Read Vute Àpòkàlîb 8 Bible Online

Àpòkàlîb 8 - Vute bible

Àpòkàlîb 8

¹Ɓwâ Mwin ndèɗúú weikɨ́ nàŋ tɨ́ɓamí, ɓɨɨr ɨ́ kèrɨ̀hó̧yè mvin ti ŋgób.

²Á mɨ pə́ dùgallɨb tɨ́ɓaám Mèèín tíí ə́ŋhîn. Kùb ɨ́ nà ŋgáb tóŋ tɨ́ɓaám.

³Dùgal kù ɨ́ gò ə́ə̀ŋnɨ gín tə́bə̀rè múbí. Nɨ́m kùb yíhɨ nyuŋ nóò, nyaŋhîn ɓe gôl yaá nó ŋgáré bi̧í̧. Kùb ɨ́ nà ŋgə́ nyuŋ ví̧i̧, ŋgə́ gɨ̀ tə́bə̀rè múbí yi du kò mvènnì tíí, nyaŋhîn ɓe gôl lɨ ya, yíìnɨ nyuŋ kɨ́. Jùm kɨ́ a mwéíwúɓáhè ɓe mɨ̀yú̧ gbàŋ Mèèín cúk.

⁴Dùgal lèè ŋgáré, jùm nyuŋ yi du yínɨ rèè ɨ́ yà wúínɨ Mèèín tíí, ɓáhîn ɓe mɨ̀yú̧ nùb gbàŋ Mèèín.

⁵Á dùgal á nɨ́m yíhɨ nyuŋ nóò rè, ŋgə́ ɨ́ yúùrê wa du tə́bə̀rè múbí ya rè no ɗéé, ŋgə́ ɨ́ lèèsésò ɗɔ̀bín. Mɨ ɨ́ ô ɓànné nàhí ɓe wùúm bɨ, mɨ ɨ́ pə́ɓwéhè nyə́ŋhȩ̀ȩ́ nàhí, ɗà ɗɔ̀ɔ́b ɨ́ jɨ̀ɨ̀ɓwéhè.

⁶Dùgallɨb tɨ́ɓaám yi du ɓe tóŋ tɨ́ɓaám ŋgáré rè ɨ́ yà nyààŋkɨ́nɨ àm ŋgáb fɨ́llé.

⁷Dùgal tíí ɨ́ fɨ́ì tóŋ. Kí á taar ɓe wa, ɓáhîn ɓe tɨ́m ɨ́ yà sɨ̀tɨ̀sénɨ ɗɔ̀bín. Ɗɔ̀ɔ́b tə̧ə̧́ gɔklȩ́ȩ taarɨ́b, gbɨ́ktèìn mwi̧ ɓe yɨ̀ɨ́b nokwe, ɨ́ nɨ́ɨ́b ɗo̧ó̧ lâs ɨ́ yɨ́kî.

⁸Dùgal bɨrɨ́bí ɨ́ fɨ́ì tóŋ. Ɗà ɓe kàm kù wa kɨ̀ wa ɨ́ gì lùùŋndénɨ mɨ̀kwehɨ̀rí. Mɨ̀kwehɨ̀r tə̧ə̧́ gɔklȩ́ȩ taarɨ́b, gbɨ́ktèìn mwi̧ ɨ́ sèìkî tɨ́m kɨ̀ tɨ́m.

⁹Nɨ́ɨ́b jáŋ mɨ̀kwehɨ̀rí tə̧ə̧́ gɔklȩ́ȩ taarɨ́b, gbɨ́ktèìn mwi̧ ɨ́ ndùkkî. Vùùm kwááì jííb mɨ̀kwehɨ̀rí lâs tə̧ə̧́ gɔklȩ́ȩ taarɨ́b, gbɨ́ktèìn mwi̧ ɨ́ ɓáŋhȩ̀.

¹⁰Dùgal taarɨ́bí ɨ́ fɨ́ì tóŋ. Á káŋyerè kàm kù ɗisówo ɓɨllin, lànnɨ laín hȩ gaar ŋgaméé. Vùùm mvúm jííb lâs ɓe ŋgóndúúm mvúmí lâs tə̧ə̧́ gɔklȩ́ȩ taarɨ́b, ŋgə́ ɨ́ gùsékî gbɨ́ktèìn mwi̧ ya.

¹¹(Káŋyerè yi gusó kɨ́ ɨ́r noò yaá Cúrú̧.) Mvúm ɗɔ̀bɨ́nné lâs, tə̧ə̧́ gɔklȩ́ȩ taarɨ́b, gbɨ́ktèìn mwi̧ ɨ́ njéì, nɨ̀vɨ́tɨ̀b ví̧i̧ yi mei mvúm kíì ɨ́ ndùk, ɓetí nɨ́m ɓáŋhîn yaá no.

¹²Dùgal nààsɨ̀bì ɨ́ fɨ́ì tóŋ. Mvii tə̧ə̧́ gɔklȩ́ȩ taarɨ́b, dùgɨ̀ yerè, dùgɨ̀ káŋyerè, nɨ́m kù ɨ́ wòmɨ̀kî gbɨ́ktèìn mwi̧í̧ mwi̧. Nò lâs, mwa̧ nóò tə̧ə̧́ gɔklȩ́ȩ taarɨ́b, ɨ́ mə̀m gbɨ́ktèìn mwi̧. Ye tə̧ə̧́ gɔklȩ́ȩ taarɨ́b, dùgɨ̀ sɨ́mnɨ̀r, gbɨ́ktèìn mwi̧í̧ no, mwa̧ ɨ́ dù nɨ́ ɓə̀wá.

¹³Mɨ a cè góòmhánɨ, á mɨ ók ndì kù yi du mvɨ̀ìndóŋnɨ còóm cóo tànɨ kúu còóm ɨnè: «Jábɨ́r, jábɨ́r! Yée! Kúúŋ jábɨ́r nùb ɗɔ̀bɨ́nné ɓa pénɨ ɓwâ dùgallɨb taarɨ́b cáŋhɨ̀rí ɓa fɨ́ínɨ tóŋ ndɨ!»