Read Vute Àpòkàlîb 9 Bible Online

Àpòkàlîb 9 - Vute bible

Àpòkàlîb 9

¹Dùgal ŋgibì ɨ́ fɨ́ì tóŋ. Mɨ ɨ́ pê káŋyerè kù tɨ gusówo ɓɨllɨnne ɗàá; kùb ɨ́ nà ŋgə́ kpər ɓavɨ̀r njaŋnjɨ̧né.

²Ŋgə́ ɨ́ kùmnè ɓavɨ̀r njaŋnjɨ̧né, jùm ɨ́ yà fó̧nɨ no kùllìì. Ɗà jùm kɨ́ ɨ́ èrɨ̀kɨ́ɓà ɨnè fɨ̀tɨ̀b, kùb mvii pénɨ ɗàà.

³Cúúm ɨ́ yà mvùrɨ̀hó̧nɨ jùm kɨ́ no, ŋgáb ɨ́ gàkî ɗɔ̀ɔ́b bɨ̂ŋ; kùb ɨ́ nà ŋgáb nyòm ŋgáb ndɨŋ kùb ɓáŋhîn hȩ mɨ̀nyà̧à̧.

⁴Kùb ɨ́ tà ŋgáb bɨ ɓwìn ɓáŋhîn ndɨ̀ŋ, dùgɨ̀ yɔ̀, dùgɨ̀ nɨ́m ɗo̧ó̧ kù, ɨ́dù ɓáŋhîn kɨ́ ŋgáb ndɨ̀ŋɗóòhá bɨ nùb du bɨ́ ɓe sɨ̀tâm Mèèín mɨ́ŋnì womndȩ́ȩ ɗàà rɨ.

⁵Kùb ɨ́ tà cúúm ndè ŋgáb bɨ nùb sɨ̀tâm mɨ́ŋnì ɗàwá kɨ́ kwíhîn kwíhɨ̀r, ɨ́dù ŋgáb jóktɨ̀ɗóòhá bɨ nùb kɨ́ ɓe yíìnɨ́m há̧á̧ njumi ŋgiì. Yíìnɨ́m nùb kɨ́ ɓa kwàniì ɓa dùnɨ hȩ ɓwâ mɨ̀nyà̧ túŋ kùb lɨ á.

⁶Mvókín njumi ŋgiì kɨ́ no, nùb kù ɓa ɗúnɨ vúm yè kúkíí á, ɨ́dù cwé a lù nɨ́ ŋgáb cóo, ŋgáb a dù bɨ́ kûr.

⁷Cúúm bɨ kɨ́ á fɨ́tîn ɓe ɗə̧́nɨ́b du nyaaŋkí̧i̧ àm gwì suu. Yaá hȩ ŋgáb du ɓe kɨ̧̀ nyaŋhîn ɓe gôl ŋgwéé. Ɓɨ̀ɨ̀m ŋgábè yaá hȩ kɨ́ nɨ̀vɨ́tɨ̀bì.

⁸Mvɨ̀tí ŋgábè ŋgwéné yaá hȩ kɨ́ nɨ̀gwiì, nyíín ɓɔ̧ɔ̧ hȩ kpə́b.

⁹Nɨ́m kù yaá ŋgábè kàméé nyaŋhîn ɓe tú̧ hȩ kwa suu. Wùúm gùgɔklɨ̀b ŋgábè yaá hȩ wùúm màtúwààb yi tíí ɗə̧́nɨ́b yi ɗamkom ɓwâ ŋgáb du kɔ́ɔ̀gènɨ jɨ̀ suu rɨ.

¹⁰Ŋgáb yaá ɓe lɨi hȩ kɨ́b mɨ̀nyàbì. Ɓe lɨi kɨ́ á ŋgáb yi ɓa túùŋnɨ nɨ̀vɨ́tɨ̀b há̧á̧ njumi ŋgiì ru.

¹¹Mvèìn ŋgábè du dùgal njaŋnjɨ̧né á. Ɨ́r noò yaá «Àbàdôŋ» ɓe nyindí Èbɨ̀rə̂. Ɓe nyindí gɨrêk cè «Àpòlìyôŋ» (kí ta: Tɨ́ɓáàŋ na á).

