Read Wahau Kenyah MATIUS 10 Bible Online

MATIUS 10 - Wahau Kenyah bible

MATIUS 10

¹Yesus mengin ida diaʹ puloʹ dua usa diaʹ bayaʹ katuk ke are. Sulo ho naʹ nyingan mida, man nte pekarap bali ngan paget mung naʹan penyakit ngan penginteʹ usa le kelunan.

²Ini ngadan nte diaʹ puloʹ dua usa lawa Injil dina: iaʹ ading nge Simun (iaʹ ilu pisiu Peterus) ngan cenganak ke Anderias; un pe Yakup ngan cenganak ke Yaya, ida dua dina anak Sapdi;

³Pilipus ngan Batulumius; Tumas ngan Matius iaʹ alaʹ pupu idai; Yakup anak Alpius, ngan Tadius;

⁴Simun iaʹ sangat pasat pulitik ading are, ngan Yudas Iskariut iaʹ ban mencai Yesus me bunoʹ o.

⁵Un kelunan puloʹ dua usa dina are, Tuhan Yesus cuk ida ngan peteneng dau mida koʹ baʹan dau ini are: “Ayen ncem tai kaʹ dale dulu diaʹ ca, ngan pekina pe kaʹ lepoʹ Samaria.

⁶Di lareʹ tiga hem tai palaʹ lepoʹ Israil diaʹ koʹ baʹan puyan dumba diaʹ tai lingu are.

⁷Tai ne ikem ngan badaʹ denga ngan pekini dau hem: ‘Un nyeng ne puyan pengaren Allah ke ngaren ilu kelunan,’

⁸Paget ne kelunan diaʹ sakit, ngan pudip kelunan matai, ngan paget dulu diaʹ sakit bekayen, ngan pekarap bali pe. Lepa ne ikem alaʹ tuaʹ le, pekina pe ikem naʹ me dulu tuaʹ le laʹa.

⁹Ayen ncem ngkin inu dalem bahan sapai hem, koʹ baʹan ligit, mat, pirak, ngan pekina pe ca sin bala.

¹⁰Ayen ngkin tenup asat cem koʹ baʹan belanyat sahaʹ, ngan pekina pe keliwa sapai hem, ngan pekina pe keliwa sepatu ngan sekut cem. Ban ne me kelunan diaʹ pegayeng, ilu tekep ke naʹ inu iaʹ tekep ia ke un.

¹¹“Midan ncem nyabeʹ ca lepoʹ, naʹ pe ia lepoʹ bioʹ ngan lepoʹ iʹut pe, tai ne ikem kaʹ dalem, pita aheʹ kelunan iaʹ ke alaʹ ikem ngan selama. Ngan ne ikem ngelineʹ pa tai hem mecin lepoʹ ina.

¹²Buk kem tai kaʹ ca amin dulu, tiga hem kuma ha mida: ‘Tadan ne penyaheʹ kem cen Tuhan.’

¹³Buk un dulu diaʹ un amin ina alaʹ ngan pejakaʹ ikem ngan selama diseʹ, talan ne penyaheʹ kem iaʹ tadan ina ngelineʹ ngan nte. Un sepuʹo buk ke abeʹ un pekina, alaʹ ne penyaheʹ kem iaʹ tadan ina ngeliwet laʹa.

¹⁴Buk un ca amin, buk are ca lepoʹ pe, iaʹ abeʹ un selama diseʹ de ke alaʹ ngan pejakaʹ ikem, ngan abeʹ un ubaʹ ke ngeringa dau isiu hem, tiga hem mecin lepoʹ ina ngan nekaʹ abu cen taket cem, idi re ke tisen seʹ ban nte abeʹ un dapit neng ikem.

¹⁵Ikem nawai le, tegoʹ Tau Bioʹ Allah ke metep ukum kusun tanaʹ ini, bio pengelesau Allah neng lepo Sudum ngan lepo Gumura neng ʹo pengelesau ue neng lepoʹ dina are.”

¹⁶“Ikem nawai le, akeʹ ke cuk ikem koʹ baʹan puyan pun dumba tai neng ahang asu lajam. Tiga hem tudi koʹ baʹan puyan ncung ulai are, mentung ngkem ngelemaʹ kimet cem koʹ baʹan puyan sui garaʹ are.

¹⁷Tiga hem jagaʹ, ban ne un dulu kenai dakep ikem, ngan ketai ngadu ikem palaʹ ukoʹ diaʹ lataʹ pebetep tiraʹ, ngan dulu ke lemeta ikem dalem amin sebayang nte.

¹⁸Un sepuʹo dulu ke ngadu hem neng juma perinta, ngan kata diaʹ paren lepoʹ, suaʹ ban akeʹ iaʹ un ikem. Tuman ina ikem ke badaʹ Denga Injil palaʹ ida, ngan palaʹ dulu diaʹ ca.

¹⁹Dalau dulu ke ngadu ikem, ayen ncem iʹut tawai neng puyan isiu iaʹ ikem ke badaʹ. Tegoʹ jakaʹ kem ke pisiu, Tuhan Allah ke naʹ isiu iaʹ tekep ikem ke pisiu.

²⁰Ban ne isiu iaʹ ikem ke pungkaʹ ina, abeʹ e un cen kimet cem tengen. Uban ne isiu ina ke nai cen Berua Amai hem iaʹ uyan ne dalem kimet cem.

²¹“Kelunan pepadeʹ ke mencai cenganak de loʹ, apan dulu ke lematai ida. Pekina pe dulu diaʹ tamen ke cuk dulu lematai anak de loʹ. Ngan anak ke nyakat amai ngan ueʹ de ngan lematai ida.

