb nyiín nyin. Ŋgáb yaá lâs ɓe sàróób mɨ̀vúù só, ɓe ke bɨ́llí ŋgáré ŋgáré, ə́ŋhîn kò mvènnì ɓe Mwin ndèɗúú tíí.

¹⁰Ŋgáb yaá tànɨ kúu còóm ɨnè: «Mèín nɨ́mè nò du kò mvènnì yaà, ɓe Mwin ndèɗúú ɨ́ du nɨ́m nànɨ ɓə́r ru!»

¹¹Dùgallɨb yi ə́əŋkɨrií kò mvènnì, kɨ̀jííb ɨ́ nɨ́ɨ́b nààsɨ̀b hȩ nɨ̀vɨ́tɨ̀b lè. Ŋgáb ɨ́ gùfúùsê ɗàá kò mvènnì rè tíí, ŋgáb ɨ́ ɗôm Mèín.

¹²Nɨ́m ŋgáb yi du tàniì á rè: «Àmèn! Nɨ́m ŋgə̀mná Mèín, nɨ́m mgbíìná ŋgə́, nɨ́m sáktɨ̀ná ŋgə́, nɨ́m dɨ̀ɨ̀mná ŋgə́. Kɨ̀cáàb, nyòme ɓe taám ók ɓe Mèín nɨ́mè tɨ́k kɨ̀ tɨ́k! Àmèn.»

¹³Nɨ̀mwi̧ mvókín kɨ̀jíbí ɨ́ gàm nyindí, ŋgə́ ɨ́ fɔ̂ mɨ ɨnè: «Nùb sàró só mɨ̀vúù rè ma na bɨ? Ŋgáb goce ŋga?»

¹⁴Mɨ ɨ́ pììnà ŋgə́ ɨnè: «Tá moò, wu ɨ́ ɗəŋhȩ ru.» Á ŋgə́ tana mɨ: «Nùb wu pə́ ɗàrɨ́, nùb ya pə́ bɨ́ jábɨ́r cei ɓe àm ə́mní á. Sàróób mɨ̀vúù ŋgábè sarîn fèín ɗàrɨ́, ŋgáb sewo bɨ tɨ́m Mwin ndèɗúú no á.

¹⁵Àm kɨ́ á ŋgáb du bɨ́ kò mvènnì Mèèín tíí ə́ŋhîn cɨ́ɨ́m ɓe mvihin cúk, ɗómnɨ Mèín no yó ru. Nò du du̧ú̧ kò mvènnì yaà ɓa ŋgáb gə́tɨ̀nɨ á.

¹⁶Cɨ̧̀ kwá nɨ ŋgáb nómcɨ̀r, síì kwá nɨ ŋgáb ndɨ̀ŋcɨ̀r. Dùgɨ̀ mvii, dùgɨ̀ dúdù kàm mvihɨri mwèèìn ndɨ kwá nɨ ŋgáb ɓwèècɨ̀r.

¹⁷Ɓetí mwin ndèɗúú du yɨ́ kò mvènnì rɨ ɓa dùnɨ nò ge ŋgábè á. Ŋgə́ ɓa ŋgáb gènɨ ŋgóndúm mvúm du súhó̧nɨ ɓe nyòmeè no á. Mèín ɨ́ ɓace ŋgáb pə̀kkɨ́nànɨ ɨ́sɨ̀m íhín ndu.»