¹²Jábɨ́r tíí ndóŋtɨ́, bɨrɨ́b á kwà gònɨ.

¹³Dùgal tínmwi̧í̧ ɨ́ fɨ́ì tóŋ. Mɨ ɨ́ ô kúu kù fó̧tèènɨ gúùr tə́bə̀rè múbí yi du Mèèín tíí nyaŋhîn ɓe gôl lè no.

¹⁴Kúu rè ɨ́ tànà dùgal yi tóŋ ŋgáré bi̧í̧ rè ɨnè: «Dùgallɨb nààsɨ̀b du lí̧í̧ gín ƏÈfɨ̀rât mvúm jíri rè, parɨkɨ́ɨm ŋgáb.»

¹⁵Kùb ɨ́ pàrɨ̀kî dùgallɨb nààsɨ̀b lè. Ɓetí, ɗɔ̀ɔ́b tə̧ə̧́ gɔklȩ́ȩ taarɨ́b, mvókín, ye, njumi ɓe dáín ŋgáb yi ɓa ndùùkɨ́nɨ nɨ̀vɨ́tɨ̀b gbɨ́ktèìn mwi̧í̧ noò yi ɗóotɨ́.

¹⁶Á mɨ ók fain sójààb yi du ɗə̧́nɨ́bí kɨ́, ŋgáb yaá vidɨ̧̀.

¹⁷Nɨ́m yi ndɨŋ mɨ hȩ wum kɨ́ no, mɨ ɨ́ pê ɗə̧́nɨ́b, nɨ̀vɨ́tɨ̀b ya lâs. Ŋgáb yaá ɓe kwa suu jandɨ́b cááŋ, bùlûm hȩ sɨɨ kùb ɓé sàfíìr lɨ, ɓe nɨ́m kù ɨnè síí kɨ́ màgánà ɨ́r du Sûfɨ̀rə̀ rɨ. Ŋgób ɗə̧́nɨ́b kíì yaá hȩ kɨ́b kpábì, jùm ɓe sûfɨ̀rə̀ yaá fó̧nɨ ŋgábè ɓɔ̧ɔ̧.

¹⁸Ɗɔ̀ɔ́b tə̧ə̧́ gɔklȩ́ȩ taarɨ́b, nɨ̀vɨ́tɨ̀b gbɨ́ktèìn mwi̧í̧ yaà ɨ́ ndùk ɓe nɨ́ɨ́b taarɨ́b lè: wa, jùm ɓe sûfɨ̀rə̀ yi fó̧kom ɗə̧́nɨ́bí ɓɔ̧ɔ̧ rè.

¹⁹Nyòm ŋgábè yi du ɓɔ̧ ŋgábè kɨ́ no ɓe dumí á ɓwê. Duum ŋgábè kɨ́ yaá hȩ ŋgwé nyó̧ní àm ndɨŋɓwée nɨ̀vɨ́tè ɓáŋhɨ́nne.

²⁰Gbɨ́ktèìn ɗɔ̀ɔ́b yi meré no, nùb nɨ́ɨ́b ɓáŋhɨ́b taarɨ́b lè yi du bɨ́ kwíìwáá ɨ́ dù bɨ́ mbɨ́kháwa yô̧ó̧ mèín nyaŋhɨ́b ŋgáb nɨ̀miib yi nyaaŋɓaré. Ŋgáb ɨ́ dù bɨ́ mbɨ́kháwa ɗómèé nɨ̀wàtɨ̀b ɓe nɨ́ɨ́b nyaŋhɨ́b ŋgáb ya nyaŋhȩ ɓe gôl, ɓe tú̧ kùb nyaŋhɨ mòné noò, ɓe tú̧ kùb ɓé burôŋjə̀, ɓe sɨɨ ɨ́ yɔ̀, du bɨ́ sàmàìn pə́ íhín, a ô tó̧ó̧, kɨ́ kù a gì gùr ɗàwáá.

²¹Nùb kɨ́ ɨ́ dù bɨ́ mbɨ́kɓwêháwa kwíhèé nɨ̀rì, ə́rɨ́b ɗìbì, ŋguùŋ ɓe yúk.