²²Mung dulu ke miʹi ikem ban tuman akeʹ ʹo. Buk aheʹ iaʹ mihen pa ketai kuʹo ho, ia lete iaʹ ke tisen puyan iaʹ ke pudip ia dalem Tuhan.

²³Buk dulu petuyen ikem neng ca lepoʹ, tiga hem tai kelap neng lepoʹ diaʹ ca. Dau heʹ neng ikem laʹa, abeʹ kem ke pelepa gayeng ngkem neng mung lepoʹ Israil kena Anak Sio ini ke nai.

²⁴“Abeʹ un anak sekula iaʹ mpau neng ʹo guru ue, ngan pekina pe abeʹ un ulaʹ iaʹ mpau neng ʹo tuʹa ha.

²⁵Tekep ne anak sekula un teto tekaʹ kimet te ʹo pemuyan ne lepa pekuaʹ ngan guru ue. Ngan pekina pe tekep ulaʹ teto tekaʹ kimet buk ke tai pekuaʹ mpau ngan tuʹa ha. Buk dulu ke pisiu laki iaʹ tuʹa amin ini Bali Balsibul, nco pe laʹa dulu ke pisiu diaʹ anak amin ini jaʹat.”

²⁶“Uban ina, ayen ncem takut neng kelunan. Inu iaʹ pekep, atek ke pesik, ngan singket tiraʹ iaʹ suhuk, kenai ie luhaʹ bayaʹ.

²⁷Inu iaʹ akeʹ badaʹ mikem dalau ntem, tekep kem numpak badaʹ a dalau naʹ tau. Ngan inu iaʹ akeʹ pisiu selem neng ikem, tekep kem ke ngelengap badaʹ a laʹa.

²⁸Ayen ncem takut neng dulu diaʹ sukat ke lematai usa hem ngan abeʹ un sukat ke ngejaʹat berua hem. Tiga hem takut neng Allah, Tuhan ncem, ban ne ia iaʹ un nyingan ke ngejaʹat usa hem peging ngan berua hem kaʹ dalem ukum luten.

²⁹Naʹ pe ikem senteng lemeli dua re upit man ca liʹap sin le, abeʹ un ca mida kenai laboʹ kaʹ tanaʹ buk Amai Bioʹ abeʹ un dayo.

³⁰Singket uhat puk neng ulu hem, lepa ne Tuhan Allah pecap pe.

³¹Tuman ina, ayen ncem takut. Ban ne Tuhan Allah malaʹ neng ikem lapa neng ʹo upit diaʹ kadoʹ dina are.”

³²“Aheʹ iaʹ teto dau ngahaʹ ban ia iaʹ anun nceʹ neng ahang dulu, akeʹ ke ngahaʹ ia kaʹ juma Amai heʹ kaʹ surga lete.

³³Un sepuʹo aheʹ iaʹ ke nyepati akeʹ iaʹ ban un ia neng juma dulu, pekina pe akeʹ ke nyepati ia kaʹ juma Amai heʹ kaʹ surga.”

³⁴“Ayen ncem ngata kuma akeʹ kenai ngkin udip iaʹ tadan kusun tanaʹ ini. Abeʹ keʹ un kenai ngkin udip iaʹ tadan, di lareʹ bang bahing kayau le iaʹ akeʹ nai ngkin.

³⁵Akeʹ kenai ngkin ca paseʹ ukoʹ anak laki ke pesakat ngan amai ie, ngan anak leto ke pesakat ngan ueʹ e, ngan sabai leto ke pesakat ngan ueʹ iban ne.

³⁶Cen pengamin kelunan ina tengen kenai bunoʹ o iaʹ jaʹat laleʹ.

³⁷“Aheʹ iaʹ malaʹ amai ie ngan ueʹ e lapa neng ʹo akeʹ, abeʹ e senteng ke badaʹ ia anun nceʹ. Aheʹ iaʹ malaʹ anak laki ie ngan anak leto ho lapa neng ʹo akeʹ, abeʹ e senteng ke badaʹ ia anun nceʹ.

³⁸Ngan pekina pe aheʹ iaʹ leko ke nyuʹun tecek, ukoʹ o ke matai, ngan bayaʹ ban janan nceʹ, abeʹ e senteng ke badaʹ ia iaʹ anun nceʹ.

³⁹Aheʹ iaʹ bang malaʹ neng pengudip pe tengen, ia te iaʹ ke tisen pengudip pe ketai durat uʹo. Un sepuʹo aheʹ iaʹ ke mencai pengudip pe tuman akeʹ, ia iaʹ ke un pengudip pe iaʹ salet.”

⁴⁰“Aheʹ iaʹ alaʹ ikem ngan selama dau, atek ke alaʹ akeʹ lete ngan selama dau. Ngan aheʹ iaʹ alaʹ akeʹ ngan selama dau, atek kelunan ina ke alaʹ ia iaʹ cuk akeʹ lete.

⁴¹Aheʹ iaʹ ke alaʹ lawa Allah ngan selama dau, ban ne ia ca lawa cen Allah, kelunan ina ne iaʹ ke un tulat bang nge pekuaʹ ngan diaʹ lawa Allah dina are. Ngan aheʹ iaʹ nyelama alaʹ ca kelunan iaʹ teneng pemuyan, ban ne tisen kelunan ina teneng pemuyan, ia iaʹ ke un tulat bang nge pekuaʹ ngan kelunan iaʹ teneng pemuyan ina are.

⁴²Ngan nawai le ini, aheʹ iaʹ naʹ sungai, naʹ pia sungai sengim le, me ca diaʹ iʹut neng ahang diaʹ bayaʹ katuk keʹ dini, ban ne tisen ia ca usa iaʹ bayaʹ katuk keʹ, kelunan ina atek ke alaʹ bang nge lete.”